7 އަހަރުގެ މެދުކެނޑުމަކަށްފަހު އަލުން "އެ ހަނދާނުގައި" ޝޯ

7 އަހަރުގެ މެދުކެނޑުމަކަށްފަހު "އެ ހަނދާނުގައި" ޝޯ ޓެލެވިޜަން މޯލްޑިވްސްއިން ގެނެސްދިނުމަށް ޕަބްލިކް ސާވިސް މީޑިޔާ ޕީއެސްއެމުން އަންނަނީ ތައްޔާރުވަމުންނެވެ.

މިފަހަރުގެ އެހަނދާނުގައި ޝޯގައި ލަވަކިޔާނީ އެލަވައެއްގެ "އޮރިޖިނަލް" ލަވަކިޔާފައިވާ ފަންނާނުންނެވެ.

ޕީއެސްއެމުން ވަނީ މިފަހަރުގެ ޕްރޮގުރާމުގައި ބައިވެރިވާ ފަންނުންނާއެކީ މިކަމާ ގުޅޭ އެއްބަސްވުމުގައި ސޮއިކޮށްފައެވެ. މި އެއްބަސްވުމުގައި ޕީއެސްއެމްގެ ފަރާތުން ސޮއިކުރެއްވީ މެނޭޖިން ޑިރެކްޓަރ ޒީނާ ޒާހިރެވެ.

ފަންނާނުންނާއެކު ސޮއިކުރެއްވުމަށްފަހު މެނޭޖިން ޑިރެކްޓަރ ޒީނާ ޒާހިރު ވިދާޅުވީ "އެހަނދާނުގައި" ޝޯއަކީ ޓީވީ ބެލުންތެރިންގެ މެދުގައި ވަރަށް މަޤުބޫލު ޝޯއެއް ކަމަށާއި، ޕީއެސްއެމްއާ ހަވާލުވިއިރު، މިޝޯވ އަލުން ގެނެސްދިނުމަށް ވަރަށް ގިނަ ބަޔަކު އެދެމުންދިޔަކަމަށެވެ. އެހެންކަމުން މިޝޯ މުޅިން ތަފާތު ގޮތަކަށް މިއަހަރު ގެނައުމަށް ނިންމީކަމަށް ޒީނާ ވިދާޅުވިއެވެ.

"ޕީއެސްއެމްއާ ހަވާލުވިއިރު ބެލުންތެރިން ވަރަށް އެދުނު އެ ހަނދާނުގައި ޝޯ އަލުން ގެނެސްދިނުމަށް. އަޅުގަނޑަށް މަޢުލޫމާތު ލިބޭ ގޮތުގައި މި ޝޯ މި ބޭއްވެނީ 7 އަހަރުގެ މެދުކެނޑުމަކަށްފަހު. މިފަހަރުގެ ޝޯ ވަރަށް ތަފާތުވާނެ." ޒީނާ ވިދާޅުވިއެވެ.

އެއްބަސްވުމުގައި ސޮއިކުރުމަށްފަހު ބައެއް ފަންނާނުން ވެސް ވަނީ ޕީއެސްއެމް ނިއުސްއާ ވާހަކަދައްކާފައެވެ. އެގޮތުން ފަންނާނުން ބުނީ ތަފާތު ލަވަތަކެއް މިފަހަރުގެ ޝޯގައި ފެންނާނެ ކަމަށެވެ. އަދި ކުރީގެ ލަވަތަކުގެ ހަނދާން މިޝޯގައި އައު ވެގެންދާނެކަމަށް ފަންނާނުން ބުންޏެވެ.

"އެ ހަނދާނުގައި" މިއަހަރު ބާއްވަނީ 7 އަހަރުގެ މެދުކެނޑުމަކަށް ފަހު ކަމަށެވެ. އެންމެ ފަހުން މި ޕްރޮގުރާމު ބޭއްވީ 2016 ވަނަ އަހަރުއެވެ.

"އެ ހަނދާނުގައި" ޕްރޮގުރާމުގެ މިއަހަރުގެ ޕްރޮޑިއުސަރ ލީނާ އަޙްމަދު ބުނީ މިޝޯ އެހެން އަހަރުތަކާ ތަފާތުވާނެ ކަމަށެވެ. މިފަހަރު މިޕްރޮގްރާމުގެ 5 އެޕިސޯޑު ހިމެނޭއިރު ކޮންމެ އެޕިސޯޑެއް ޚާއްސަކުރާނީ ވަކި ފަންނާނަކަށް ކަމަށާއި، އެއެޕިސޯޑެއްގައި ލަވަ ކިޔާނީ އެ އެޕިސޯޑެއް ޚާއްސަކުރެވޭ ފަންނާނުކަމަށެވެ. އަދި ފަންނާނާއެކު އިތުރު ލަވަ ކިޔުންތެރިން ފެންނާނެކަމަށާއި ފަންނާނުންގެ ސޯލޯ ލަވަތައްވެސް ފެންނާނެކަމަށެވެ.

މިއަހަރުގެ "އެހަނދާނުގައި" އެޕިސޯޑުތައް ޚާއްސަކުރެވޭ 5 ފަންނާނުންނަކީ މެޒޯ މުޙައްމަދު، އައްފާން، އީސާ، އިނާޔާ އަދި ފަސީއެވެ.

"އެ ހަނދާނުގައި" ޕްރޮގުރާމު އެންމެ ފުރަތަމަ ފަހަރަށް ބޭއްވީ 2004ވަނަ އަހަރުގެ ރަމަޟާން މަހުގައެވެ.