ރާއްޖޭގައި ކާމިޔާބުކަމާއެކު ފުރަތަމަ ފަހަރަށް ރެޓިނަލް ޑިޓޭޗްމަންޓް ސާޖަރީއެއް ހަދައިފި

ރެޓިނަލް ޑިޓޭޗްމަންޓް ސާޖަރީ ފުރަތަމަ ފަހަރަށް ރާއްޖޭގައި ކާމިޔާބުކަމާއެކު ހަދައިފިއެވެ. މި ސާޖަރީ ހަދާފައިވަނީ އައިކެއަރ ހޮސްޕިޓަލުގެ ޑޮކްޓަރުންގެ ޓީމަކުންނެވެ.

ރެޓިނަލް ޑިޓެޗްމެންޓް މައްސަލަ އާންމުކޮށް ދިމާވަނީ އުމުރުން ދުވަސްވުމުން އަންނަ ބަދަލުތަކާ އެކު ލޮލުގެ ރެޓިނާއަށް ކުދި ގެއްލުންތައްވެ، ފަރުވާ ނުދެވި ހުރުމުން ކަމަށާއި އޭގެ ސަބަބުން ލޮލުގެ ފެނުން ގެއްލުމަށް މަގުފަހިވާ ކަމަށް އައިކެއަރއިން ހާމަކުރެއެވެ.

ރެޓިނަލް ޑިޓޭޗްމަންޓް މައްސަލަ ދިމާވަނީ ލޮލުގެ ރެޓީނާ ނަމަކަށްކިޔާ ޓިޝޫ ލޭޔަރ، އެއޮންނަންވާ ތަން ނޫން އެހެން ތަނަކަށް ބަދަލުވުމުން ނުވަތަ ޑިސްލޮކޭޓް ވުމުންނެވެ. މިސާޖަރީގައި ލޮލުގެ އެތެރޭގައި ހުންނަ ޖެލް ފަދަ މާއްދާއެއް ކަމަށްވާ ޕެތަލޮޖިކަލް ވިޓްރިއަސް ހިއުމާ މުޅިން ނަގައި، ސިލިކަން އޮއިލްއާއި ޒަމާނީ އެންޑޯ ލޭޒާ ޓެކްނޮލޮޖީގެ އެހީގައި ރެޓިނާ އާންމު ހާލަތަށް ގެނެވެއެވެ.
މިސާޖަރީއަށްފަހު ސިލިކަން އޮއިލް ސާފުކުރަނީ ސާޖަރީއަށް ތިން މަސް ވުމުންނެވެ.

އައިކެއަރިއިން މި ސާޖަރީ ކޮށްފައިވަނީ 75 އަހަރުގެ އަންހެނެއްގެއެވެ. އޭނާ އައިކެއަރއަށް ދެއްކީ ލޮލުގެ ފެނުމުގެ މައްސަލަ ދިމާވާތީއެވެ. އައިކެއަރއިން ބުނީ ސާޖަރީއަށްފަހު އަންހެން މީހާގެ ފެނުން ވަރަށް ބޮޑަށް ރަނގަޅުވިކަމަށެވެ.

އައި ކެއަރއިން ބުނީ ސާޖަރީ ހަދާފައިވަނީ ޑރ. މުޙައްމަދު އައްޒާމްގެ ބެލުމުގެ ދަށުން މިދިޔަ ފެބްރުއަރީ މަހުގެ 19 ވަނަ ދުވަހު ކަމަށެވެ. އަދި މިއީ މިފަދަ ސާޖަރީއެއް ރާއްޖޭގައި ކުރެވުނު ފުރަތަމަ ފަހަރު ކަމަށާއި، މިސަރޖަރީ ކާމިޔާބުކަމާއެކު ކުރެވުމަކީ ޞިއްޙީ ދާއިރާއަށާއި ރާއްޖޭގައި ލޮލަށް ދެވޭ ފަރުވާގެ ދާއިރާއަށް ލިބުނު ބޮޑު ކުރިއެރުމެއް ކަމަށް އައި ކެއަރއިން ހާމަކުރެއެވެ.

ރެޓިނަލް ޑިޓޭޗްމަންޓް އަލާމާތްތަކުގެ ތެރޭގައި ލޮލުގެ ފެނުމަށް ކަޅު ތިއްކާއި ރޮނގު ފެނުމާއި ކަޅު ހިޔަންޏެއް ލޮލުގެ މެދުން ނުވަތަ އެއް ފަޅިއަކަށް އެޅިފައިވުން ހިމެނެއެވެ. ރެޓިނަލް ޑިޓޭޗްމަންޓްގެ އަލާމާތްތައް ފެންނަ ނަމަ އަވަހަށް ޑޮކްޓަރަކަށް ދައްކާ ފަރުވާ ހޯދުން މުހިންމުކަމަށް އައިކެއަރއިން ބުނެއެވެ.