އެއިޓީން ތަރޓީ ވިމެންސް ފުޓްސަލް ފިއެސްޓާގެ ޗެމްޕިއަންކަން ކްލަބް އިމިގްރޭޝަން ހޯދައިފިއެވެ. ޓީމް ފެނަކައާ ވާދަކޮށް ފައިނަލް މެޗް އިމިގްރޭޝަން ކާމިޔާބުކުރީ އަށްލަނޑު ތިންލަނޑުންނެވެ.
މެޗްގައި އިމިގްރޭޝަނުން ވަނީ މޮޅު ކުޅުމެއް ދައްކާފައެވެ. މިއީ ކްލަބް އިމިގްރޭޝަން ޖެހިޖެހިގެން މިމުބާރާތް ކާމިޔާބުކުރި ދެވަނަ ފަހަރެވެ. މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އިމިގްރޭޝަންގެ ބިދޭސީ ކުޅުންތެރިޔާ ސިމާނީއެވެ. އެންމެ މޮޅު ކޯޗަކަށް ފެނަކަ ޓީމްގެ އިބްރާހިމް ނަބީލް ހޮވުނުއިރު، ފެއާ ޕްލޭ ޓީމަކަސް ހޮވުނީ ޓީމް ފެނަކައެވެ. އަދި އެންމެ ރަނގަޅު ސަޕޯޓެއް ކުރި ޓީމަކަށް ހޮވުނީވެސް ޓީމް ފެނަކައެވެ.
މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ ކްލަބް އިމިގްރޭޝަންގެ ބިދޭސީ ދެކުޅުންތެރިން ކަމަށްވާ ރާނީ އަދި ސިމާނީ، ސިފައިންގެ ކްލަބްގެ ބިދޭސީ ކުޅުންތެރިޔާ ސަބީނާ، ޓީމް ފެނަކައިގެ ބިދޭސީ ކުޅުންތެރިޔާ ޖިރަޕްރާޕާ އަދި ޝަހުލާ ތަޢުފީޤެވެ. ގަދަ ފަސް ކުޅުންތެރިންގެ ތެރޭގައި ހިމެނުނު ހަމައެކަނި ދިވެހި ކުޅުންތެރިއަކީ ޝަހުލާއެވެ.