މީހެއްގެ އެކައުންޓުން ނެގި 1.8 މިލިޔަން ރުފިޔާގެ ތެރެއިން %98 ފައިސާ ފުލުހުން ހޯދައިފި

މަކަރާއި ހީލަތުން މީހެއްގެ އެކައުންޓުން ނެގި 1.8 މިލިޔަން ރުފިޔާގެ ތެރެއިން 98 އިންސައްތަ ރުފިޔާ ފުލުހުން ހޯދާފައިވާކަމަށް ފުލުހުން ވިދާޅުވެއްޖެއެވެ.

މިމައްސަލައާ ގުޅޭގޮތުން މަޢުލޫމާތުދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިކޮނޮމިކް ކްރައިމް ޑިޕާޓްމަންޓްގެ ހެޑް، ސުޕްރިންޓެންޑެންޓް އޮފް ޕޮލިސް ޢަބްދުﷲ ރަޝީދު ވިދާޅުވީ މިމަހުގެ 13ވަނަ ދުވަހު މީހެއްގެ އެކައުންޓުން އެކި ފަހަރު މަތިން 2 އެކައުންޓަކަށް 1.8 މިލިއަން ރުފިޔާ ޓްރާންސްފަރ ކޮށްފައިވާ މައްސަލައެއް ފުލުހުންނަށް ހުށަހަޅާފައިވާ ކަމަށެވެ. ޢަބްދުﷲ ރަޝީދު ވިދާޅުވީ މައްސަލަ ހުށަހެޅުނުތާ 48 ގަޑިއިރު ތެރޭގައި މި ފައިސާގެ 98 އިންސައްތަ ހޯދާފައިވާކަމަށެވެ. މިފައިސާ ހޯދާފައިވަނީ ފައިސާ ޓްރާންސްފަރކޮށްފައިވާ ބޭންކުތަކާއި ވިޔަފާރީގެ މުޢާމަލާތްކޮށްފައިވާ ފަރާތްތަކާއި، އަދި ތުހުމަތުކުރެވޭ ފަރާތެއް ދިރިއުޅޭ ގެ ބަލާ ފާސްކޮށްގެން ކަމަށް އޭނާ ވިދާޅުވިއެވެ.

"އަޅުގަނޑުމެންނަށް މަޢުލޫމާތު ލިބުމާއެކު ބޭންކުތަކާއި ގުޅިގެން ހޯލްޑް ކުރެވިފައިވާ ފައިސާއާއި ވަގަށްނެގި ފައިސާއިން ތަކެތި ގަނެފައިވާ ވިޔަފާރިތަކާއި ގުޅިގެން އެތަންތަނުގެ އެހީތެރިކަމާއެކު ހޯދުނު ފައިސާއާއި ތުހުމަތުކުރެވޭ މީހެއްގެ ދިރިއުޅޭތަން ބަލާ ފާސްކޮށްގެން ހޯދާފައިވާ ފައިސާ ހިމެނޭ." ޢަބްދުﷲ ރަޝީދު ވިދާޅުވިއެވެ.

ޢަބްދުﷲ ރަޝީދު ވިދާޅުވީ އެކައުންޓުން ފައިސާ ނަގާފައިވަނީ، މައްސަލަ ހުށަހެޅި ފަރާތުގެ ފޯނުގެ ޕާސްވޯޑާއި، އޭނާގެ އެކައުންޓުތަކަށް އެކްސެސް އޮތް މީހެއް މެދުވެރިކޮށް ކަމަށެވެ.

އޭނާ ވިދާޅުވީ މިމައްސަލައިގައި ތުހުމަތުކުރެވޭ ހަތަރު މީހުންގެ ތެރެއިން 3 މީހަކު ހައްޔަރުކޮށްފައިވާ ކަމަށެވެ. އެއީ 2 ފިރިހެނުންނާއި އަންހެނެކެވެ. މައްސަލައިގައި ދެން ހިމެނެނީ 16 އަހަރުގެ ކުއްޖެކެވެ. ޢަބްދުﷲ ރަޝީދު ވިދާޅުވީ މިމީހުންނަށް ދަޢުވާކުރުމަށް ޕްރޮސިކިޔުޓަރ ޖެނެރަލްގެ އޮފީހަށް ފޮނުވުމުގެ މަސައްކަތް މިހާރުކުރަމުން އަންނަކަމަށެވެ.

ނޫސްވެރިންގެ މިބައްދަލުވުމުގައި ވާހަކަދައްކަވަމުން ފުލުހުންގެ ފްރޯޑް އިންވެސްޓިގޭޝަން ޔުނިޓުގެ ހެޑް އިންސްޕެކްޓަރ އޮފް ޕޮލިސް މަރިޔަމް ވިދާޅުވީ މަކަރާއި ޙީލަތުން ފައިސާ ނެގުމަށް މޯބައިލް ފޯނާއި، އިލެކްޓްރޯނިކް ސާމާނާއި ދުރުމި، ބޭނުންކޮށްފައިވާކަން ފާހަގަކުރެވިފައިވާ ކަމަށެވެ.

މަރިޔަމް ވިދާޅުވީ ތުހުމަތުކުރެވޭ ފަރާތެއްގެ ބޭންކު އެކައުންޓުން 1.3 މިލިޔަން ރުފިޔާ ހޯދާފައިވާކަމަށެވެ. މީގެ އިތުރުން ތުހުމަތުކުރެވޭ މީހުން ދިރިއުޅޭ ތަން ބަލާ ފާސްކުރުމުގެ ތެރެއިން ނަގުދު ފައިސާގެ ގޮތުގައި 151،985 (އެއްލައްކަ ފަންސާސް އެއްހާސް ނުވަސަތޭކަ އަށްޑިހަ ފަސް) ރުފިޔާ ހޯދާފައިވާކަމަށެވެ. އަދި ތުހުމަތުކުރެވޭ މީހުން ގަނެފައިވާ ތަކެތީގެ ތެރެއިން 223،780 (ދެލައްކަ ތޭވީސް ހާސް ހަތްސަތޭކަ އަށްޑިހަ )ރުފިޔާގެ އަގަށްވާ ތަކެތި ހޯދާފައިވާކަމަށްވެސް އޭނާ ވިދާޅުވިއެވެ. އަދި ގެއްލުނު 1.8 މިލިޔަން ރުފިޔާގެ ތެރެއިން ޖުމްލަ 1.67 މިލިޔަން ރުފިޔާ ހޯދިފައިވާ ކަމަށާއި، ހޯދުނު ފައިސާ، ވެރިފަރާތަށް ހަވާލުކުރުމުގެ މަސައްކަތް ކުރަމުން އަންނަކަމަށް މަރިޔަމް ވިދާޅުވިއެވެ.

"ޖުމްލަ އަޅުގަނޑުމެންނަށް ރިކަވާ ކުރެވިފައި މިވަނީ 1.67 މިލިޔަން ރުފިޔާ. ރިކަވަރ ކުރެވުނު ފައިސާ ވެރިފަރާތާ ހަވާލުކުރުމުގެ މަސައްކަތް އަޅުގަނޑުމެން އެބަ ކުރިއަށް ގެންދަން. މި ސްޕީޑުގައި އަޅުގަނޑުމެންނަށް މަސައްކަތް ކުރެވުނީ މުއައްސަސާތަކުންނާއި ޢާންމު ރައްޔިތުން ދެއްވި އެއްބާރުލުމާއި އެހީތެރިކަމުގެ ސަބަބުން." މަރިޔަމް ވިދާޅުވިއެވެ.

މަކަރާއީ ހީލަތުން ނަގާފައިވާ ފައިސާ ޓްރާންސްފަރކޮށްފައިވާ ގޮތާއި ގުޅޭގޮތުން ނޫސްވެރިންގެ މިބައްދަލުވުމުގައި މަޢުލޫމާތު ދެއްވަމުން އިކޮނޮމިކް ކްރައިމް ޑިޕާޓްމަންޓްގެ ފަރާތުން ސާޖަންޓް ޢަބްދުﷲ ނަދީމް ވިދާޅުވީ މައްސަލަ ހުށައެޅި ފަރާތުގެ އެކައުންޓުން 3 މީހެއްގެ އެކައުންޓަށް ފައިސާ ޖަމާކޮށްފައިވާ ކަމަށެވެ. އެގޮތުން ތުހުމަތުކުރެވޭ ފުރަތަމަ މީހާގެ އެކައުންޓަށް ޖުމްލަ 1 މިލިޔަން ރުފިޔާ 5 ފަހަރެއްގެ މަތިން ޓްރާންސްފަރކޮށްފައިވާ ކަމަށް އޭނާ ވިދާޅުވިއެވެ. އަދި ތުހުމަތުކުރެވޭ 2 ވަނަ މީހާގެ އެކައުންޓަށް 4 ފަހަރެއްގެ މަތިން ޖުމްލަ 8 ލައްކަ ރުފިޔާ ޓްރާންސްފައިކޮށްފައިވާ ކަމަށްވެސް އޭނާ ވިދާޅުވިއެވެ.

އަދި ތުހުމަތުކުރެވޭ 2 ވަނަ މީހާގެ އެކައުންޓަށް ޖަމާކުރި ފައިސާގެ ތެރެއިން 7 ލައްކަ ރުފިޔާ ތުހުމަތުކުރެވޭ 3 ވަނަ މީހާގެ އެކައުންޓަށް ޖަމާކޮށްފައިވާ ކަމަށާއި، ތުހުމަތުކުރެވޭ ފުރަތަމަ މީހާއާއި ދެވަނަ މީހާގެ އެކައުންޓުތަކުން ޖުމްލަ 1،526،000 ( އެއް މިލިޔަން ފަސްސަތޭކަ ސައްބީސް ހާސް) ރުފިޔާ ތުހުމަތުކުރެވޭ 3 ވަނަ މީހާގެ އެކައުންޓަށް ޖަމާކޮށްފައިވާކަމަށް ނަދީމް ވިދާޅުވިއެވެ.

"މި މައްސަލާގައި މުޅި ޖުމްލަ 1.3 މިލއަނަށްވުރެ ގިނަ ރުފިޔާ ބޭންކުގައި ހޯލްޑް ކުރެވިފައިވޭ." ނަދީމް ވިދާޅުވިއެވެ.

މިފަހަކަށް އައިސް މަކަރާއި ހީލަތުން މީހުންގެ އަތުން ފައިސާ އަތުލައިގަންނަ މައްސަލަތައް ފުލުހުންނަށް ހުށައެޅެމުންދާ މިންވަރު އިތުރު ކަމަށް ފުލުހުން ވިދާޅުވެއެވެ. އެގޮތުން 2021ވަނަ އަހަރުން ފެށިގެން މިހާތަނަށް، އޮޅުވާލައިގެން ފައިސާ ހޯދުމުގެ މައްސަލަތަކުގައި ދިވެހިންގެ އަތުން 57 މިލިއަންވުރެ ގިނަ ރުފިޔާ ގެއްލިފައިވާކަމަށް ފުލުހުންގެ އިކޮނޮމިކް ކްރައިމް ޑިޕާޓްމަންޓުން މީގެ ކުރިން ވަނީ ހާމަކޮށްފައެވެ. އަދި މަކަރާއި ޙީލަތުން ފައިސާ ހޯދުމުގެ 1087 މައްސަލައެއް މިދިޔަ އަހަރު ފުލުހުންނަށް ހުށައަޅާފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.