5 އަހަރަށްފަހު އައިޖީއެމްއެޗް މިސްކިތް އަލުން ހުޅުވައިފި
-
ހޮސްޕިޓަލުން ޚިދުމަތް ހޯދާ ފަރާތްތަކަށް ހިތްހަމަޖެހުން ލިބޭނެ
-
މިސްކިތް ބަންދުކުރީ 2019 ވަނަ އަހަރު
-
އެކަށޭނަ ނަމާދުކުރެވޭނެ ތަނެއް ޤާއިމްކުރުމަކީ ރައީސްގެ އިރުޝާދެއް
-
މިސްކިތުގައި 100އަށްވުރެ ގިނަ މީހުންނަށް ނަމާދުކުރެވޭނެ
5 އަހަރަށްފަހު އައިޖީއެމްއެޗް މިސްކިތް އަލުން ހުޅުވައިފިއެވެ.
މި މިސްކިތް ހުޅުއްވާދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި ޞިއްޙަތާ ބެހޭ ވަޒީރު ޑރ. ޢަބްދުﷲ ޙަލީލެވެ.
މިސްކިތް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް ޢަލީ ސަޢީދު ވިދާޅުވީ ހޮސްޕިޓަލެއްގައި މިސްކިތެއް ހުރުމަކީ ހޮސްޕިޓަލުން ޚިދުމަތް ހޯދާ ފަރާތްތަކަށާއި ބަލި މީހުންގެ އެހީތެރިންނަށް ލިބޭނެ ބޮޑު ހިތްހަމަޖެހުމަކަށް ވާނެ ކަމަށެވެ. އަދި ހޮސްޕިޓަލުގައި ތިބެ މިސްކިތެއްގައި ނަމާދުކުރެވޭ ގޮތް ވުމަކީ ބަލި މީހުންނަށާއި އެހީތެރިންނަށް މަޢުނަވީ ގޮތުންނާއި ރޫޙާނީ ގޮތުން ބޮޑު ހިތްހަމަޖެހުމަކާއި ބަލިން ރަނގަޅުވުމުގެ އުންމީދު ލިބޭނެ ކަމެއް ކަމަށް ވަޒީރު ވިދާޅުވިއެވެ.
"މިސްކިތުގައި އިނދެގެން ދުޢާކުރީމަ އެލިބޭ ހިތްހަމަޖެހުމާއި މަޢުނަވީ ރޫޙާނީ ސަޕޯޓަކީ ވަރަށް މުހިންމު އެއްޗެއް. މި މިސްކިތް އެޅުމަށް މެނޭޖްމަންޓުން ނިންމި ނިންމުމަކީ ޚިދުމަތް ހޯދާ ބަލި މީހުންނާއި ބަލި މީހުންގެ އެހީތެރިންނަށްޓަކައި ވަރަށް ރަނގަޅު ނިންމުމެއް." އިސްލާމީ ކަންތައްތަކާ ބެހޭ ވަޒީރު ވިދާޅުވިއެވެ.
އިސްލާމީ ކަންތައްތަކާ ބެހޭ ވަޒީރު ވަނީ ގިނަ އަދަދެއްގެ ބަޔަކު ޚިދުމަތް ހޯދަމުންދާ ހޮސްޕިޓަލެއްގައި މިފަދަ މިސްކިތެއް ހުޅުވުމަށް އިސްނަގައިގެން އަމިއްލައަށް މަސައްކަތްކުރުމުން އައިޖީއެމްއެޗްގެ މެނޭޖްމަންޓަށާއި މިސްކިތް ހެދުމަށް މާލީގޮތުންނާއި ޢަމަލީ ގޮތުން އެހީތެރިކަން
ފޯރުކޮށްދިން ހުރިހާ ފަރާތްތަކަށް ޝުކުރު އަދާކުރައްވާފައެވެ.
މިރަސްމިއްޔާތުގައި ވާހަކަދައްކަވަމުން އައިޖީއެމްއެޗްގެ ސީއީއޯ އިބްރާހިމް ޢަބްދުއްރައްޒާޤް ހަލީމް ވިދާޅުވީ މިސްކިތް ބަންދުކޮށްފައިވަނީ 2019 ވަނަ އަހަރުގެ ރަމަޟާން މަހުގެ ފަހުން ކަމަށާއި މިސްކިތް އަލުން ހުޅުވާލުމަށް ނިންމީ ރައީސުލްޖުމްހޫރިއްޔާގެ ޚާއްސަ އިރުޝާދުގެ ދަށުން ކަމަށެވެ. އެގޮތުން އައިޖީއެމްއެޗް ފަދަ ގިނަ ބަޔަކު ޒިޔާރަތްކޮށް ޚިދުމަތް ހޯދާ ހޮސްޕިޓަލެއްގައި އެކަށޭނަ ނަމާދުކުރެވޭނެ ނިޒާމެއް ޤާއިމްކޮށްދިނުމަށް ރައީސުލްޖުމްހޫރިއްޔާ އެދިވަޑައިގެންނެވި ކަމަށް އިބްރާހިމް ޢަބްދުއްރައްޒާޤް ޙަލީމް ވިދާޅުވިއެވެ.
"އައިޖީއެމްއެޗްގައި ނަމާދުކުރެވޭނެ އެކަށޭނަ ތަނެއް ޤާއިމްކުރުމަކީ ރައީސް އަޅުގަނޑަށް ދެއްވި އިރުޝާދެއް. މިތަން ބޭނުންކުރަމުން ދިޔައީ ޖަންކް ޔާރޑެއްގެ ގޮތުގައި. އަޅުގަނޑުމެން ނިންމީ މިތަން ރޯދަމަސް އައުމުގެ ކުރިން ނަމާދުކުރެވޭނެ މިސްކިތެއް މިތަނުގައި ޤާއިމްކުރަން." އިބްރާހިމް ޢަބްދުއްރައްޒާޤް ޙަލީމް ވިދާޅުވިއެވެ.
އިބްރާހިމް ޢަބްދުއްރައްޒާޤް ޙަލީމް ވިދާޅުވީ މިސްކިތް އެޅުމަށް ގިނަ ބަޔެއްގެ އެހީތެރިކަން މާލީ ގޮތުންނާއި ޢަމަލީ ގޮތުން ލިބުނު ކަމަށެވެ. އަދި މިސްކިތް އެޅުމަށް އެއްވެސް ވަރަކަށް އައިޖީއެމްއެޗްގެ ފަންޑުން ޚަރަދުކޮށްފައިނުވާކަން ޙަލީމް ފާހަގަކުރެއްވިއެވެ.
އައިޖީއެމްއެޗް މިސްކިތުގައި އެއް ފަހަރާ 100އަށްވުރެ ގިނަ މީހުންނަށް ނަމާދުކުރެވޭނެއެވެ. މި މިސްކިތުގައި ވުޟޫކުރުމަށާއި ނަމާދުކުރުމަށް ފިރިހެނުންނަށާއި އަންހެނުންނަށް ވަކިން ބައެއް
ހަދާފައިވެއެވެ. މި މިސްކިތުގައި ކުރިއަށް އޮތް ރަމަޟާން މަހު ތަރާވީޙު ނަމާދުކުރެވޭނެ ކަމަށްވެސް އައިޖީއެމްއެޗުން ވިދާޅުވެއެވެ.