އެމްޑީޕީގެ ޕްރައިމަރީގައި ވޯޓުލުމުގެ ހައްޤު 25324 މީހުންނަށް
-
އެމްޑީޕީ ޕްރައިމަރީގައި 40 ދާއިރާއަކަށް 149 މީހުން ވާދަކުރޭ
-
48 ދާއިރާއެއްގެ ޓިކެޓު ވަނީ ޕްރައިމަރީއަކާއި ނުލައި ކަށަވަރުވެފައި
-
ޖުމްލަ 122 ވޯޓު ފޮށި ބަހައްޓާނެ، މާލޭގައި 27 ފޮށި
ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ޓިކެޓުގައި ވާދަކުރާނެ ބޭފުޅުން ކަނޑައެޅުމަށް ބާއްވާ ޕްރައިމަރީގައި ވޯޓްލުމުގެ ހައްގު އެ ޕާޓީގެ 25 ހާހަށްވުރެ ގިނަ މެމްބަރުންނަށް އޮންނާނެކަމަށް އެމްޑީޕީން ބުނެފިއެވެ.
އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ އެމްޑީޕީގެ މަޖިލިސް ޕްރައިމަރީއާ ގުޅޭގޮތުން މަޢުލޫމާތު ދެއްވަމުން އެ ޕާޓީގެ އިންތިހާބުތަކާބެހޭ ކޮމިޓީގެ މެމްބަރު އިބްރާހިމް ފަލާޙް ވިދާޅުވީ ޕްރައިމަރީގައި 40 ދާއިރާއަކަށް 149 ކެންޑިޑޭޓުން ވާދަކުރާނެ ކަމަށެވެ. އަދި 48 ދާއިރާއަކަށް އެންމެ ކެންޑިޑޭޓެއް ކުރިމަތިލާފައިވާތީ ޕްރައިމަރީއަކާ ނުލައި އެ ކެންޑިޑޭޓުންނަށް އެމްޑީޕީގެ ޓިކެޓު ކަށަވަރުވެފައިވާކަމަށް ފަލާޙް ވިދާޅުވިއެވެ. މީގެއިތުރުން 5 ދާއިރާއަކަށް އެ ޕާޓީގެ ޓިކެޓްގައި ވާދަކުރަން އެއްވެސް ބަޔަކު ހުށަހަޅާފައި ނުވާތީ، ޕްރައިމަރީއަށްފަހު އެކަމާމެދު ގޮތެއް ނިންމާނެކަމަށްވެސް އެމްޑީޕީން ބުެނެއެވެ.
ފަލާޙް ވިދާޅުވީ ޕްރައިމަރީގައި ވޯޓުލުމަށް، ޖުމްލަ 122 ވޯޓު ފޮށި ބަހައްޓާނެ ކަމަށެވެ. އެގޮތުން، މާލޭގައި 27 ފޮށި ބަހައްޓާނެކަމަށް ފަލާޙް ވިދާޅުވިއެވެ. އަދި 95 ރަށުގައި، ކޮންމެ ރަށެއްގައި ފޮއްޓެއް ބަހައްޓާނެކަމަށް ފަލާޙް ވިދާޅުވިއެވެ.
"ހުޅުމާލޭ އުތުރު ދާއިރާގައި ވޯޓު ފޮށި ބަހައްޓާނީ ކާމިލް ދީދީ ސްކޫލްގައި. ހުޅުމާލެ ދެކުނާއި މެދު ދާއިރާގައި ވޯޓު ފޮށި ބެހެއްޓިފައި ހުންނާނީ މުޙައްމަދު ޤާސިމް ޕްރީ ސްކޫލްގައި. މާލެއަށް ރަޖިސްޓްރީވެފައި އެބަތިބި 12 ސަތޭކައަށްވުރެ ގިނަ މީހުން ރަޖިސްޓްރީވެފައި" ފަލާޙް ވިދާޅުވިއެވެ.
ކުރިއަށް އޮތް ރައްޔިތުންގެ މަޖިލިސް އިންތިޚާބުގައި، މެމްބަރުން އިންތިހާބުކުރާ 93 ދާއިރާއަށްވެސް އެމްޑީޕީން ވާދަކުރަން ވަނީ ނިންމާފައެވެ.
ރައްޔިތުންގެ މަޖިލީހުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމަވާފައިވަނީ އަންނަ މަހުގެ 17 ވަނަ ދުވަހުއެވެ. އެ ކޮމިޝަނުން މިހާރު ވަނީ މިމަހުގެ 14 ވަނަ ދުވަހާއި ހަމައަށް، މަޖިލިސް އިންތިޚާބުގައި ވާދަކުރުމުގެ ފުރުޞަތު ހުޅުވާލާފައެވެ.