ސަރުކާރު ދެމެހެއްޓުމަށް އެންމެން އެއްބައިވަންތަ ވާންޖެހޭ: ޝަހީމް
-
ރައީސް ވެރިކަމާއި ހަވާލުވިއިރު ޤައުމު އޮތީ ވަރަށް ޙައްސާސް ޙާލަތެއްގައި
-
އިޤުތިޞާދާއި ޤައުމިއްޔަތު ހިމާޔަތްކުރުމަށް ރައީސް ބުރަ މަސައްކަތްތަކެއް ކުރެއްވި
-
އެންމެން އެކަތިގަނޑަކަށް ވާންޖެހޭ ކަމަށް ވިދާޅުވި
މިސަރުކާރު ދެމެހެއްޓުމަށްޓަކައި އެންމެން އެއްބައިވަންތަ ވާންޖެހޭކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ރައީސުލްޖުމްހޫރިއްޔާ ހުވަދުއަތޮޅު އުތުރުބުރިއަށް މިހާރު ކުރައްވަމުން ގެންދަވާ ދަތުރުފުޅުގައި ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަދައްކަވަމުންނެވެ.
އިސްލާމީ ކަންތައްތަކާ ބެހޭ ވަޒީރު ވިދާޅުވީ ރައީސް މުޢިއްޒު ވެރިކަމާ ހަވާލުވެވަޑައިގެންނެވި އިރު ޤައުމު އޮތީ ވަރަށް ޙައްސާސް ހާލަތެއްގައި ކަމަށެވެ. އެގޮތުން ދިވެހި އިޤުތިޞާދާއި ދިވެހި ޤައުމިއްޔަތު އޮތީ ވަރަށް ނާޒުކުކޮށްކަމަށް ޝަހީމް ވިދާޅުވިއެވެ. އަދި މި ހިނގާދިޔަ ގާތްގަނޑަކަށް 13 ހަފްތާގެ މުއްދަތުގެ ތެރޭގައި ޤައުމުގެ މިނިވަންކަމާއި ސިޔާދަތު ހިމާޔަތްކުރުމަށާއި، އެތައް ސަތޭކަ ބިލިޔަނުން ޤައުމު ދަރާފައިއޮތް ހާލަތުން އަރައިގަތުމަށް ބުރަ މަސައްކަތްތަކެއް ރައީސް ކުރެއްވިކަމަށް ޝަހީމް ވިދާޅުވިއެވެ.
ވަޒީރު ވިދާޅުވީ އަޅުގަނޑުމެންގެ ތެރޭގައި ވާދަވެރިކަން އޮތް ނަމަވެސް، ބައިބައިވުމާއި ދެކޮޅުވެރިކަން އުފައްދައިގެން ނުވާނެ ކަމަށެވެ.
"ސިޔާސީ ކަންތައްތަކުގައްޔާއި އިޖުތިމާޢީ ކަންކަމުގައި އަޅުގަނޑުމެންގެ ތެރޭގައި ބައިބައިވުންތަކަށް ޖާގަ ދީގެން ނުވާނެ." ޝަހީމް ވިދާޅުވިއެވެ.
ޝަހީމް ވިދާޅުވީ މިސަރުކާރު ފުރޮޅާލުމަށްޓަކައި ގިނަ ބަޔަކު މަސައްކަތްކުރަމުން އަންނަ ކަމަށެވެ. އެގޮތުން ރާއްޖޭން ބޭރުގެ ޢަދާވާތްތެރިންނާއި އެތެރޭގެ ޢަދާވަތްތެރިން ގުޅިގެން ސަރުކާރު ފުރޮޅާލުމަށް ބައިޢަތު ހިފާފައިވާ ކަމަށެވެ. އެހެންކަމުން ރައްޔިތުން މިކަމާއި ދެކޮޅަށް ބަދަހިކަމާއެކު ތިބެންޖެހޭކަމަށް ޝަހީމް ވިދާޅުވިއެވެ.