ޕީޕީއެމް ޕީއެންސީގެ ލީޑަރޝިޕް އޮތީ ޤައުމު ކުރިއެރުވުމަށް ރައީސާއެކު ސާބިތުކަންމަތީގަ: ނައިބު ރައީސް

ޕީޕީއެމް ޕީއެންސީގެ މިހާރުގެ ލީޑަރަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކަމަށާއި، އެ 2 ޕާޓީގެ ލީޑަރޝިޕް އޮތީ އެމަނިކުފާނާއި އެކު ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަތީފު ވިދާޅުވެއްޖެއެވެ.

ނައިބު ރައީސް ވިދާޅުވީ، ރައްޔިތުން ބޭނުންވާ ތަރައްޤީ މި ޤައުމަށް ހޯދައިދިނުމަށް ރައީސުލްޖުމްހޫރިއްޔާ ގެންދަވަނީ ފިސާރި ސާބިތުކަންމަތީގައި މަސައްކަތްޕުޅު ކުރައްވަމުން ކަމަށެވެ. ހަމަ އެއާއިއެކު، އެމްޑީޕީ އިން މި ޤައުމު ވައްޓާލި އަނދަވަޅުން ޤައުމު ނަގައި ހަމަމަގަށް އެޅުވުމަށް ރެޔާ ދުވާލު ރައީސް ގެންދަވަނީ ބުރަ މަސައްކަތްޕުޅުތަކެއް ކުރައްވަމުން ކަމަށް ނައިބު ރައީސް ވިދާޅުވިއެވެ.

ޕީޕީއެމް/ޕީއެންސީގެ މިހާރުގެ ލީޑަރަކީ ރައީސް @MMuizzu.މި ދެ ޕާޓީގެ ލީޑަރޝިޕް އޮތީ އެމަނިކުފާނާއެކު، ރައްޔިތުން ބޭނުންވާ ތަރައްޤީ މި ޤައުމަށް ހޯދައިދިނުމަށް ފިސާރި ސާބިތުކަންމަތީގައި.

— Hussain Mohamed Latheef (@HucenSembe) March 30, 2024

ނާއިބު ރައީސް މި ވާހަކަފުޅު ޙިއްސާކޮށްފައިމިވަނީ ޕީޕީއެމް ޕީއެންސީއަށް އެއްވެސް ދިރުމެއް ރައީސް ޑރ. މުޢިއްޒު ދޭން ބޭނުންފުޅުނުވާ ކަމަށް ކުރީގެ ރައީސް ޢަބްދުﷲ ޔާމީން އަބްދުލްގައްޔޫމް ވިދާޅުވުފައިވާ ދަނޑިވަޅެއްގައެވެ.

ނަައިބު ރައީސް ވަނީ، ރައީސް ޑރ. މުޢިއްޒުއަކީ ޚިދުމަތްތަކާއި އެކު، ހެޔޮ ނިޔަތުގައި ރައްޔިތުން ބޭނުންވާ ކަންކަން ހާސިލްކޮށްދެއްވުމަށް ވަޑައިގެންނެވި ވެރިއެއްކަން ފާހަގަކުރައްވާފައެވެ. ހަމަ އެއާއެކު، ޙިކުމަތްތެރިކަމާއެކު ކުރައްވަމުން އެ ގެންދަވާ ބުރަ މަސައްކަތްޕުޅުގެ ފޮނި ނަތީޖާ ދިވެހި ރައްޔިތުންނަށް މިހާރުވެސް ދަނީ ފެންނަމުންކަމަށް އެމަނިކުފާނު ވިދާޅުވިއެވެ.