ނައިޖީރިޔާގެ ހުޅަނގުއުތުރުގައި އޮންނަ ޒަމްފަރާގެ އަވަށްތަކަކަށް ހަތިޔާރު އެޅި ގުރޫޕަކުން އަރައި ޙަމަލާ ދިނުމަށްފަހު ޢާންމުންގެ 100އަށްވުރެ ގިނަ މީހުން ރަހީނު ކޮށްފިއެވެ. ހަތިޔާރު އެޅި ގުރޫޕުން ޙަމަލާ ދީފައި ވަނީ ޒަމްފަރާގެ ބިރްނިމް-މަގާޖީ ޑިސްޓްރިކްޓުގެ ތިން އަވަށަކެވެ. އެއީ ގޯރާ, މަޑޯމާވާ އަދި ޖަމްބޫޒޫއެވެ.
ބިރްނިމް-މަގާޖީގެ އޮފިޝަލެއް ކަމުގައިވާ އަލްހާޖީ ބަލާ ވިދާޅުވީ ރަހީނު ކޮށްފައިވާ މީހުންގެ ތެރޭގައި 38 ފިރިހެނުންނާއި 67 އަންހެނުންނާއި ކުޑަކުދިން ހިމެނޭ ކަމުގައެވެ. "ރަހީނު ކޮށްފައިވާ މީހުންގެ ޢަދަދު އެއަށްވުރެ ވެސް އިތުރުވުން އެކަށީގެންވޭ،" ބަލާ ވިދާޅުވިއެވެ.
ނައިޖީރިޔާގެ ހުޅަނގުއުތުރުގެ ސަރަޙައްދުތަކުގައި ހަތިޔާރު އެޅި ގިނަ ޢަދަދެއްގެ ގުރޫޕުތަކުން ދަނީ ހަރަކާތްތެރިވަމުންނެވެ. އަދި, މި ފަދަ ޙަމަލާތަކަށް ފަހު ގިނަ ޢަދަދެއްގެ ބަޔަކު ރަހީނު ކުރުން ވަނީ ޢާންމުވެފައެވެ. މީގެ ކުރިން ސްކޫލްތަކާއި ޔުނިވަރސިޓީތަކުގެ ދަރިވަރުން ވެސް ރަހީނު ކޮށްފައިވެއެވެ. ހަތިޔާރު އެޅި ގުރޫޕުތަކުން ރަހީނު ކޮށްފައިވާ މީހުން މިނިވަން ކުރަނީ, އެ ގުރޫޕުތަކުން އެދޭ މިންވަރަށް ރަހީނު ކޮށްފައިވާ މީހުންގެ ޢާއިލާތަކުން ފައިސާ ދެއްކުމުންނެވެ.
މި ފަދަ ގުރޫޕުތައް ހުއްޓުވަން ނައިޖީރިޔާގެ އަސްކަރިއްޔާއިން ދަނީ އޮޕަރޭޝަނެއް ހިންގަމުންނެވެ. މި އޮޕަރޭޝަންގެ ދަށުން, ބޯކޮށް ޖަންގަލި ހެދިފައިވާ ސަރަޙައްދުތަކުގައި ހަތިޔާރު އެޅި ގުރޫޕުތަކުން ކޭމްޕު ޖަހާފައިވާ ސަރަޙައްދުތަކަށް ނައިޖީރިޔާގެ އަސްކަރިއްޔާއިން ދަނީ ވައިގެ ޙަމަލާތައް އަމާޒު ކުރަމުންނެވެ.
ހަތިޔާރު އެޅި ގުރޫޕުން ޙަމަލާ ދީފައިވާ އެއް އަވަށް, މަޑޯމާވާގެ ވެރިޔާ އަމީނު އަލިއްޔު އަޝާ ވިދާޅުވީ, އެ ގުރޫޕުގެ ހަނގުރާމަވެރިން އެ އަވަށަށް އަރާފައި ވަނީ ސައިކަލުތަކެއްގައި ކަމުގައެވެ. އަދި, ޢާންމުން ދިރިއުޅޭ ގެދޮރަށް ބަޑީގެ ޙަމަލާތަކެއް ދިނުމަށް ފަހު, ގެދޮރަށް ވަދެ, އެ ގެތަކުގެ އަހުލުވެރިން ރަހީނު ކޮށްގެން ގެންގޮސްފައިވާ ކަމުގައެވެ.
"މިއީ, ހަތިޔާރު އެޅި ޖަމާޢަތްތަކާއި މަޑޯމާވާގެ އިސްވެރިންނާ ދެމެދު ވެފައިވާ ސުލްޙައިގެ އެއްބަސްވުމާ ޚިލާފަށް ހިންގާފައިވާ އަމަލެއް. ފެބުރުވަރީ މަހު ވެސް, އަޅުގަނޑުމެން ވާނީ އެ ގުރޫޕުން ރަހީނު ކޮށްފައިވާ އަސީރުންގެ ބަދަލުގައި ގިނަ ޢަދަދެއްގެ ފައިސާ ދީފައި. އެ ގުރޫޕަށް ފައިސާ ދީފައި ވަނީ މި އަވަށަށް ދޭ ޙަމަލާތައް ހުއްޓުވުމުގެ ބޭނުމުގައި،" އަޝާ ވިދާޅުވިއެވެ.
ނައިޖީރިޔާގައި މި ފަދަ ގޮތަކަށް ގިނަ ޢަދަދެއްގެ ބަޔަކު ރަހީނު ކޮށްގެން ގެންދިޔުމުގެ ކުށް ކުރަން ފަށާފައި ވަނީ, އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތް, ބޯކޯ ހަރަމުންނެވެ. މީގެ ދަހަރެއްހާ ދުވަސް ކުރިން އެ ޖަމާޢަތުން ވަނީ ނައިޖީރިޔާގެ ސްކޫލަކުން 200އެއްހާ ދަރިވަރުން ރަހީނު ކޮށްގެން ގެންގޮސްފައެވެ. އެއަށް ފަހު, ނައިޖީރިޔާގައި ހަރަކާތްތެރިވާ ހަތިޔާރު އެޅި އެހެން ޖަމާޢަތްތަކުން ވެސް ވަނީ މި ފަދަ އަމަލުތައް ހިންގަން ފަށާފައެވެ.