ހިންގުން ހަރުދަނާ ކުންފުނިތަކަށް ޕީސީބީން އެވޯޑެއް
-
އެވޯޑު ދޭނީ އެކަމަށްޓަކާ އެކުލަވާލާފައިވާ ކޮމިޓީއަކުން
-
ޕީސީބީން ވަނީ އެވޯޑު ދޭ މިންގަނޑެއް އެކުލަވާލާފައި
-
ޕީސީބީން ލަފާކުރަނީ މިމަހުގެ ފަހު ކޮޅު އެވޯޑުދެވޭނެކަމަށް
ސަރުކާރު ކުންފުނިތަކުގެ ހިންގުން ހަރުދަނާކުރުމަށް ބާރު އެޅުމުގެ ގޮތުން ގަވަނަންސް އެވޯޑުގެ ނަމުގައި އެވޯޑެއް ތައާރަފްކުރުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ނިންމައިފިއެވެ.
ޕީސީބީން ބުނީ ގަވަނަންސް އެވޯޑަކީ ކުންފުނިތަކުގެ ހިންގުން ހަރުދަނާކުރުމަށް ހިތްވަރުދީ، ހިންގުން ރަނގަޅު ކުންފުނިތަކުގެ އަގުވަޒަންކުރުމުގެ ގޮތުން ދޭން ނިންމާފައިވާ އެވޯޑެކެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގުރާމުގައި ވާހަކަދައްކަވަމުން ޕީސީބީގެ ސެކްރެޓަރީ ޖެނެރަލް އަޙްމަދު ޔާމީން ވިދާޅުވީ ގަވަނަންސް އެވޯޑު ދިނުމުގެ އުޞޫލު އެކުލަވާލާ ނިމިފައިވާ ކަމަށެވެ. އަދި އެވޯޑުގެ މަޢުލޫމާތު މިދިޔަ އަހަރު ކުންފުނިތަކާއި ޙިއްސާކޮށްފައިވާކަމަށްވެސް ޔާމީން ވިދާޅުވިއެވެ.
ޔާމީން ވިދާޅުވީ ގަވަނަންސް އެވޯޑު ދިނުމަށް ހަމަޖެހިފައިވަނީ ޕީސީބީން އެކުލަވާލާ މިނިވަން ކޮމިޓީއަކުން ކަމަށާއި މި ކޮމިޓީ އެކުލަވާލުމުގެ މަސައްކަތް ވަރަށް އަވަހަށް ފެށޭނެ ކަމަށެވެ. އަދި އެވޯޑު ދޭނީ ޕީސީބީން ކަނޑައަޅާ މިންގަނޑުކަމަށްވެސް ޔާމީން ފާހަގަކުރެއްވިއެވެ.
"ކޯޕަރޭޓް ގަވަނަންސް ކޯޑަށް ކުންފުނިތަކުން ޢަމަލުކުރަމުންދާގޮތުގެ ރިވިއުއެއް ކޮންމެ އަހަރަކު އަޅުގަނޑުމެން ހަދަން. އެ ރިވިއުއަށް އެވޯޑު ދޭއިރު ރިޢާޔަތްކުރެވޭނެ." އަޙްމަދު ޔާމީން ވިދާޅުވިއެވެ.
ޔާމީން ވިދާޅުވީ އެންމެ އިންސާފުވެރިކަމާއެކު އެވޯޑު ދިނުމުގެ ގޮތުން ކުންފުނިތަކަށް ޒިޔާރަތްކޮށް، ކުންފުނިތަކުގެ އިސްވެރިންނާއި އެވޯޑު ކޮމިޓީން އިންޓަވިއުކުރާނެ ކަމަށެވެ. އަދި އެވޯޑު ދިނުމުގެ ކުރިން ކުރަންޖެހޭ ކަންކަން ނިންމާލުމަށްފަހު، މިމަހުގެ ފަހުކޮޅު އެވޯޑް ހާސިލްކުރާ ކުންފުނިތަކަށް އެވޯޑް ހަވާލުކުރެވޭނޭކަމަށްވެސް ޔާމީން ވިދާޅުވިއެވެ.
ސަރުކާރު ކުންފުނިތަކުގެ ހިންގުން ހަރުދަނާކޮށް، ކުންފުނިތަކަކީ ރައްޔިތުންގެ އިތުބާރު ލިބިފައިވާ ތަންތަނަށް ހެދުމަށް ޕީސީބީން ގެންދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން މިދިޔަ އަހަރު އެ ބޯޑުން ވަނީ ޑިރެކްޓަރުންގެ ކޯޑް އޮފް ކޮންޑަކްޓަކާއި މައްސަލަ ބަލައި ފިޔަވަޅު އެޅުމުގެ އުސޫލެއް އެކުލަވާލާ ޢާންމުކޮށްފައެވެ.