އިލެކްޝަންސްގެ މެންބަރުކަމަށް އައްޔަންކުރުމަށް ޒަކަރިއްޔާގެ ނަން މަޖިލީހަށް

އިލެކްޝަންސް ކޮމިޝަންގެ މެމްބަރުންގެ ތެރެއިން ދައުރުހަމަވާ މެންބަރުގެ މަޤާމަށް، އައްޔަންކުރުމަށް އެކޮމިޝަންގެ ސެކްރެޓަރީ ޖެނެރަލް މެމްބަރު ޙަސަން ޒަކަރިއްޔާގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވައިފިއެވެ.

މަޖިލީހަށް ރައީސް ފޮނުއްވި ސިޓީފުޅުގައިވަނީ އިސްމާޢިލް ޙަބީބް ޢަބްދުއްރަޙީމްގެ މުއްދަތު 13 މާރޗް 2024އަށް ހަމަވާތީ ޢާންމުކޮށް އިޢުލާން ކުރުމުން އެކަމަށް އިޖާބަދެއްވި ބޭފުޅުންގެ ނަންތައް ފޮނުއްވާ ކަމަށެވެ. މީގެ ތެރެއިން ޙަސަން ޒަކަރިއްޔާގެ ނަން ފާސްކޮށްދެއްވުމަށް އެދިވަޑައިގަންނަވާ ކަމަށެވެ. މިމައްސަލަ މިހާރު ވަނީ މަޖިލީހުގެ ކޮމިޓީއަށް ފޮނުވާފައެވެ.

ޙަސަން ޒަކަރިއްޔާ މިވަގުތު ހުންނެވީ އިލެކްޝަންސް ކޮމިޝަންގެ ސެކްރެޓަރީ ޖެނެރަލްކަމުގެ މަޤާމުގައެވެ.

ހަބީބު އިލެކްޝަންސް ކޮމިޝަންގައި މިހާރު ފުރުއްވަމުން ގެންދަވަނީ ދެވަނަ ދައުރެވެ. މިހާރު ޙަބީބް ހުންނެވީ ކޮމިޝަންގެ ނައިބު ރައީސްކަމުގެ މަޤާމުގައެވެ.

އިލެކްޝަންސް ކޮމިޝަނުން ހުސްވާ މެމްބަރުގެ މަގާމަށް ކުރިމަތިލުމަށް އާއްމުކޮށް ހުޅުވާލުމުން ޒަކަރިއްޔާގެ އިތުރުން 13 ބޭފުޅަކު ވަނީ ނަން ހުށައަޅާފައެވެ. އިލެކްޝަންސް ކޮމިޝަންގެ މެންބަރެއްގެ މުއްދަތަކީ 4 އަހަރެވެ.