އިންތިޚާބާ ގުޅޭ ބިލު ފާސްކުރުމުން ޤާނޫނީ ޙައިސިއްޔަތާމެދު ސުވާލު އުފެދޭ: ރައީސް

މަޖިލީހުގެ ޖުމްލަ މެމްބަރުންގެ އަދަދު 80 ކަމަށް ބަލައިގެން، އިންތިޚާބުތަކާ ބެހޭ ބިލް ފާސްކުރުމުން އެކަމުގެ ޤާނޫނީ ޙައިސިއްޔަތާމެދު ސުވާލު އުފެދޭ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ނ.ކެނދިކުޅުދޫގެ ރައްޔިތުންނާ ބައްދަލުކުރައްވައި ސުޕްރީމް ކޯޓުގެ ނިންމެވުމާ ގުޅޭގޮތުން ވާހަކަފުޅުދައްކަވަމުންނެވެ.

މަޖިލިސް އިންތިޚާބު ފަސްކުރުމަށް އިންތިޚާބުތަކާ ބެހޭ ޢާންމު ޤާނޫނަށް އިސްލާހު ގެނައި ބިލު އެންމެ ފުރަތަމަ ތަސްދީގުކުރެއްވުމަށް ރައީސުލްޖުމްހޫރިއްޔާއަށް ފޮނުވީ މިމަހުގެ 12ވަނަ ދުވަހުއެވެ. މި ބިލަށް އަލުން ވިސްނާވަޑައިގަތުމަށް އެދި ރައީސުލްޖުމްހޫރިއްޔާ އަލުން އަނބުރާ މަޖިލީހަށް ފޮނުއްވީ މިމަހުގެ 26ވަނަދުވަހުއެވެ. އަދި މިމަހުގެ 28 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މި ބިލަށް އެއްވެސް ބަދަލެއް ނުގެނެސް ދެވަނަ ފަހަރަށް އެ ބިލު 47 މެމްބަރުންގެ ވޯޓުން ވަނީ ފާސްކުރައްވާފައެވެ.

ޤާނޫނު އަސާސީގެ 91 ވަނަ މާއްދާގެ ށ.ގައި އޮންނަނީ ރައްޔިތުންގެ މަޖިލީހަށް ރައީސުލްޖުމްހޫރިއްޔާ އަނބުރާ ފޮނުވާ ބިލަކާމެދު އަލުން ވިސްނުމަށްފަހު، އެ ބިލަށް އެއްވެސް ބަދަލެއް ނުގެނެސް، ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެއްޖެނަމަ، އެ ބިލެއް ރައީސުލްޖުމްހޫރިއްޔާ ތަޞްދީޤުކުރައްވާ، ސަރުކާރުގެ ގެޒެޓްގައި ޝާއިޢުކުރައްވަންވާނެ ކަމަށެވެ.

ފެބުރުއަރީ މަހުގެ 28ގައި މިބިލު ފާސްކުރީ މަޖިލީހުގެ ޖުމްލަ މެންބަރުންގެ އަދަދަކީ 80 ކަމަށް ބަލައިގެންނެވެ. 19 ވަނަ މަޖިލީހުގައި ތިއްބެވި 87 މެމްބަރުންގެ ތެރެއިން 7 މެމްބަރުން ސަރުކާރުގެ މަޤާމްތަކަށް އައްޔަން ކުރެއްވުމާ ގުޅިގެން އެމެމްބަރުންގެ ގޮނޑިތައްވަނީ ހުސްވެފައެވެ. އެހެންނަމަވެސް 20ވަނަ ރައްޔިތުންގެ މަޖލީހަށް މެމްބަރުން އިންތިޚާބު ކުރެއްވުމާ ދެމެދު ބައި-އިލެކްޝަނެއް ބާއްވާނެ ވަގުތު ނެތުމުން އެގޮނޑިތަކަށް މެމްބަރުންވަނީ އައްޔަންނުކުރެވިއެވެ.

ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނުމުގައި ބަލާ ގޮތަށް މަޖިލީހުން ގެނައި އިސްލާހު ގޯސްކަމަށް ސުޕްރީމް ކޯޓުން ވަނީ ހުކުމްކުރައްވާފައެވެ. ސުޕްރީމް ކޯޓުން މިގޮތަށް ހުކުމް ކުރައްވާފައިވަނީ މަޖިލީހުގެ ޖުމްލަ މެންބަރުންގެ އަދަދު ގުނާއިރު، ހުސްވެފައިވާ ގޮނޑި ނުގުނާގޮތަށް ރައްޔިތުންގެ މަޖިލީހުގެ ގަވާއިދަށް ގެނައި އިސްލާހު ޤާނޫނު އަސާސީއާ ޚިލާފުވާތީ މިއިސްލާހް ބާޠިލުކޮށްދެއްވުމަށް އެދި ބަންޑާރަ ނައިބުގެ ފަރާތުން ހުށައަޅާފައިވާ މައްސަލައާ ގުޅިގެންނެވެ.

ނ. ކެނދިކުޅުދޫ ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ދެއްކެވިވާހަކަފުޅުގައި ވިދާޅުވީ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދަކީ 80ކަމަށް ކަނޑައަޅައިގެން ނިންމާ ކޮންމެ ނިންމުމަކީ ޤާނޫނު އަސާސީއާ ޚިލާފު ނިންމުމެއްކަމަށް ސުޕްރީމް ކޯޓުގެ 5 ފަނޑިޔާރުންގެ އަޣުލަބިއްޔަތުން ޙުކުމްކުރައްވާފައިވާ ކަމަށެވެ. އަދި ސުޕްރީމް ކޯޓުން ޙުކުމްކުރައްވާފައިވަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދަކީ 87 ކަމަށެވެ. އެހެންނަމަވެސް ރައްޔިތުންގެ މަޖިލީހުން ތަސްދީގުކުރައްވަން ފޮނުވި ބިލް ފާސްކުރީ މަޖިލީހުގެ ޖުމްލަ މެންބަރުންގެ އަދަދު 80ކަމަށް ބަލައިގެން ކަމަށް ވާތީ އެ ނިންމުމުގެ ޤާނޫނީ ޙައިސިއްޔަތާމެދު ސުވާލު އުފެދޭކަމަށް ރައީސް ވިދާޅުވިއެވެ.

ރައީސް ވިދާޅުވީ އަލުން ބިލު ފާސްކުރުމާމެދު ސުވާލު އުފެދުނު ނަމަވެސް، ބިލު ތަސްދީގުކުރެއްވުމަށް ބަންޑާރަ ނައިބު ލަފާދެއްވައިފިނަމަ އެބިލު ތަސްދީގުކުރައްވާނެ ކަމަށެވެ.

"ސުޕްރީމް ކޯޓުން ނިންމި ނިންމުމާ ޚިލާފަށް މަޖިލީހުން ބިލު ފާސްކޮށް ފޮނުވި ނަމަވެސް، ތަސްދީގުކުރުމަށް ބަންޑާރަ ނައިބު ލަފާ ދެއްވައިފިނަމަ ވަގުތުން ތަސްދީގު ކުރާނަން." ރައީސް ވިދާޅުވިއެވެ.

ރައީސް ވިދާޅުވީ ރޯދަ މަހު މަޖިލިސް އިންތިޚާބު ބޭއްވުމަށް އެމަނިކުފާނު އެއްވެސް ވަރަކަށް ބޭނުންފުޅުނުވާތީ ޤާނޫނު ތަންދޭނަމަ ރަމަޟާން މަހުގެ ކުރިން އިންތިޚާބު ބޭއްވުމަށް އިލެކްޝަންސް ކޮމިޝަންގައި އެދިވަޑައިގެންނެވިކަމަށެވެ. ރަމަޟާން މަހަކީ އަޅުކަމުގެ މައްސަރެއްކަމަށާއި ރޯދަ މަހުގެ ފަހު ދިހައެއް ސަރުކާރު ބަންދު ދުވަސްތަކެއްގެ ގޮތުގައި ކަނޑައެޅުއްވުމަށް ނިންމެވީ އެސަބަބާހުރެ ކަމަށެވެ. އަދި އިންތިޚާބު ރޯދައިގެ ފަހުން ބާއްވާނަމަ ފަހު 10ގައި ވެސް އުޅެންޖެހޭނީ ކެންޕޭނުގައި ކަމަށާއި އެއީ އެންމެ ރަނގަޅުގޮތެއް ނޫންކަމަށް ރައީސް ވިދާޅުވިއެވެ.