މި އަހަރު 5 ރަށެއްގައި އިޔާދަކުރަނިވި ހަކަތައިން ކަރަންޓުދޭން ސްޓެލްކޯއިން ތައްޔާރުވަނީ
-
އަމަލީ މަސައްކަތް ފެށުމަށް ވަރަށް އަވަހަށް އެއްބަސްވުމެއް އެކުލަވާލާނެ
-
33 ރަށުގައި އިޔާދަކުރަނިވި ހަކަތައިން ކަރަންޓް ދިނުމުގެ ވިސްނުން ގެންގުޅުއްވާ
ސްޓެލްކޯއިން ކަރަންޓުގެ ޚިދުމަތް ދެމުންދާ ރަށްތަކުގެ ތެެރެއިން 5 ރަށެއްގައި އިޔާދަކުރަނިވި ހަކަތައިން ކަރަންޓް ފޯރުކޮށްދިނުމުގެ އަމަލީ މަސައްކަތް ފެށުމަށް ތައްޔާރުވަމުން އަންނަކަމަށް ސްޓެލްކޯގެ މެނޭޖިން ޑިރެކްޓަރ ޙުސައިން ފަހުމީ ވިދާޅުވެއްޖެއެވެ.
ސްޓެލްކޯއިން ކަރަންޓުގެ ޚިދުމަތް ދެމުންދާ ރަށްރަށުގެ ތެރެއިން މަދުވެގެން 5 ރަށެއްގައި މި އަހަރުގެ ނިޔަލަށް ބެޓަރިން ކަރަންޓުދޭން ފެށުމަށް ނިންމަވާފައިވާކަން ހާމަކުރީ މިއަހަރުގެ ޖެނުއަރީ މަހުގެ ތެރޭގައެވެ.
މިކަމާ ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވީ ވިސްނުމަކީ އެކުންފުނިން ޚިދުމަތްދެމުންދާ 33 ރަށުގައި އިޔާދަކުރަނިވި ހަކަތައިން ކަރަންޓްގެ ޚިދުމަތް ފޯރުކޮށްދިނުން ކަމަށެވެ. އެގޮތުން 5 ރަށެއްގައި އިޔާދަކުރަނިވި ހަކަތައިން ކަރަންޓްގެ ޚިދުމަތް ދިނުމުގެ އަމަލީ މަސައްކަތް ފެށުމަށް ތައްޔާރުވެފައިވާކަމަށާއި އެ މަސައްކަތް ފެށުމުގެ އެއްބަސްވުމުގައި މިމަސް ނުވަތަ އަންނަ މަހު ސޮއިކުރެވޭނެކަމަށެވެ.
"ފުރަތަމަ ލިބުނު ބިޑްތަކުގެ އަގު ބޮޑުވުމުން ދެވަނަ ފަހަރު ބިޑަށް ހުޅުވާލިން. ދެވަނަ ފަހަރު ބިޑަށް ހުޅުވާލުމުން ރީސަނަބަލް އަގެއްގައި އެމަސައްކަތް ކުރެވޭނެ ގޮތް ވަނީ ވެފައި" ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވިދާޅުވިއެވެ.
މީގެ ކުރިން ފަހުމީ ވިދާޅުވެފައިވަނީ ކ އަތޮޅާ، އއ އަތޮޅާ، އދ އަތޮޅުގެ އިތުރުން ވ އަތޮޅުގައި ސްޓެލްކޯއިން ކަރަންޓުގެ ޚިދުމަތްދޭ ރަށްތަކުގެ ތެރެއިން މަދުވެގެން 5 ރަށެއްގައި އެކަށޭނަ ޢަދަދަށް އިއާދަކުރަނިވި ހަކަތަ އުފައްދަން ފަށްޓަވާނެކަމަށެވެ. އަދި އެ ރަށްތަކުގައި މި އަހަރު ނިމުމުގެ ކުރިން މަދުވެގެން 12 ގަޑިއިރު ބެޓަރިން ކަރަންޓު ދޭން ފެށުމަށް ތައްޔާރުވަމުންދާ ކަމަށް ފަހުމީ ވިދާޅުވިއެވެ. މި ޚިދުމަތް އިތުރު ރަށްތަކަށް ފުޅާކުރައްވަމުން ގެންދަވާނެކަންވެސް ފަހުމީ ފާހަގަކުރެއްވިއެވެ.
ފަހުމީ ވަނީ އިޔާދަކުރަނިވި ހަކަތައިން ކަރަންޓް ފޯރުކޮށްދޭން ފެށުމުން ޚަރަދުކުޑަވެ ތެލަށް ކުރާ ހޭދަ ކުޑަވެގެންދާނެކަން ފާހަގަކުރައްވާފައެވެ.