އަފްޣާނިސްތާނުގެ އުތުރު ބަޣްލާން ޕުރޮވިންސަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު 50އަށް އުފުލިއްޖެއެވެ. އެ ޤައުމުގައި ވެރިކަން ކުރާ ޠާލިބާނުންގެ ދާޚިލީ ވުޒާރާގެ ތަރުޖަމާނު ޢަބްދުލް މަތީން ޤާނިޢީ ބުނީ ފެންބޮޑުވުމާ ގުޅިގެން ބޮޑެތި ގެއްލުންތަކެއް ލިބިފައިވާ ކަމަށާއި, މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ.
މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ބަޣްލާން ޕުރޮވިންސުގެ ފަސް އަވަށެއްގައި ވަނީ ފެންބޮޑުވެފައެވެ. ފެންބޮޑުވެފައިވާ ބައެއް ސަރަޙައްދުތަކުގެ ރައްޔިތުން ގެދޮރުގައި ތާށިވެފައިވާ ކަމުގައި ޤާނިޢީ ބުންޏެވެ. އެ މީހުން ސަލާމަތް ކުރުމަށް މަސައްކަތް ކުރަމުންދާ ކަމުގައި ވެސް އޭނާ ބުންޏެވެ.
މި މަސައްކަތުގައި ބައިވެރިވުމަށް ޠާލިބާނުންގެ ސަރުކާރުން ވަނީ ހެލިކޮޕްޓަރުތަކެއް ވެސް އެ ސަރަޙައްދަށް ފޮނުވާފައެވެ. ނަމަވެސް, ރޭގަނޑުގެ ވަގުތުގައި އުދުހުމަށް ބޭނުންވާ ވަސީލަތްތައް ނެތުމާ ގުޅިގެން, އެ މަސައްކަތަށް ހުރަސް އެޅިފައިވާ ކަމުގައި ޤާނިޢީ ބުންޏެވެ. ކިސަޑުތަކުގެ ދަށުގައި ތާށިވެފައިވާ މީހުންގެ ހަށިތައް ހޯދުމަށް ޓީމުތަކުން މިހާރު ދަނީ މަސައްކަތް ކުރަމުންނެވެ.
ބަޣްލާން ޕުރޮވިންސުގެ އިސް އޮފިޝަލެއް ކަމުގައިވާ ހިދާޔަތުالله ޙަމްދާރަދު ބުނީ އެ ސަރަޙައްދުގައި ފެންބޮޑުވެފައި ވަނީ މޫސުމީ ވިއްސާރައާ ގުޅިގެން ކަމުގައެވެ. ނަމަވެސް, ބޯކޮށް ވާރޭވެހޭނެ ކަމަށް ކުރިން ލަފާކުރެވިފައި ނުވާތީ, އެ ސަރަޙައްދުތަކުގެ އަހުލުވެރިން ރައްކާތެރި ކަމުގެ ގޮތުން އެއްވެސް ފިޔަވަޅެއް އަޅާފައި ނުވާ ކަމުގައި ވެސް އޭނާ ބުންޏެވެ.
އޭޕްރިލް މަހުގެ މެދެއްހާ ހިސާބުން ފެށިގެން އަފްޣާނިސްތާނުގެ އެކި ސަރަޙައްދުތަކަށް ދަނީ ބޯކޮށް ވިއްސާރަ ކުރަމުންނެވެ. މި ވިއްސާރައާ ގުޅިގެން ފެންބޮޑުވުމުގެ ސަބަބުން މަރުވި މީހުންގެ ޢަދަދު މިހާރު ވަނީ 100އިން މައްޗަށް އުފުލިފައެވެ. ވިއްސާރައިގެ އަސަރު އެ ޤައުމުގެ 10 ޕުރޮވިންސަކަށް ކުރަމުންދާ ކަމުގައި ޠާލިބާނުންގެ ސަރުކާރުން ބުންޏެވެ.
ފެންބޮޑުވުމާ ގުޅިގެން އެ ސަރަޙައްދުތަކުގެ ދަނޑުބިންތައް ވަނީ ހަލާކުވެފައެވެ. 40 މިލިޔަަން މީހުން ދިރިއުޅޭ އެ ސަރަޙައްދުތަކުގެ އާބާދީގެ 80 އިންސައްތަ ރައްޔިތުންނަކީ, ދަނޑުބިންތަކުގެ ނަފާއަށް ބަރޯސާވެފައިވާ ބަޔެކެވެ. އެހެންކަމުން, ފެންބޮޑުވުމާ ގުޅިގެން އެ މީހުންގެ ދިރިއުޅުން ވަނީ ވިއްސިވިހާލިވެފައެވެ.
އެތަކެއް އަހަރެއްގެ ހަނގުރާމައަށް ފަހު އަފްޣާނިސްތާނަކީ މި ވަގުތު ދުނިޔޭގައި އޮތް އެންމެ ފަޤީރު އެއް ޤައުމެވެ. އެއީ, ޖައްވަށް ވިހަ ގޭސްތައް ބޭރުކުރާ ޤައުމުތަކުގެ ލިސްޓުގެ އެންމެ ފުލުގައި އޮތް ޤައުމެކެވެ. ނަމަވެސް, މޫސުމީ މާހިރުން ބުނީ, އަފްޣާނިސްތާނަކީ މޫސުމީ ބަދަލުތަކުގެ ނުރައްކާ ވަރަށް ބޮޑަށް ކުރަމުންދާ ޤައުމެއް ކަމުގައެވެ.