އެސްއޯ ފުލުހުން ނެރުމުގެ ކުރިން ސީޕީގެ ހުއްދަ ހޯދަންޖެހޭ ގޮތަށް އުޞޫލަށް ބަދަލުގެނެސްފި

ފުލުހުންގެ ޚިދުމަތުގެ "ސްޕެޝަލިސްޓް އޮޕަރޭޝަންސް" ނުވަތަ އެސްއޯ ފުލުހުން ނެރެންޖެހޭ ހާލަތްތައް މުރާޖަޢާކޮށް ކޮމިޝަނަރުގެ ހުއްދައާއި ނުލާ ނުނެރޭވޭ ގޮތަށް ހަމަޖައްސައިފިއެވެ.
ޕީޕަލްސް ނޭޝަނަލް ފްރަންޓް، ޕީއެންއެފް ޖަލްސާއަށް ރައީސްގެ އެންގެވުމާ ޚިލާފަށް އެސްއޯ ފުލުހުން ފޮނުވި މައްސަލައާ ގުޅިގެން ރައީސުލްޖުމުހޫރިއްޔާ ޑރ. މުހައްމަދު މުޢިއްޒު ވަނީ އެކަން ހިނގާފައިވާ ގޮތުގެ ތަފްސީލް ދާޚިލީ ވުޒާރާ މެދުވެރިވެ ފުލުހުންގެ ކިބައިން ހޯއްދަވާފައެވެ. އަދި އެކަމުގެ ރިޕޯޓު އެމަނިކުފާނަށް ލިބިވަޑައިގެންފައިވަނީ ބުދަ ދުވަހުގެ އިރުއޮށްސި 6:00 ޖެހިއިރު އެވެ. އަދި އެ ރިޕޯޓާއި ގުޅިގެން 5 ފިޔަވަޅެއް އެޅުމަށް އެމަނިކުފާނު ވަނީ ދާޙީލީ ވުޒާރާ މެދުވެރިކުރައްވައި ކޮމިޝަނަރ އޮފް ޕޮލިސްއަށް އަންގަވާފައެވެ.

ރައީސް އަޅުއްވަން އެންގެވި ފިޔަވަޅުތައް

• 1. އެސްއޯ ފުލުހުން ނެރެވޭނެ ހާލަތްތައް މުރާޖަޢާކޮށް އެސްއޯ ފުލުހުން ނެރުމުގެ ކުރިން ކޮމިޝަނަރުގެ ހުއްދަ ހޯދަން ޖެހޭ ގޮތަށް ހެދުން.
• 2. ފުލުހުންގެ އޮޕަރޭޝަނަލް ކޮމާންޑް އެންޑް ކޮންޓްރޯލް ރީސްޓްރަކްޗަރކޮށް، މިހާރު ދިމާވާ ގޮންޖެހުންތައް ހައްލުކުރުން
• 3. ޣިޔާސުންދީން ސްކޫލަށް އެސްއޯ ފުލުހުން ފޮނުވުނު ގޮތް ބަލައި އެކަން ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑުން ތަހުޤީޤުކޮށް އެކަމުގައި އިހުމާލުވާ ފަރާތެއްވާނަމަ ޤާނޫނީ ފިޔަވަޅު އެޅުން.
• 4. އޮޕަރޭޝަންސް ހާލަތްތަކުގައި މީޑިއާތަކަށް މައުލޫމާތު ދޭ އުސޫލު މުރާޖަޢާކޮށް ދެފުއްފެންނަ ތަފްސީލީ ގޮތެއްގައި ރައްޔިތުންނަށް މައުލޫމާތު ދެވޭނެގޮތް ހެދުން.
• 5. ޣިޔާސުންދީން ސްކޫލު ސަރަހައްދުގައި އެސްއޯ ފުލުހުން ބާރުގެ ބޭނުންކޮށްފައިވާގޮތް ފުލުހުންގެ ޔޫޒް އޮފް ފޯސް ރިވިއު ކޮމެޓީން ބަލައި، އަޅަން ޖެހޭ ފިޔަވަޅުތައް އެޅުން.

ފުލުހުން އޮޕަރޭޝަންސްތަކަށް މި ބަދަލު ގެނައުމަށް ނިންމަވާފައިވަނީ، ބުދަ ދުވަހުގެ ރޭ ޣިޔާސުންދީން ސްކޫލުގައި ބޭއްވުމަށް މަސައްކަތް ކުރި، ޕީޕަލްސް ނޭޝަނަލް ފްރަންޓް (ޕީއެންއެފް) ޕާޓީގެ އުފައްދާ ޖަލްސާ އެ ސްކޫލުގައި ހުއްދަ ނެތި ބޭއްވުމަށް މަސައްކަތް ކުރުމުން ހިނގި ކަންތައްތަކާ ގުޅިގެންނެވެ. އެގޮތުން އެ ޖަލްސާ ބޭއްވުމަށް ދިން ހުއްދަ ސްކޫލުން ބާތިލްކޮށް އެކަން ޕީއެންއެފްއަށް އެންގުމުންވެސް ޖަލްސާގެ މަސައްކަތް ހުއްޓާނުލައި ކުރިއަށް ގެންދިއުމުން އެ ސްކޫލުން ވަނީ އެޑިއުކޭޝަން މިނިސްޓްރީ މެދުވެރިކޮށް ފުލުހަށް މައްސަލަ ހުށަހަޅާފައެވެ. އަދި ފުލުހުން އެތަނަށް ގޮސް ޖަލްސާ ހުއްޓުވުމުގެ މަސައްކަތް ކޮށްފައިވާއިރު، އެތަނަށް ދިޔައީ ފުލުހުންގެ އެސްއޯ ޓީމެކެވެ.

ރައީސުލްޖުމުހޫރިއްޔާ މިގޮތަށް ނިންމަވާފައި މިވަނީ ފުލުހުންގެ ޚިދުމަތަކީ ޖަވާބުދާރިކުރުވަނިވި ޕްރޮފެޝަނަލް ކުލުނުވެރި، އޯގާތެރި ޚިދުމަތެއްގެ ގޮތުގައި ބިނާކުރުމުގެ ސަރުކާރުން ގެންގުޅުއްވާ ސިޔާސަތާއެއްގޮތަށެވެ. މީގެއިތުރުން ރައީސް ވަނީ މީގެ ކުރިން ފެންނަ ގޮތަށް އެސްއޯ ފުލުހުން ރައްޔިތުންނަށް އަނިޔާކޮށް، ހިފާ ހައްޔަރުކުރުންފަދަ އެއްވެސް ކަމަކަށް ޖާގަ ދެއްވަން ބޭނުންފުޅުނުވާކަމަށް ވިދާޅުވެފައެވެ.

ރައީސްގެ ރަސްމީ ގެ މުލިއާގޭގައި ޢީދު ސަލާމްކުރެއްވުަމށްފަހު ނޫސްވެރިންނާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނު ރައްޔިތުންނަށް ވެވަޑައިގެންނެވި ވަޢުދަކީ ޤައުމުގައި ހަމަޖެހުން ޤާއިމްކުރުންކަމަށެވެ. އަދި ކުރީގައި ރާއްޖެއިން ފެނުނުފަދަ ބަދަލު ހިފުމުގެ ރޫހު ނުގެންގުޅުއްވާނެކަމަށާއި، ސިޔާސީ ޚިޔާލު ފާޅުކޮށްގެން އެއްވެސް މީހަކަށް ދޭނެ އަދަބެއް ނޯންނާނެކަމަށް ރައީސް ވިދާޅުވާ ވާހަކަފުޅު ތަކުރާރު އެމަނިކުފާނު ތަކުރާރުކުރެއްވިއެވެ.