ބްރެޒިލްގެ ދެކުނު ސަރަޙައްދުތަކަށް މިހާރު ކުރަމުންދާ ބޯ ވިއްސާރައިގައި, ފެންބޮޑުވުމާ ގުޅިގެން ނުރައްކާތެރި ހާދިސާތަކެއް ހިނގައި, 31 މީހުން މަރުވެއްޖެއެވެ. ވިއްސާރައިގެ އަސަރު އެންމެ ބޮޑަށް ކުރަމުން ދަނީ ހިއޮ ގްރަންޖެ ދު ސޯ ސްޓޭޓަށެވެ. އެ ސްޓޭޓްގެ 497 ރަށުގެ ތެރެއިން ދެބައިކުޅަ އެއްބައި ރަށުގެ ބޮޑު ބައެއްގައި ވަނީ ފެންބޮޑުވެފައެވެ.
ހިއޮ ގްރަންޖެ ދު ސޯގެ އޮފިޝަލުން ބުނީ ފެންބޮޑުވުމާ ގުޅިގެން ހިނގި އެކި ހާދިސާތަކުގައި 70އަށްވުރެ ގިނަ މީހުން ގެއްލިފައިވާ ކަމުގައެވެ. އަދި, މަރުވެފައިވާ މީހުންގެ ޢަދަދު އުފުލޭނެ ކަމަށް ބެލެވޭ ކަމުގައެވެ. ޔުރުގުއާއީއާއި އާޖެންޓީނާގެ ސަރަޙައްދީ ރޮނގު ކައިރީގައި އޮންނަ ހިއޮ ގްރަންޖެ ދު ސޯ ސްޓޭޓްގެ ރަށްތަކުގައި ދިރިއުޅޭ 17,000އަށްވުރެ ގިނަ މީހުން ގެދޮރު ނެތިފައިވާ ކަމުގައި ވެސް އޮފިޝަލުން ބުންޏެވެ.
ބޯކޮށް ވާރޭވެހުމާ އެކު, ފެންބޮޑުވެ އެ ސްޓޭޓްގެ ގިނަ ރަށްތަކުގެ މަގުތަކުގައި ވަނީ ކޯރު ހެދިފައެވެ. އަދި, ބުރިޖުތަކާއި މަގުތަކަށް ވަނީ ބޮޑެތި ގެއްލުންތަކެއް ލިބިފައެވެ. ބްރެޒިލްގެ ދެކުނުގެ ސަރަޙައްދުތަކަށް އަރާފައިވާ ތޫފާނާ އެކު, ފަރުބަދަމަތީ ސަރަޙައްދުތަކުގައި ބިންގަނޑު ކެނޑުމުގެ ހާދިސާތައް ވެސް ހިނގިއެވެ. އެ ޤައުމުގެ ރައީސް ލުއީސް އިނާސިޔޮ ލޫލާ ދަ ސިލްވާ ވަނީ ގެއްލުން ލިބިފައިވާ ބައެއް ސަރަޙައްދުތަކަށް ޒިޔާރަތް ކުރައްވައި, ހާލަތު ބައްލަވައިލައްވާފައެވެ.
ވިއްސާރައިގެ ސަބަބުން ހިއޮ ގްރަންޖެ ދު ސޯގައި ހުންނަ ހައިޑްރޯއިލެކްޓްރިކް އިންޖީނުގެއެއްގެ ޑޭމަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އަދި, އެ ސްޓޭޓްގެ ބެންތޮ ގޮންސާލްވެސްގައި ހުންނަ އެހެން އިންޖީނުގެއެއްގެ ޑޭމެއް ވެއްޓުމާ ގާތްވެފައިވާ ކަމުގައި އެ ތަނުގެ އޮފިޝަލުން ބުންޏެވެ. މި ކަމާ ގުޅިގެން, އެ ސަރަޙައްދުތަކުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުވުމަށް ވަނީ އިރުޝާދު ދީފައެވެ.
ހިއޮ ގްރަންޖެ ދު ސޯގެ ގަވަރުނަރު އެދުއާރްދޯ ލެއީޗި ވިދާޅުވީ, ފެންބޮޑުވުމާ ގުޅިގެން އެ ސްޓޭޓަށް ވަރަށް ނުރައްކާތެރި ހާލަތެއް މެދުވެރިވެފައިވާ ކަމުގައެވެ. އަދި, ގެއްލުން ލިބިފައިވާ ސަރަޙައްދުތަކުގެ ހާލަތު ވަޒަން ކުރުމުގެ މަސައްކަތް ފަށާފައިވާއިރު, މި ހާދިސާތަކުގައި މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ.