ޙަޤީޤަތެއް ނެތް ދޮގުވާހަކަތަކުން މުޖުތަމަޢު ކިލަނބު ނުކުރުމަށް ރައީސް އެދިވަޑައިގެންފި

ރަމަޟާން މަހަކީ ހުރިހާ ގޮތަކުން ވެސް ހެޔޮކަމުގެ މައްސަރަކަށްވާތީ ޙަޤީޤަތެއް ނެތް ދޮގުވާހަކަތަކުން މުޖުތަމަޢު ކިލަނބުނުކޮށް އަމިއްލަ ނަފުސު އިޞްލާޙުކުރެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ނަސޭހަތްތެރިވެވަޑައިގެންފިއެވެ.

ރައީސުލްޖުމްހޫރިއްޔާ މިކަމަށް ނަސޭހަތްތެރިވެވަޑައިގެންނެވީ 1445 ވަނަ އަހަރުގެ ރަމަޟާން މަސް ފެށުމުގެ މުނާސަބަތުގައި ފޮނުއްވި ތަހުނިޔާގެ ޚިޠާބުގައެވެ.

ރައީސުލްޖުމްހޫރިއްޔާގެ ޚިޠާބުގައި ރަމަޟާން މަހަކީ ދީނީ ގޮތުންނާއި ތާރީޚީ ގޮތުން ވަރަށް ޚާއްސަ މަހެއް ކަމަށެވެ. އަދި ރަމަޟާން މަހަކީ ރަޙްމަތާއި ބަރަކާތުގެ މައްސަރުކަމަށާއި، ރުއްސެވުމާއި ފުއްސެވުމުގެ މޫސުން ކަމަށް ބަޔާންކުރައްވަމުން މިބަރަކާތްތެރި ރަމަޟާން މަހުގެ ތަހުނިޔާއާއި ހެޔޮ އެދުންތައް ރާއްޖޭގެ ރައްޔިތުންނަށް އަރިސްކުރައްވާފައިވެއެވެ.

ރައީސް ވިދާޅުވީ ރަމަޟާން މަހަކީ ހުރިހާ ގޮތަކުން ވެސް ހެޔޮކަމުގެ މައްސަރަކަށްވާތީ އެކަކު އަނެކަކަށް ހެޔޮ ފޯރުވުމުގެ އާދަ އަޅުގަނޑުމެންގެ ކިބައިގައި ހަރުލައްވަން ޖެހޭ ކަމަށެވެ. އެގޮތުން ސަރުކާރުން ރައްޔިތުންނަށް ހެޔޮ ފޯރުވަންޖެހޭކަމަށާއި ރައްޔިތުންގެ އެއްބާރުލުން ސަރުކާރަށް ބޭނުންވާކަމަށް ވިދާޅުވިއެވެ. އަދި ދިވެހި ކޮންމެ ރައްޔިތެއް ވެސް އެކަކު އަނެކަކަށް އިޙްސާންތެރިވެ މަދަދުވެރިވާންޖެހޭކަމަށާއި މިގޮތުން ދޭދޭ ހުރިހާ ގުޅުންތަކެއްގައި ހެޔޮ ފޯރުވުމުގެ ސިފަ އަށަގެންނެވުން މުހިންމުކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ޚިޠާބުގައި ވިދާޅުވީ މިކަމުގައި ސަރުކާރުން އިސްވެ ނަމޫނާ ދެއްކެވޭތޯ ބެއްލެވިކަމަށެވެ. އެގޮތުން މަސްވެރީން ކިރުވި މަހަށް ފައިސާ ނުލިބުމުގެ ހިތްދަތި މައްސަލަ ރޯދައަށް ޙައްލުކޮށްދެއްވައި، އެކިއެކި ކުއްލި ޙާލަތުގައި ވައިގެ މަގުން ބަލި މީހުން އުފުލުމުގައި ދިމާވާ ދަތިތައް ވެސް ރޯދައިގެ ކުރިން ޙައްލުކޮށްދެވުނު ކަމަށް ވިދާޅުވިއެވެ. އަދި މަގުމަތީގެ ތޮއްޖެހުން ކުޑަކުރުމަށް ވެސް ފިޔަވަޅުތަކެއް އަޅުއްވާފައިވާ ކަމަށާއި، ކޮންމެ ގޭ ބިސީއަކަށް ސަރުކާރުގެ ފަރާތުން ހަދިޔާއެއް ދިނުމުގެ އިތުރުން ބަރަކާތްތެރި ރަމަޟާން މަހަކީ ޚާއްޞަކޮށް އަޅުކަމުގެ މައްސަރެއްކަމަށް ވީތީ، ރަމަޟާން މަހުގެ ފަހު ދިހަ އަޅުކަމަށް ޚާއްޞަކުރެެއްވުމުގެ ގޮތުން އޮފީސްތައް ބަންދު ދުވަސްތަކެއް ކަމަށް ހަމަޖައްސަވާފައިވާކަން ރައީސް ފާހަގަކުރެއްވިއެވެ.

ރައީސް ވިދާޅުވީ ރަމަޟާންމަހަކީ މާޒީއަށް ބަލާއިރު އެކަކު އަނެކަކަށް އެހީތެރިވުމުގައި ދިވެހިން ނަމޫނާ ދައްކާފައިވާ މައްސަރެއް ކަމަށެވެ. އެގޮތުން ރަމަޟާންމަހަށް ގޭގެ ފަންގިފިލާ މަރާމާތުކުރުޟާއި، ރަށުތެރެ ސާފުފުކުރުމާއި މައިޒާންތައް ހެދުންފަދަ ކަންކަން ކުރަނި އެންމެން ގުޅިގެންކަން ފާހަގަކުރެއްވިއެވެ. އަދި ރޯދަވީއްލަން މިސްކިތްތަކަށް ތަކެތި ތައްޔާރުކޮށް ގެންދިއުމާއި، ތައްޔާރުކުރެވޭ ކާ ތަކެތި އެއްގެއިން އަނެއްގެއަށް ގެންގޮސް ދިނުން ފަދަ ރީތި އިޖުތިމާޢީ ސިފަތައް ދިވެހީންގެ މާޒީން ފެނިފައިވާކަން ރައީސް ފާހަގަކުރެއްވިއެވެ. އިސްލާމްދީން މުސްލިމުންނަށް ދަސްކޮށްދެނީ މިފަދަ ރީތި އަޚްލާޤުކަމަށް ރައީސް ވިދާޅުވިއެވެ.

މިއަހަރުގެ ރަމަޟާންމަހާ ގުޅިގެން ދެއްވި ޚިޠާބުގައި ފަލަސްޠީނުގެ މުސްލިމް އަޚުންނާއި އުޚްތުންގެ ޙާލަށް ރައީސް ވަނީ އަލިއަޅުވާލައްވާފައެވެ. އެގޮތުން ފަލަޞްޠީނުގެ ބިމުގައި ހަނގުރާމައާއި ބިރުވެރިކަމާއި ހައިހޫނުކަމުގައި ގެދޮރާ ޢާއިލާގެއްލި ބިކަވުމުގެ ޙާލަތު ކުރިމަތިވެފައިވާ މުސްލިމް އަޚުންނާއި އުޚްތުންގެ މަތިން ހަނދާންކުރަންޖެހޭ ކަމަށެވެ. އަދި އިސްލާމްދީނާ މިނިވަންކަމުގެ ޙައްޤުގައި ފަލަޞްޠީނުގެ އަހުލުވެރީން ކުރަމުންދާ ޖިހާދަށް ނަޞްރުދެއްވައި އަނިޔާވެރީންގެ ކެހިވެރިކަމުން މިންޖުކުރެއްވުމަށްއެދު ދުޢާ ކުރަންޖެހޭކަމަށް ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ޚިޠާބުގައިވަނީ ދިވެހީންނަކީ އެއް އާއިލާއެއްކަމަށާއި، އެއް ދީނެއްގައި ތިބި އެއް ޤައުމެއްގެ އަޚުންނާއި އުޚުތުންކަން އިޙްސާސްކުރެއްވުމަށާއި ދޭދޭ ގުޅުން ބަދަހިކުރެއްވުމަށް އިލްތިމާސްކުރައްވާފައެވެ. އަދި ހެޔޮކަމުގެ މިމޫސުމުގައި ރީތި ހިމޭން ބަސްމަގުން ތެދުބަހުން މީހުންނާ މުޢާމަލާތުކުރުމަށާއި، ޙަޤީޤަތެއް ނެތް ދޮގުވާހަކަތަކުން މުޖުތަމަޢު ކިލަނބު ނުކުރުމަށާއި އަމިއްލަ ނަފުސާ މެދު އިތުރަށް ވިސްނައިވަޑައިގެން އިޞްލާޙުކުރެއްވުމަށްވެސް އިލްތިމާސްކުރައްވާފައެވެ.