ފަލަސްޠީނުގެ ޣައްޒާގައި ހާލުގައި ޖެހިފައިވާ 2.3 މިލިޔަން މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދޭން އުރުދުނުން ކުރަމުންދާ މަސައްކަތްތަކަށް ޔަހޫދީ ވަޒަންވެރިން ހުރަސް އަޅަމުންދާ ކަން އުރުދުންގެ ޚާރިޖީ ވުޒާރާއިން ހާމަކޮށްފިއެވެ. 2023 އޮކްޓޫބަރު 7ން ފެށިގެން ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެން އެ ސަހަރުން ކާބޯތަކެތި ހުސްވެފައިވާއިރު, އެ ސަހަރުގެ ރައްޔިތުންނަށް ވަނީ ހައިހޫނުކަމާ ކުރިމަތިލާން ޖެހިފައެވެ.
ޣައްޒާގައި ނިކަމެތި ކޮށްލާފައިވާ ފަލަސްޠީނުގެ މުސްލިމުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދޭން އުރުދުނުން ދަނީ ގިނަ މަސައްކަތްތަކެއް ކުރަމުންނެވެ. އެ ޤައުމުގެ ޚާރިޖީ ވުޒާރާއިން ބުނީ, ޣައްޒާގައި ހާލުގައި ޖެހިފައިވާ މީހުންނަށް ބޭނުންވާ ކާބޯތަކެތި ބަރުކޮށްގެން ދަތުރު ކުރަމުން ދިޔަ ދެ ގާފިލާއަކަށް, މުސްލިމުންގެ ބިންތަކަށް ވެރިވެގަނެ, ވަޒަންވެރިވެގެން އުޅޭ ޔަހޫދީންގެ ބައިގަނޑަކުން ޙަމަލާދީފައިވާ ކަމުގައެވެ.
"ޣައްޒާގައި ހާލުގައި ޖެހިފައިވާ މީހުންނަށް ކާބޯތަކެތި ބަރުކޮށްގެން ދަތުރު ކުރަމުން ދިޔަ އުރުދުންގެ ދެ ގާފިލާއަކަށް ޙަމަލާދީ, ހުއްޓުވާފައި ވަނީ ޔަހޫދީ ޢާންމުންގެ ބައިގަނޑެއް،" އުރުދުންގެ ޚާރިޖީ ވުޒާރާއިން ބުންޏެވެ.
މި ކަން އިސްރާއީލުގެ މަދަނީ ޖަމުޢިއްޔާއަކުން ވެސް ވަނީ ކަށަވަރު ކޮށްދީފައެވެ. ޤާނޫނީ އެހީތެރިކަން ފޯރުކޮށްދޭ އިސްރާއީލުގެ މަދަނީ ޖަމުޢިއްޔާ, ހޮނޭނޫން ބުނީ ޔަހޫދީ ޢާންމުންގެ ގުރޫޕަކުން އުރުދުންގެ ދެ ގާފިލާއަކަށް ހުރަސް އަޅާފައިވާ ކަމުގައެވެ. އެ ކަން ހިނގާފައި ވަނީ ޔަހޫދީން ވަޒަންވެރިވެގެން އުޅޭ މައަލޭ އަދުމީމް ސަރަޙައްދުގައެވެ.
ޔަހޫދީން ހުރަސް އަޅާފައިވާ އެއް އުޅަނދަކީ ކަރްމު ޝަލޫމް ސަރަޙައްދީ ރޮނގަށް ދަތުރު ކުރަމުން ދިޔަ އުޅަނދެކެވެ. ދެވަނަ އުޅަނދު ހުއްޓުވާފައި ވަނީ އެޜޭޒް ސަރަޙައްދީ ހުރަހާ ދިމާލަށް ދަތުރު ކުރަމުން ދަނިކޮށް ކަމުގައި އުރުދުންގެ ޚާރިޖީ ވުޒާރާއިން ބުންޏެވެ.
ޣައްޒާގައި ހާލުގައި ޖެހިފައިވާ މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދޭން ޔަހޫދީ ފައުޖުން ވެސް ދަނީ ހުރަސް އަޅަމުންނެވެ. މި ގޮތުން, ޣައްޒާއަށް ކޮންމެ ދުވަހަކު ވެސް އެތެރެވުމުގެ ފުރުޞަތު ދެނީ މަދު ޢަދަދެއްގެ އުޅަނދަކަށެވެ. އަދި, މި ގޮތަށް އެތެރެވެ ޣައްޒާގެ ތެރޭގައި ދަތުރު ކުރަމުންދާ އުޅަނދުފަހަރަށް ވެސް ޔަހޫދީ ފައުޖުން ދަނީ ޙަމަލާ ދެމުންނެވެ. އަދި, އެހީއަށް މަޑުކޮށްގެން ތިބޭ ފަލަސްޠީނުގެ މުސްލިމުންނަށް އަމާޒުކޮށް ރަޙުމު ކުޑަ ޙަމަލާތައްދީ, ޔަހޫދީ ފައުޖުން ދަނީ ގިނަ ޢަދަދެއްގެ ބަޔަކު ޝަހީދު ކުރަމުންނެވެ.
މީގެ ހަ މަސް ކުރިން ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 34,596އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 77,816އަށް އުފުލިފައެވެ. އދއިން ބުނީ, ޣައްޒާގައި ހައިހޫނު ކަމާ ކުރިމަތިލާން ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.