މަޖިލިސް އިންތިޚާބަށް ފުލުހުންގެ ކޮމާންޑަރުން ތަމްރީނުކުރަން ފަށައިފި

އަންނަ މާރޗް މަހުގެ 17ގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި މާލެއާއި އަތޮޅު ތެރޭގައި ތިބޭ ފުލުހުން ކޮމާންޑަރުންގެ ގޮތުގައި މަސައްކަތްކުރާ އޮފިޝަލުން ތަމްރީނުކުރަން ފަށައިފިއެވެ.

މި ތަމްރީނުތައް ކުރިއަށް ގެންދަނީ ދިވެހި ފުލުހުންގެ ޚިދުމަތާއި އިލެކްޝަންސް ކޮމިޝަން ގުޅިގެންނެވެ.

ފުލުހުން ވިދާޅުވީ މި ތަމްރީނުތަކުގެ ތެރެއިން މަޖިލިސް އިންތިޚާބާ ބެހޭ ޤާނޫނާއި އިންތިޚާބުތަކާ ބެހޭ ޢާންމު ޤާނޫނާއި އިލެކްޝަންސްގެ ޤާނޫނަށް އަހުލުވެރިކުރުވުމަށް މަޢުލޫމާތު ހިއްސާކުރައްވާނެ ކަމަށެވެ.

މީގެ އިތުރުން ކުރީގެ އިންތިޚާބުތަކުގެ މަޢުލޫމާތާއި ވޯޓުލުމާއި ވޯޓު ގުނުމުގެ ހުރިހާ މަރުހަލާއެއްގައި އަމާންކަމާއެކު ހަރަކާތްތެރިވެފައިވާ ގޮތުގެ ތަޖުރިބާތަކާއި މަޢުލޫމާތު މި ތަމްރީނު ޕްރޮގުރާމުގައި ހިއްސާކުރައްވާނެކަމަށް ވެސް ފުލުހުން ވިދާޅުވިއެވެ. އަދި ކުރީ އިންތިޚާބުތަކުގައި ދިމާވެފައިވާ މައްސަލަތަކާއި ވޯޓުލުމުގެ ޙައްޤު އޮންނަ ކޮންމެ ރައްޔިތަކަށް އެ ޙައްޤުގެ ބޭނުން އެންމެ ފުރިހަމައަށް ކަށަވަރުކޮށްދިނުމާ ގުޅޭގޮތުންވެސް މަޢުލޫމާތު ހިއްސާކުރައްވާނެކަމަށް ވެސް ފުލުހުން ވިދާޅުވިއެވެ.

މި ތަމްރީނުތައް ކުރިއަށް ގެންދިޔުމަށް ހަމަޖެހިފައިވަނީ ދެ ދުވަހުގެ މުއްދަތަކަށް ކަމަށް ފުލުހުން ވިދާޅުވެއެވެ. އަދި މި ޕްރޮގްރާމްގައި މަޢުލޫމާތު ދެއްވަނީ މި ޚިދުމަތުގެ މުދައްރިބުންނާއި އިލެކްޝަންސް ކޮމިޝަނުގެ ކަމާގުޅޭ މުދައްރިބުންކަމަށް ފުލުހުން ވިދާޅުވެއެވެ. އަދި މާދަމާ އޮންނަ ތަމްރީނުތަކުގައި މަޢުލޫމާތު ދެއްވާނީ ކޮމިޝަނަރ އޮފް ޕޮލިސް ޢަލީ ޝުޖާޢުކަމަށް ވެސް އެ ޚިދުމަތުން ވިދާޅުވެއެވެ.

ކުރިއަށް އޮތް މަޖިލިސް އިންތިޚާބުގައި 93 ދާއިރާއަކަށް 368 ކެންޑިޑޭޓުން ވާދަކުރެއެވެ.