ހުޅުމާލޭގެ އެކި ސަރަޙައްދުގައި ކެމްޕެއިން މެޓީރިއަލްތައް ހަރުކުރުމުގެ ކުރިން އެޗްޑީސީގެ ހުއްދަ ހޯދަން އެދިއްޖެ

އާންމު އިންތިޚާބުތަކާއި ގުޅިގެން ކެމްޕެއިން ބެނާއާއި ކެންވަސް ފަދަ މެޓީރިއަލް ހުޅުމާލޭގެ އެކި ސަރަޙައްދުތަކުގައި ހަރުކުރުމުގެ ކުރިން ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީގެ ހުއްދަ ހޯދުމަށް އެކޯރޕަރޭޝަނުން އެދިއްޖެއެވެ.

ރައްޔިތުންގެ މަޖިލީހުގެ އިންތިޚާބާ ގުޅިގެން ކެމްޕެއިން ކުރުމަށް ހުޅުމާލޭ ފޭސް އެކެއް އަދި ދޭއްގެ އެކި ސަރަހައްދުތަކުގައި ދަނީ ގިނަ އަދަދެއްގެ ބެނާރ އާއި ކެންވަސް ފަދަ ތަކެތި ހަރުކުރަމުންނެވެ. މިގޮތަށް ބެނާރތައް ހަރުކުރަމުންދާއިރު އެ ސަރަހައްދުތަކުގައި އާންމު ޚިދުމަތްތައް ފޯރުކޮށްދިނުމަށް ސާވިސް ޕްރޮވައިޑަރ އިން އަޅާފައިވާ ނެޓްވާކްތަކަށް ގެއްލުން ނުވާނެހެން، އެ މަސައްކަތްތައް ކުރިއަށް ގެންދިއުމަށް އެޗްޑީސީ އިން ވިދާޅުވިއެވެ.

އެޗްޑީސީ އިން ބުނީ ޕޯސްޓަރތަކާއި ބެނާތައް ހަރުކުރެވޭ ސަރަޙައްދުގެ ގޮތުން، ކަރަންޓް ކޭބަލްއާއި ފެނާއި ނަރުދަމާގެ ނިޒާމަށް ގެއްލުންތަކެއް ލިބިދާނެ ކަމަށެވެ. އެހެންކަމުން، ޚިދުމަތް މެދުކެޑޭނެ ފަދަ ޙާލަތެއް ދިމާވެއްޖެނަމަ، އެކަމުގެ ސަބަބުން އެ ސަރަޙައްދުގައި ދިރިއުޅޭ ރައްޔިތުންނަށް ގިނަ އުނދަގޫތަކަކާއި ކުރިމަތިލާން ޖެހޭނެކަމަށް އެ ކޯރޕަރޭޝަނުން ބުނެއެވެ.

މިފަދަ ކަންކަމުން ރައްކާތެރިވުމުގެ ގޮތުން، ޕޯސްޓަރ ހަރުކުރުމުގެ ކުރިން އެޗް.ޑީ.ސީގެ ލަފަޔާއި އިރުޝާދު ހޯދުމަށް އެ ކޯރޕަރޭޝަނުން ވަނީ އިލްތިމާސްކޮށްފައެވެ. މީގެ އިތުރުން، ކެމްޕެއިން ކުރާ ހުރިހާ ފަރާތްތަކަށް ވެސް ހަމަހަމަ ކަމާއެކު ކެމްޕެއިން ކުރުމުގެ ފުރުޞަތު ހޯދައިދިނުމަށް އަބަދުވެސް މަސައްކަތް ކުރަމުންދާކަމަށް އެ ކޯރޕަރޭޝަނުން ބުންޏެވެ.