ޗައިލްޑް އެންޑް ފެމިލީ ޕްރޮޓެކްޝަނަށް މިދިޔަ މަހު 181 މައްސަލަ

ޑިސެންބަރު މަހާ އަޅާބަލާއިރު، މިދިޔަ ޖެނުއަރީ މަހު ޗައިލްޑް އެންޑް ފެމިލީ ޕްރޮޓެކްޝަން ސަރވިސްއަށް ހުށައެޅި މައްސަލަތައް އިތުރުކަމަށް އެ އިދާރާގެ ތަފާސްހިސާބުތަކުން ދައްކައިފިއެވެ.

ތަފާސްހިސާބުތަކުން ދައްކާގޮތުން ޗައިލްޑް އެންޑް ފެމިލީ ޕްރޮޓެކްޝަންއަށް މިދިޔަ އަހަރުގެ ޑިސެންބަރު މަހު 131 މައްސަލައެއް ހުށައަޅާފައިވެއެވެ. އަދި މިދިޔަ ޖެނުއަރީ މަހު އެ އިދާރާއަށް ހުށައަޅާފައިވަނީ 181 މައްސަލައެވެ. މިއީ 50 މައްސަލަ އިތުރު އަދަދެކެވެ.

ހުށައަޅާފައިވާ މައްސަލަތަކުގެ ބާވަތްތައް:

• ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 76 މައްސަލަ
• ކުޑަކުދިންގެ އަޚުލާޤާއި ގުޅުން ހުރި 19 މައްސަލަ
• އެހީތެރިކަން ބޭނުންވެގެން ހުށަހަޅާފައިވާ 2 މައްސަލަ
• ކުޑަކުދިންގެ ޙައްޤުތަކާއި ގުޅުންހުރި 3 މައްސަލަ
• ޢާއިލީ މައްސަލަތަކާއި ގުޅުންހުރި 36 މައްސަލަ
• އެހެނިހެން 18 މައްސަލަ

ޗައިލްޑް އެންޑް ފެމިލީ ޕްރޮޓެކްޝަނަށް އަލަށް 14 ކުދިން މިދިޔަ މަހު ވަނީ ނަގާފައެވެ. އަދި މިވަގުތު ދައުލަތުގެ ބެލުމުގެ ދަށުގައި ޖުމްލަ 172 ކުދިން އެބަ ތިއްބެވެ.

ޗައިލްޑް އެންޑް ފެމިލީ ޕްރޮޓެކްޝަންގެ ހެލްޕް ލައިން 1412 މެދުވެރިކޮށް 2،431 ކޯލު މިދިޔަ މަހު ލިބިފައިވާ ކަމަށެވެ. މީގެ ތެރެއިން މައްސަލައިގެ ގޮތުގައި ހުށަހަޅާފައިވަނީ 62 މައްސަލައެވެ.

1412 އަށް އެންމެ ގިނައިން ހުށައެޅި މައްސަލަތަކުގެ ބާވަތްތައް:

• ކުދިން ބެލުމުގެ 15 މައްސަލަ
• އިހުމާލުގެ 11 މައްސަލަ
• ޖިންސީ އަނިޔާގެ 7 މައްސަލަ
• ކުދިންނާ ބައްދަލުކުރުމުގެ 4 މައްސަލަ
• ނަފްސާނީ އަނިޔާގެ 4 މައްސަލަ

ޗައިލްޑް އެންޑް ފެމިލީ ޕްރޮޓެކްޝަން ސާވިސްއަކީ މުޖުތަމަޢުގައި އެހީތެރިކަމާއި އަޅާލުން ބޭނުންވެފައިވާ ކުދިންގެ މަސްލަޙަތު ޙިމާޔަތް ކުރުމަށް ޚާއްޞަކޮށްގެން އުފައްދަވާފައިވާ އިދާރާއެކެވެ. މި އިދާރާ ހިނގަމުންދަނީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ދަށުންނެވެ.