އެމްޑީޕީގެ ރައީސަކަށް ޝާހިދު

ދިވެހިރައްޔިތުންގެ ޑިމޮކްރެޓިކް ޕާޓީގެ ރައީސަކަށް އިންތިޚާބަކާ ނުލައި ކުރީގެ ފޮރިން މިނިސްޓަރު ޢަބްދުﷲ ޝާހިދު ހޮވިއްޖެއެވެ.

އެމްޑީޕީން ހާމަކުރި ގޮތުގައި ޝާހިދު މިމަޤާމަށް ހޮވުނީ، އެމްޑީޕީގެ ރައީސްކަމަށް ކުރިމަތިލުމަށް ހުޅުވާލި ފުރުޞަތުގައި އިތުރު އެއްވެސް ފަރާތަކުން ކުރިމަތިނުލުމުންނެވެ. އެހެންކަމުން އިންތިޚާބަކާ ނުލައި ޝާހިދު ހޮވުނުކަން އެމްޑީޕީންވަނީ ހާމަކޮށްފައެވެ.

އެމްޑީޕީގެ ރައީސްކަމަށް އިންތިޚާބުވުމާ ގުޅިގެން އެކްސްގައި ކުރި ޕޯސްޓެއްގައި ޢަބްދުﷲ ޝާހިދު ވިދާޅުވީ ދިވެހި ރައްޔިތުންގެ ޑިމޮކްރަޓިކް ޕާޓީގެ ރައީސްކަމުގެ ޒިންމާއާއި ހަވާލުވަނީ ޕާޓީގެ މެމްބަރުންގެ ފުރިހަމަ އިތުބާރާއެކު އާބާރެއްގައި ޕާޓީ ކުރިއަށް ގެންދަން ކަމަށެވެ. ޝާހިދު ވިދާޅުވީ ދިވެހި ޤައުމާއި ދިވެހި ރައްޔިތުންގެ އުންމީދުތަކަށް އެމް.ޑީ.ޕީ ކާމިޔާބު ހޯދާނެ ކަމަށެވެ.

އެމްޑީޕީގެ ރައީސްގެ މަގާމު ހުސްވީ، އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދު ޖޫން 2023ގައި އެޕާޓީން އިސްތިއުފާދެއްވަމުންނެވެ. އޭގެ ފަހުން މިހާތަނަށް އެމްޑީޕީގެ ވަގުތީ ރައީސްކަން ކުރެއްވީ ކުރީގެ ރައީސް އިބްރާހީމް މުހައްމަދު ޞާލިހްއެވެ.

އަބްދުﷲ ޝާހިދު ވަނީ ކުރީގެ ރައީސް އަލްއުސްތާޛް މަޢުމޫން އަބްދުލްޤައްޔޫމްގެ ވެރިކަމުގައި ފޮރިން މިނިސްޓަރުކަން ކުރައްވާފައެވެ. އަދި ރައްޔިތުންގެ މަޖިލީހުގައި ރައީސުލްޖުމްހޫރިއްޔާގެ މެންބަރު ކަމާއި ވ. އަތޮޅު މެންބަރު ކަމާއި ކެޔޮދޫ ދާއިރާގެ މެންބަރުކަން އަދި ހެންވޭރު އުތުރު ދާއިރާގެ މެންބަރުކަންވެސް އަދާ ކުރައްވާފައިވެއެވެ.

ޑީއާރުޕީގައި ހުންނެވުމަށްފަހު އެ ޕާޓީ ދޫކުރައްވައި ޝާހިދު އެމްޑީޕީއާ އަލަށް ގުޅިވަޑައިގެންނެވީ 2014 ވަނަ އަހަރުއެވެ. އޭރު އޭނާ ހުންނެވީ ރައްޔިތުންގެ މަޖިލީހުގެ ރައީސް އަދި ކެޔޮދޫ ދާއިރާގެ މެންބަރުގެ ގޮތުގައެވެ.

އެމްޑީޕީއާ ގުޅިވަޑައިގެން ޝާހިދު ވަނީ އެ ޕާޓީގެ ދެވަނަ ސަރުކާރުގައި ވެސް ފޮރިން މިނިސްޓަރުގެ މަޤާމު އަދާ ކުރައްވާފައެވެ. އަދި އދ. ގެ އާއްމު މަޖިލީހުގެ ރިޔާސަތު ވެސް ޝާހިދު ވަނީ ބަލަހައްޓާވާފައެވެ.