ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނަށް އެމެރިކާއާއި އިނގިރޭސިވިލާތުން ތާޢީދުކޮށް, އެހީތެރިކަން ފޯރުކޮށްދެމުންދާތީ އީރާނުން އެ ދެ ޤައުމާ ދެކޮޅަށް ދަތިކުރުމުގެ ފިޔަވަޅުތަކެއް އަޅައިފިއެވެ. ޔަހޫދީ ފައުޖުގެ ޢުދުވާން ހިންގަމުން ދަނީ އެމެރިކާއިން ފޯރުކޮށްދެމުންދާ ނުރައްކާތެރި ހާތިޔާރު ބޭނުން ކޮށްގެންނެވެ. އަދި, އިނގިރޭސިވިލާތުން ދަނީ ޔަހޫދީންނާއި އެ މީހުންގެ މަސްލަޙަތު ޙިމާޔަތް ކުރަން މަސައްކަތް ކުރަމުންނެވެ.
އީރާނުގެ ޚާރިޖީ ވުޒާރާއިން ބުނީ, މި ކަމާ ގުޅިގެން އެމެރިކާގެ އަސްކަރިއްޔާގެ އިސް ދެ އޮފިސަރަކާއި އިނގިރޭސިވިލާތުގެ އަސްކަރިއްޔާގެ ދިފާޢީ ވަޒީރާއި އަސްކަރިއްޔާގެ އިސް އޮފިސަރަކާ ދެކޮޅަށް ދަތި ކުރުމުގެ ފިޔަވަޅު އަޅާފައިވާ ކަމުގައެވެ. އޭގެ ތެރޭގައި ހިމެނެނީ އެމެރިކާގެ އަސްކަރިއްޔާގެ ސްޕެޝަލް އޮޕަރޭޝަންސް ކޮމާންޑުގެ ކޮމާންޑަރު ޖެނެރަލް ބްރަޔަން ޕީ. ފެންޓަނާއި, އެމެރިކާގެ ކަނޑުގެ ސިފައިންގެ ފަސްވަނަ ލަޝްކަރުގެ ކުރީގެ ކޮމާންޑަރު ވައިސް އެޑްމިރަލް ބްރެޑް ކުޕަރއެވެ.
އީރާނުން ދަތި ކުރުމުގެ ފިޔަވަޅު އަޅާފައިވާ ފަރާތްތަކުގެ ތެރޭގައި އިނގިރޭސިވިލާތުގެ ދިފާޢީ ވަޒީރު ގްރާންޓް ޝެޕްސްގެ އިތުރުން އަސްކަރިއްޔާގެ އިސް ކޮމާންޑަރެއް ކަމުގައިވާ ޖޭމްސް ހަކިންހޯލް ހިމެނެއެވެ. މީގެ އިތުރުން, ރަތް ކަނޑުގެ ސަރަޙައްދުގައި ހަރަކާތްތެރިވަމުންދާ އިނގިރޭސިވިލާތުގެ ކަނޑުގެ ސިފައިންގެ ލަޝްކަރާ ދެކޮޅަށް ވެސް ފިޔަވަޅުތައް އެޅުމަށް އީރާނުން ވަނީ ނިންމާފައެވެ.
އެމެރިކާއާއި އިނގިރޭސިވިލާތުގެ ބައެއް ކުންފުނިތަކާ ދެކޮޅަށް ދަތި ކުރުމުގެ ފިޔަވަޅުތައް އެޅުމަށް ނިންމާފައިވާ ކަން ވެސް އީރާނުން ވަނީ އިޢުލާނު ކޮށްފައެވެ. އެ ކުންފުނިތަކުގެ ތެރޭގައި ހިމެނެނީ އެމެރިކާގެ ލޮކްހީޑް މާޓިނާއި ޗެވްރޯންގެ އިތުރުން އިނގިރޭސިވިލާތުގެ ތިން ކުންފުންޏެއް ކަމުގައިވާ އެލްބިޓް ސިސްޓަމްސް, ޕާކަރ މެގިޓް އަދި ރަފަޔަލް ޔޫކޭއެވެ.
އީރާނުގެ ޚާރިޖީ ވުޒާރާއިން ބުނީ, އެ ފަރާތްތަކާއި ކުންފުނިތަކުން އީރާނުގެ މާލީ އަދި ބޭންކިންގ ނިޒާމުގައި ވިޔަފާރި ކުރުން މަނާ ކޮށްފައިވާ ކަމުގައެވެ. އަދި, އީރާނުގެ އިހުތިސާސް ހިނގާ ސަރަޙައްދުތަކުގައިވާ އެ ފަރާތްތަކުގެ މުދާ ހިފަހައްޓާނެ ކަމުގައި ވެސް އެ ވުޒާރާއިން ބުންޏެވެ. މީގެ އިތުރުން, އެ ފަރާތްތަކާއި ކުންފުނިތަކުގެ ވެރިންނާއި މުވައްޒަފުންނަށް ވިސާ ދޫނުކުރާނެ ކަމަށާއި, އީރާނަށް އެރުމުގެ ފުރުޞަތު ނުދޭނެ ކަމުގައި ވެސް އެ ޤައުމުގެ ޚާރިޖީ ވުޒާރާއިން ބުންޏެވެ.
އީރާނުން އެމެރިކާއާއި އިނގިރޭސިވިލާތުގެ ސަރުކާރާއި އަސްކަރިއްޔާގެ އިތުރުން ބައެއް ކުންފުނިތަކުގެ އިސްވެރިންނާ ދެކޮޅަށް ދަތި ކުރުމުގެ ފިޔަވަޅުތައް އަޅާފައިވީ ނަމަވެސް, މި ފިޔަވަޅުތަކުގެ ސަބަބުން އެ ފަރާތްތަކަށް އެއްވެސް އަސަރެއް ކުރާނެ ކަމާ މެދު ވަނީ ސުވާލު އުފެދިފައެވެ. މަސްރަޙު ދިރާސާ ކުރާ ފަރާތްތަކުން ބުނާ ގޮތުގައި, މިއީ އީރާނުން ރަމްޒީ ގޮތެއްގައި އަޅާފައިވާ ފިޔަވަޅުތަކެކެވެ. އަދި, މި ފިޔަވަޅުތަކުގެ ސަބަބުން, ޣައްޒާގެ މުސްލިމުންނާ އެކު އީރާނުން ދެމި އޮތް ކަން ސާބިތުވާ ކަމަށް ވެސް މަސްރަޙު ދިރާސާ ކުރާ ބައެއް ފަރާތްތަކުން ގަބޫލު ކުރެއެވެ.
ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ އެންމެ ބޮޑު މަދަދުގާރަކީ އެމެރިކާއެވެ. އަދި, އެ ޤައުމުގެ ރައީސް ޖޯ ބައިޑަނެވެ. ބައިނަލްއަޤުވާމީ މައިދާނުގައި ޔަހޫދީންނާއި އެ މީހުންގެ މަސްލަހަތު ހިމާޔަތް ކުރުމަށް ފޫގަޅައިގެން އުޅެނީ ވެސް އެމެރިކާއިންނެވެ. އަދި, ޔަހޫދީންނާ ދެކޮޅަށް އދގެ ސަލާމަތީ މަޖިލީހުގެ ތެރެއިން އަޅަން އުޅޭ ކޮންމެ ފިޔަވަޅަކަށް ބައިޑަން ގެންދަ ވަނީ ހުރަސް އަޅުއްވަމުންނެވެ.
މީގެ ހަ މަސް ކުރިން ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 34,596އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 77,816އަށް އުފުލިފައެވެ. އދއިން ބުނީ, ޣައްޒާގައި ހައިހޫނު ކަމާ ކުރިމަތިލާން ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.