މަޖިލިސް އިންތިޚާބު ކާމިޔާބުކުރުމަށް އެއްބައިވަންތަކޮށް މަސައްކަތްކުރުން މުހިންމު: ނައިބު ރައީސް
-
މަޖިލިސް އިންތިޚާބު ކާމިޔާބުކުރުމަށް ބަދަހިކަން ދައްކަންޖެހޭކަމަށް ވިދާޅުވި
-
ރައީސްގެ ވަޢުދުތައް ފުއްދުމަށް މަޖިލީހުގެ ފުރިހަމަ އަޣުލަބިއްޔަތު ލިބެންޖެހޭ
-
ސަރުކާރަށްކުރާ ދޮގު ތުހުމަތުތަކުގެ ޙަޤީޤަތް ރައްޔިތުންނަށް އެނގެންޖެހޭ
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެއްބައިވަންތަ ރޫޙެއްގައި މަސައްކަތްކުރުން މުހިންމު ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނާއިބު ރައީސް މިހެން ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ކެންޕެއިން ހަރަކާތެއްގައި ވާހަކަފުޅުދައްކަވަމުންނެވެ.
ނައިބު ރައީސް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވެރިކަމަށް ގެނައުމަށް މިދިޔަ ރިޔާސީ އިންތިޚާބުގެ ދުވަސްވަރު ޕްރޮގްރެސިވް ކޮންގްރެސް ކޯލިޝަންގެ ހުރިހާ ސަޕޯޓަރުންވެސް މަސައްކަތްކުރީ ވަރަށް ބަދަހިކަމާއި އެއްބައިވަންތަކަމާއެކު ކަމަށެވެ. އަދި މި އެއްބައިވަންތަކަމާއި ބަދަހިކަން މަޖިލިސް އިންތިޚާބު ކާމިޔާބުކުރުމަށް ދައްކަންޖެހޭ ކަމަށްވެސް ނައިބު ރައީސް ވިދާޅުވިއެވެ.
"އަޅުގަނޑު ޔަޤީންކުރަނީ ރިޔާސީ އިންތިޚުބުގައި ދެއްކެވި ޖޯޝާއި ފޯރި، މަޖިލިސް އިންތިޚާބުގައި ވެސް ތިބޭފުޅުން ދައްކަވާނެކަމަށް." ނައިބު ރައީސް ވިދާޅުވިއެވެ.
މީގެ އިތުރުން ސަރުކާރުން ރައްޔިތުންނަށްވީ ވަޢުދުތައް ފުއްދުމަށް މަޖިލީހުގެ ފުރިހަމަ އަޣުލަބިއްޔަތު ޕްރޮގްރެސިވް ކޮންގްރެސް ކޯލިޝަނަށް މުހިންމުކަމަން ނައިބު ރައީސް ވަނީ ފާހަގަކުރައްވާފައެވެ. އަދި ރަށްރަށުގައި އަސާސީ ޚިދުމަތްތައް ޤާއިމްކުރުމަށާއި ރަށުގެ މުސްތަޤުބަލާ ގުޅިފައިހުރި އެކި ކަންކަން ކޮށްދެވޭނީ ސަރުކާރަށް މަޖިލީހުގެ އަޣުލަބިއްޔަތު ލިބިގެންމަށްވެސް ނައިބު ރައީސް ވިދާޅުވިއެވެ.
ނައިބު ރައީސް ވަނީ އިދިކޮޅުން ސަރުކާރަށް ކުރާ ދޮގު ތުހުމަތުތަކުން ރައްޔިތުން ސަލާމަތްވާންޖެހޭކަމަށް ވިދާޅުވެ، ކަންކަމުގެ ޙަޤީޤަތް ރައްޔިތުންނަށް ކިޔައިދިނުމަށް ކޯލިޝަންގެ ސަޕޯޓަރުންކުރާ މަސައްކަތަށް ޝުކުރުއަދާކުރައްވާފައެވެ.
މިމަހުގެ 21 ވަނަ ދުވަހު އޮންނަ މަޖިލިސް އިންތިޚާބުގައި ޕްރޮގްރެސިވް ކޮންގްރެސް ކޯލިޝަނުން 89 ދާއިރާއަކަށް ވާދަކުރައްވައެވެ.