ގާ ހުދުވާތީ އީޕީއޭއިން އެޅި ފިޔަވަޅަށް މަޓީއާއި މަސީގެ ތާއީދު

ރާއްޖޭގެ ފަރުތަކުގައި ގާ ހުދުވާ މައްސަލަ ބޮޑުވާތީ އެންވަޔަރަންމަންޓަލް ޕްރޮޓެކްޝަން އޭޖެންސީ، އީޕީއޭއިން އެޅި ފިޔަވަޅުތަކަށް، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، މަސީ އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ މަޓީން ތާއިދުކޮށްފިއެވެ.

މިމަހުގެ ނުވަ ވަނަ ދުވަހު އީޕީއޭއިން ވަނީ ތަރައްޤީގެ މަޝްރޫޢުތަކުގެ ތެރެއިން ފަރުތަކަަށް ސީދާ އަދި ނުސީދާ ގޮތުން އަސަރުކުރާ މަސައްކަތްތަކަށް އީ.އައި.އޭ އާއި ބިންހިއްކުމާއި ފަޅު ފުންކުރުމަށް ބޭނުންވާ ހުއްދަތައް ދޫކުރުން ވަގުތީ ގޮތުން ހުއްޓާލާފައެވެ. އެގޮތުން ބިންހިއްކުން، ފަޅު ކޮނުން، ގޮނޑުދޮށަށް ވެލިއެޅުން، ޕަމްޕު ބޭނުންކޮށްގެން ވެލި ނެގުން، ފަރުމަތީ ހޮޅި އަދި ކޭބަލް އެޅުން، ބަންޑުވޯލް ޖެހުން އަދި މިނޫނަސް މެޝިނަރީ ބޭނުންކޮށްގެން ފަރުމަތީގައި މަސައްކަތް ކުރުން ފަދަ މަސައްކަތްތަކަށް އީ.އައި.އޭ އަދި ހުއްދަ ދޫކުރުން ވަނީ އެއް މަސް ދުވަހުގެ މުއްދަތަކަށް މެދުކަނޑާލާފައެވެ.

އީޕީއޭގެ މި ނިންމުމަށް ތާއީދުކޮށް މަޓީ އަދި މަސީން ނެރުނު ނޫސް ބަޔާންތަކުގައި ވަނީ މިއީ ރާއްޖޭގެ ފަރުތައް ހިމާޔަތްކޮށް، ތިމާވެށި ދެމެހެއްޓެނިވިގޮތެއްގައި ބެލެހެއްޓުމަށް މުހިއްމު ފިޔަވަޅުތަކެއްކަމަށެވެ. އަދި އެ ޖަމިއްޔާތަކުގެ މެމްބަރުން އީޕީއޭގެ ނިންމުމަށް އަމަލުކުރުމަށް ވަނީ އިލްތިމާސްކޮށްފައެވެ.

މި ދުވަސްވަރަކީ ކަނޑުތަކުގެ ލޮނުގަނޑުގެ ހޫނުމިން މަތިވުމުގެ ސަބަބުން ގާ ހުދުވުމުގެ މައްސަލަ ބޮޑު ދުވަސްވަރެކެވެ. ރާއްޖޭގެ ފަރުތަކުން ގާ ހުދުމުގެ މައްސަލަ އެންމެ ބޮޑަށް ފާހަގަވީ 1998 ވަނަ އަހަރުއެވެ. އޭގެފަހުން ގާ ހުދުވުމުގެ މައްސަލަ މެދުވެރިވާ މިންވަރު ގާތްވަމުން އަންނަކަން އީޕީއޭއިން ފާހަގަކުރެއެވެ.

އީޕީއޭއިން ވިދާޅުވީ މިފަދަ ދުވަސްވަރެއްގައި ހިންގާ ހަރަކާތްތަކުން ފަރުތަކަށް ކުރާ އަސަރުގެ ސަބަބުން ފަރުތައް އަލުން އިއާދަވާ މިންވަރު ލަސްވުން، އަދި އިއާދަވުމަށް ހުރަސް އެޅުމަކީ އެކަށީގެންވާ ކަމެއް ކަމަށެވެ. މިގޮތުން ރާއްޖޭގައި ފުޅާ ދާއިރާއެއްގައި ކުރެވުމުންދާ ފަޅު ފުންކުރުމާއި ބިން ހިއްކުމުގެ މަސައްކަތްތަކާއި، ބީޗް ނަރިޝްމަންޓް މަސައްކަތްތަކަކީ، މި މަސައްކަތްތަކުގެ ސަބަބުން ފަރުތަކުގެ މާހައުލަށް ނޭދެވޭ އަސަރުތަކެއް ކުރަމުންދާ ކަމެއްކަން އީޕީއޭއިން ފާހަގަކުރެއެވެ.

ގާ ހުދުވުމުގެ މައްސަލައާ ގުޅޭގޮތުން ކަމާބެހޭ ފަރާތްތަކުން އާއްމުކޮށްފައިވާ މައުލޫމާތުތަކަށް ބަލާއިރު ރާއްޖެ މި ވަގުތު އޮތީ "އެލާރޓް ލެވަލް 1" ގައެވެ. އަދި ރާއްޖޭގެ ގިނަ ސަރަހައްދުތަކަކުން ގާ ހުދުވާކަމުގެ ރިޕޯޓާއި އެކަމާއި ގުޅޭ މަޢުލޫމާތު ދަނީ ލިބެމުންކަމަށްވެސް އީޕީއޭއިން ވިދާޅުވެއެވެ.

ދިވެހި ރައްޔިތުންގެ ދިރިއުޅުމާއި ސީދާ ގޮތުންނާއި ނުސީދާ ގޮތުން ފަރުތައް ގުޅިލާމެހިފައިވާއިރު، ދުނިޔޭގެ ފިނިހޫނުމިން މަތިވުމާއި ގުޅިގެން މެދުވެރިވާ ހާދިސާތަކުގެ ސަބަބުން ފަރުތަކަށް ކުރާ އަސަރު ކުޑަކުރުމަށް ކުރެވެން އޮތް އެންމެހައި ކަމެއް ކުރުމަކީ ރާއްޖޭގެ ފަރުތަކުގެ ދެމެހެއްޓުމަށާއި، ފަރުތަކުގެ މައްޗަށް ބަރޯސާވާ ރާއްޖޭގެ އިޤްތިޞާދުގެ މައި ދެ ތަނބުކަމަށްވާ ފަތުރުވެރިކަމާއި މަސްވެރިކަމަށް ކޮށްފާނޭ ނޭދެވޭ އަސަރުތައް ކުޑަކުރުމަށްޓަކައި މުހިއްމު ކަމެއްގެ ގޮތުގައި އީޕީއޭއިން ދެކެއެވެ.