ޣައްޒާގައި އެހީއަށް މަޑުކޮށްގެން ތިބި ބަޔަކަށް ޙަމަލާދީ ގިނަ ޢަދަދެއްގެ ބަޔަކު ޝަހީދުކޮށްލައިފި

ޣައްޒާގައި ކާބޯތަކެއްޗާއި އިންސާނީ އެހީގެ ސާމާނު ހޯދުމަށް މަޑުކޮށްގެން ތިބި ފަލަސްޠީނުގެ މުސްލިމުންގެ ބަޔަކަށް ޔަހޫދީ ފައުޖުގެ ޖައްބާރު ސިފައިން ޙަމަލާތަކެއްދީ އޭގެ ތެރެއިން 29 މީހުން ޝަހީދު ކޮށްލައިފިއެވެ. ޣައްޒާގައި އެހީ ހޯދުމަށް ގިނަ ޢަދަދެއްގެ ބަޔަކު މަޑުކޮށްގެން ތިބި ސަރަޙައްދަކަށް ޔަހޫދީ ފައުޖުގެ ސިފައިން ދެ ފަހަރެއްގެ މަތިން ޙަމަލާ ދީފައިވާ ކަމުގައި އެ ސަހަރުގައި ވެރިކަން ކުރާ ޙަމާސް ޖަމާޢަތުން ހާމަ ކުރިއެވެ. މި ޙަމަލާތަކުގައި 120އަށް ވުރެ ގިނަ މީހުން ޒަޚަމު ކޮށްލިއެވެ.

ޔަހޫދީ ފައުޖުން ޙަމަލާ ދީފައި ވަނީ ޣައްޒާގެ މެދުތެރޭގައި އޮންނަ އަލް-ނުޞަޔިރާތު ރެފިއުޖީ ކޭމްޕު ކައިރީގައި ތިބި ބަޔަކަށެވެ. އެ މީހުން ތިބީ, ކާބޯތަކެއްޗާއި އިންސާނީ އެހީގެ ސާމާނު ބެހުމުގެ މަސައްކަތް ކުރިއަށް ދިޔަ ސަރަޙައްދެއްގައި, އެހީގެ އިންތިޒާރުގައެވެ. ޔަހޫދީ ފައުޖުން ވަނީ އެ މީހުން ތިބި ސަރަޙައްދަށް ވައިގެ ޙަމަލާއެއް ދީ, އަށް މީހުން ޝަހީދު ކޮށްލާފައެވެ.

އެއަށްފަހު, ޔަހޫދީ ފައުޖުގެ ސިފައިން ވަނީ އެ ތަނުގައި ތިބި ޢާންމުންގެ ތެރެއަށް ބަޑިޖަހައި, އިތުރު 21 މީހުން ޝަހީދު ކޮށްލާފައެވެ. ނުޞަޔިރާތު ރެފިއުޖީ ކޭމްޕު ކައިރީގައި ދީފައިވާ ރަޙުމު ކުޑަ ޙަމަލާތަކުން ބަރިއްޔަވާން ޔަހޫދީން ވަނީ މަސައްކަތް ކޮށްފައެވެ. އަދި, އެ ސަރަޙައްދުގައި ތިބި ޢާންމުންނަށް ޙަމަލާ ދީފައިވާ ކަމަށް ކުރާ ތުހުމަތު ދޮގު ކުރުމުގެ ގޮތުން އޮޅުވައިލަން މަސައްކަތް ކޮށްފައެވެ.

މިއީ, ކާބޯތަކެއްޗާއި އެހީގެ އިންތިޒާރުގައި ތިބި ޣައްޒާގެ ހާލުގައި ޖެހިފައިވާ ރައްޔިތުންނަށް ޔަހޫދީ ފައުޖުގެ ޖައްބާރު ސިފައިން މި ފަދަ ޙަމަލާތަކެއް ދީފައިވާ ފުރަތަމަ ފަހަރެއް ނޫނެވެ. އޮކްޓޫބަރު 7ން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެން ޣައްޒާގެ 2.3 މިލިޔަން މީހުންގެ އާބާދީގެ ބޮޑު އިންސައްތައެއް ވަނީ ހާލުގައި ޖެހިފައެވެ. އަދި, އޭގެ ތެރެެއިން 80 އިންސައްތަ މީހުން ވަނީ ގެދޮރު ނެތިފައެވެ. ޣައްޒާގެ ރައްޔިތުންގެ ތެރެއިން 576,000 މީހުން މި ވަގުތު ހައިހޫނުކަމާ ހަނގުރާމަ ކުރަމުންދާ ކަމުގައި އދއިން ބުނެއެވެ.

ފެބުރުވަރީ 29 ވަނަ ދުވަހު ވެސް ޔަހޫދީ ފައުޖުން ވަނީ ޣައްޒާ ސިޓީގައި އިންސާނީ އެހީ ހޯދަން ޖަމާވެފައި ތިބި ޢާންމު ރައްޔިތުންނަށް ރަޙުމު ކުޑަ ޙަމަލާތަކެއްދީ އޭގެ ތެރެއިން 100އަށްވުރެ ގިނަ މީހުން ޝަހީދު ކޮށްލާފައެވެ. އެ ފަހަރުގެ ހާދިސާއިން ބަރިއްޔަވާން ވެސް ޔަހީދުން ވަނީ މަސައްކަތް ކޮށްފައެވެ. އަދި, ފަލަސްޠީނުގެ ރައްޔިތުން މަރުވީ ތޮއްޖެހުން ކަމަށް ބުނެ, ދޮގު މަޢުލޫމާތު ފަތުރާފައެވެ.

ޣައްޒާގެ މެދުތެރޭގައި އޮންނަ ދީރް އަލް-ބަލަޙަށް ވެސް ޔަހޫދީ ފައުޖުގެ ސިފައިން ވަނީ ރަޙުމު ކުޑަ ޙަމަލާތަކެއް ދީފައެވެ. މީގެ ތެރެއިން އެއް ޙަމަލާ އަމާޒު ކޮށްފައި ވަނީ ޢާންމު ދިރިއުޅޭ ޢިމާރާތަކަށެވެ. އެ ޙަމަލާގައި އެ ގޭގައި ދިރިއުޅޭ ޢާއިލާގެ ނުވަ މެންބަރުން ޝަހީދު ކޮށްލާފައިވާ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ހާމަކުރިއެވެ. މީގެ އިތުރުން, ޣައްޒާގެ އެންމެ ދެކުނުގައި އޮތް ރަފަޙަށް ވެސް ޔަހޫދީ ފައުޖުން ވަނީ ބޮން އަޅާފައެވެ.

އޮކްޓޫބަރު 7ން ފެށިގެން ޣައްޒާގައި ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 31,341އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭ ކަމުގައި އެމެރިކާގެ ދިފާޢީ ވަޒީރު ލޮއިޑް އޮސްޓިން ދާދިފަހުން ވިދާޅުވެފައިވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 73,134އަށް އުފުލިފައެވެ.