ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތަކުގެ ޚަބަރާއި މަޢުލޫމާތު ދުނިޔެއަށް ހާމަ ކޮށްދޭން މަސައްކަތް ކުރަމުންދާ ތުރުކީވިލާތުގެ ދަޢުލަތު މީޑިޔާ, ޓީއާރްޓީ ޢަރަބީގެ ޓީމަށް އަމާޒުކޮށް ޔަހޫދީ ފައުޖުން ރަޙުމު ކުޑަ ވައިގެ ޙަމަލާތަކެއް ދީފިއެވެ. ޓީއާރްޓީގެ ނޫސްވެރިންގެ އުޅަނދަކަށް ޔަހޫދީ ފައުޖުން ދީފައިވާ ވައިގެ ޙަމަލާތަކުގައި އެ ނޫހުގެ ދެ މުވައްޒަފުން ޒަޚަމު ކޮށްލިއެވެ.
ޓީއާރްޓީން ބުނީ, ޔަހޫދީ ފައުޖުގެ ޙަމަލާތައް އަމާޒު ކޮށްފައި ވަނީ, ޣައްޒާގެ އަލް-ނުޞައިރާތު ރެފިއުޖީ ކޭމްޕުގައި ހަރަކާތްތެރިވަމުން ދިޔަ ޓީމަށް ކަމުގައެވެ. އަދި, ޙަމަލާ ދިން ވަގުތު, އެ ޓީމުން ހަރަކާތްތެރިވަމުން ގޮސްފައި ވަނީ, ރެފިއުޖީ ކޭމްޕުގައި ދިރިއުޅޭ މުސްލިމުން ނެތިކޮށްލަން ޔަހޫދީ ފައުޖުން ދެމުންދާ ޙަމަލާތަކުގެ ޚަބަރާއި މަޢުލޫމާތު ދުނިޔެއަށް ހާމަ ކުރުމަށް ކަމުގައެވެ.
ޓީއާރްޓީގެ އެޑިޓަރު ޒަހީދް ސޮބަޖީ ވިދާޅުވީ, އޭނާގެ ޓީމަށް ޔަހޫދީ ފައުޖުން ދީފައިވާ ޙަމަލާގައި, އެ ޓީމާއެކު މަސައްކަތް ކުރާ ކެމެރާމަން ސާމީ ޝިހާދާއަށް ބޮޑެތި ޒަޚަމުތަކެއް ލިބުނު ކަމުގައެވެ. "އޭނާގެ އެއް ފައި ބުރިކޮށްލަން ޖެހުނު. އޭނާ އަދިވެސް އޮތީ ސަރޖަރީގައި،" ސޮބަޖީ ވިދާޅުވިއެވެ. ޔަހޫދީންގެ ޙަމަލާގައި ޓީއާރްޓީގެ އިތުރު މުވައްޒަފުންތަކެއް ވެސް ޒަޚަމު ކޮށްލިއެވެ.
ފަލަސްޠީނުގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާއި ގަތުލުއާންމުގެ ޚަބަރާއި މަޢުލޫމާތު ދުނިޔެއަށް ހާމަ ކޮށްދޭން މަސައްކަތް ކުރަމުންދާ ނޫސްވެރިން ހުއްޓުވަން ޔަހޫދީ ފައުުޖުން ދަނީ މަސައްކަތް ކުރަމުންނެވެ. މި ގޮތުން, ނޫސްވެރިންނަށް އަމާޒުކޮށް ޔަހޫދީ ފައުޖުން ދަނީ ނުރައްކާތެރި ޙަމަލާތަކެއް ދެމުންނެވެ. މިއީ, ނޫސްވެރިންގެ އަޑު ކަނޑުވައިލައި, ގަތުލުއާންމުތަކުގެ މަޢުލޫމާތު ސިއްރު ކުރަން ޔަހޫދީން ހިންގަމުންދާ ބައިނަލްއަޤުވާމީ ޤާނޫނުތަކާ ޚިލާފު ޖަރީމާއެކެވެ.
ނޫސްވެރިންގެ ޙައްޤުތަކަށް ވަކާލާތު ކުރާ އެމެރިކާގެ ޖަމުޢިއްޔާ, ކޮމިޓީ ޓު ޕްރޮޓެކްޓް ޖަރނަލިސްޓްސް (ސީޕީޖޭ)ން ބުނީ, އޮކްޓޫބަރު 7ގައި ޔަހޫދީ ފައުޖުގެ ލާއިންސާނީ ޢުދުވާންތައް ފެށި ފަހުން ޣައްޒާގައި މަސައްކަތް ކުރަމުން ދިޔަ ނޫސްވެރިންގެ ތެރެއިން 95 މީހުން ޝަހީދު ކޮށްލާފައިވާ ކަމުގައެވެ. އޭގެ ތެރޭގައި ފަލަސްޠީނުގެ 90 ރައްޔިތުން ހިމެނެއެވެ. އަދި, 16 ނޫސްވެރިން ޒަޚަމު ކޮށްލާފައިވެއެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ޣައްޒާއަށް ދީފައިވާ ޙަމަލާތަކުގެ ތެރެއިން ގިނަ ޙަމަލާތައް އަމާޒު ކޮށްފައި ވަނީ ނުޞައިރަތު ރެފިއުޖީ ކޭމްޕަށެވެ. އެ ރެފިއުޖީ ކޭމްޕުގެ އަހުލުވެރިން މި ޙަމަލާތައް ސިފަކޮށްފައި ވަނީ, މަތިން އަލިފާން ފޭބުން ފަދަ ގޮތެއްގައެވެ. "ފެންނަނީ ރޯވެފައިވާ އަލިފާންގަނޑުތަކާއި ސުުންނާފަތި ކޮށްލާފައިވާ ޢިމާރާތްތައް. ޝަހީދު ކޮށްލާފައިވާ މީހުންގެ ހަށިތަކުން މަގުތައް ވަނީ ފުރިފައި،" ނުޞައިރަތު ރެފިއުޖީ ކޭމްޕުގައި ދިރިއުޅޭ 61 އަހަރުގެ މުޙައްމަދު އަލް-ރަޔީސް ބުންޏެވެ.
ޔަހޫދީ ފައުޖުން ނުޞައިރަތަށް އަމާޒުކޮށް ދެމުންދާ ޙަމަލާތައް އިތުރު ކޮށްފައި މި ވަނީ, ސޫރިޔާގެ ވެރިރަށް ދިމިޝްޤަށް ޙަމަލާދީ އީރާނުގެ އަސްކަރިއްޔާގެ ހަތް ސިފައިން ޝަހީދުކޮށްލި ޙަމަލާގެ ބަދަލު ހިފާނެ ކަމަށް ބުނެ, އީރާނުން ޔަހޫދީންނަށް ވަރުގަދަ އިންޒާރެއް ދީފައިވާ ދަނޑިވަޅެއްގައެވެ. މި ކަމާ ގުޅިގެން ބައެއް ޤައުމުތަކުން ވަނީ, ޒަޔަނިސްޓު އިސްރާއީލަށް ދަތުރު ނުކުރުމަށް އެ ޤައުމުތަކުގެ ރައްޔިތުންނަށް އިރުޝާދު ދީފައެވެ. އޭގެ ތެރޭގައި ފަރަންސޭސިވިލާތުގެ އިތުރުން އިންޑިޔާ ވެސް ހިމެނެއެވެ.
ނުޞައިރަތަަށް ދެމުންދާ ޙަމަލާތައް ޔަހޫދީ ފައުޖުން އިތުރު ކޮށްފައި މި ވަނީ, ޣައްޒާގެ ދެކުނުގައި އޮންނަ ޚާން ޔޫނިސަށް އެރި ޔަހޫދީ ފައުޖުގެ ގިނަ ޢަދަދެއްގެ ސިފައިން އެ ރަށުން ބޭލުމަށް ފަހުއެވެ. މިއީ, ޣައްޒާގެ އެންމެ ދެކުނަށް އޮތް ރަފަޙަށް އެއްގަމު މަގުން އަރައި, ޢުދުވާނާއި, ގަތުލުއާންމާއި ލޭއޮހޮރުވުން އިތުރު ކުރުމަށް ތައްޔާރުވުމުގެ ގޮތުން އަޅާފައިވާ ފިޔަވަޅެކެވެ. ޣައްޒާގެ 2.3 މިލިޔަން މީހުންގެ އާބާދީގެ ތެރެއިން 1.5 މިލިޔަނެއްހާ މީހުން މި ވަގުތު ތިބީ ރަފަޙުގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 33,686އަށް އުފުލިފައެވެ. އޭގެ ތެރޭގައި 25,000އަށްވުރެ ގިނަ އަންހެނުންނާއި މައުސޫމު ކުޑަކުދިން ހިމެނެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 76,309އަށް އުފުލިފައެވެ.