"ވަން ގަވް" މެދުވެރިކޮށް ޚިދުމަތްދޭން ފެށި ސަރުކާރުގެ ފުރަތަމަ ކުންފުންޏަކަށް ބީސީސީ

ބިޒްނަސް ސެންޓަރ ކޯޕަރޭޝަން، ބީސީސީން ފޯރުކޮށްދޭ ބައެއް ޚިދުމަތްތައް ވަން ގަވް މެދުވެރިކޮށް ދޭން ފަށައިފިއެވެ. ވަންގަވް އަކީ ސަރުކާރުގެ އެކި ވުޒާރާތަކާއި ކުންފުނިތަކުން ޚިދުމަތް ހޯދާ ފަރާތްތަކަށް ފަސޭހައިން ޚިދުމަތް ލިބޭނެ މަގު ފަހިކޮށްދިނުމަށް ޤާއިމް ކޮށްފައިވާ ޑިޖިޓަލް ޕްލެޓްފޯމެކެވެ. މި ޕްލެޓްފޯމުން ޚިދުމަތް ދޭނީ އީފާސް އެކައުންޓް މެދުވެރިކޮށެވެ.

ޓްރޭޑްނެޓްގައި މިއަދު ހެނދުނު ބޭއްވި ރަސްމިއްޔާތެއްގައި ބީސީސީން ވަންގަވް މެދުވެރިކޮށް ފޯރުކޮށްދޭނެ ޚިދުމަތްތައް އިފްތިތާޙްކޮށްދެއްވީ ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު މުޙައްމަދެވެ.

މިރަސްމިއްޔާތުގައި ވާހަކަ ދައްކަވަމުން ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު ވިދާޅުވީ ބީސީސީން ވަންގަވް މެދުވެރިކޮށް ގޭގައި ކާބޯތަކެތި އުފައްދައި ބަންދުކުރާ ވިޔަފާރިތަކަށް ފަސޭހަކަމާއެކު ދަފްތަރު ވެވޭނެ އިންތިޒާމް ހަމަޖައްސާފައިވާ ކަމަށެވެ. ހަމައެއާއެކު، ކުރިއަށް އޮތް ތަނުގައި ބީސީސީން ފޯރުކޮށްދޭ މައިގަނޑު ޚިދުމަތްތައް ވަންގަވް މެދުވެރިކޮށް ލިބޭނެ އިންތިޒާމް ހަމަޖެހިގެން ދާނެ ކަމަށް ޒިޔާއު ވިދާޅުވިއެވެ. އަދި މިއީ ކުދި ވިޔަފާރިތަކަށް ބީސީސީން ފޯރުކޮށްދޭ ޚިދުމަތްތައް ހޯދުމަށް ފަސޭހަ ވެގެންދާނެ ކަމެއް ކަންވެސް ޒިޔާއު ވަނީ ފާހަގަކުރައްވާފައެވެ.

މި ރަސްމިއްޔާތުގައި ވާހަކަ ދައްކަވަމުން ޓްރޭޑްނެޓްގެ މެނޭޖިންގ ޑިރެކްޓަރ ސަޢީދާ ޢުމަރު ވިދާޅުވީ، ސަރުކާރުގެ އިތުރު ކުންފުނިތަކުން ވަންގަވް މެދުވެރިކޮށް ޚިދުމަތްދޭން ފެށުމަކީ ރައްޔިތުންނަށް ޚިދުމަތް ހޯދުމަށް ފަސޭހަވާނެ ކަމެއްކަމަށެވެ. އަދި ބީސީސީން މިކަމުގައި އިސްނެންގެވިކަން ސަޢީދާ ވަނީ ފާހަގަކުރައްވާފައެވެ.

ބީސީސީން ވަންގަވް މެދުވެރިކޮށް ޚިދުމަތްދޭން ފަށާފައި މިވަނީ، ސަރުކާރުގެ ވުޒާރާތަކާއި ކުންފުނިތައް މެދުވެރިކޮށް އާންމުންނަށް ފޯރުކޮށްދޭ ޚިދުމަތްތަކަކީ ފަސޭހައިން ލިބޭނެ ޚިދުމަތްތަކަކަށް ހެދުމަށް ސަރުކާރުން ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުންކަމަށް އެކޯޕަރޭޝަނުން ބުނެއެވެ.