އިންޑިޔާގެ ވިޔަފާރީގެ މަރުކަޒީ ރަށް, މުމްބާއީގެ މަގެއްގެ އަރިމަތީގައި ޖަހާފައި ހުރި ބިޔަ ބިލްބޯޑެއް ވެއްޓި 14 މީހުން މަރުވެއްޖެއެވެ. ބިލްބޯޑު ވެއްޓިފައި ވަނީ, ޢާންމުން ދިރިއުޅޭ ޢިމާރާތްތަކަކާއި ޕެޓްރޯލް ސްޓޭޝަނެއްގެ މައްޗަށެވެ. އެއީ, ކާރޫބާރޫ ބޮޑު މަގެއްގެ އަރިމަތީގައި ޖަހާފައި ހުރި ބިލްބޯޑެކެވެ.
މި ހާދިސާ ހިނގާފައި ވަނީ މުމްބާއީގެ އިރުމަތީ ގަހަތްޕޯކަރުގައެވެ. މުމްބާއީގެ ކަމާ ގުޅޭ އިދާރާތަކުން ބުނީ ބިލްބޯޑު ވެއްޓިފައި ވަނީ މޫސުން ގޯސްވެ, ބޯކޮށް ވާރޭވެހި, ވައި ބާރުވި ވަގުތެއްގައި ކަމުގައެވެ. ވެއްޓުނު ބިލްބޯޑުގެ ދަށުގައި ގިނަ ޢަދަދެއްގެ ބަޔަކު ތާށިވިއެވެ. އެ މީހުން ސަލާމަތް ކުރެވުނީ އެތަކެއް ގަޑިއިރުގެ މަސައްކަތުން ކަމުގައި މުމްބާއީގެ އިދާރާތަކުން ބުންޏެވެ.
މޫސުން ގޯސްވުމާ ގުޅިގެން މުމްބާއީގެ ޢާންމު ދަތުރުފަތުރަށް ވެސް ހުރަސް އެޅުނެވެ. މި ގޮތުން, އެއްގަމު ދަތުރުފަތުރުގެ އިތުރުން މުމްބާއީގެ ވައިގެ ބަނދަރުގެ އުދުހުންތަކަށް ވެސް ހުރަސްތަކެއް ކުރިމަތިވިއެވެ. މުމްބާއީގެ މުނިސިޕަލް ކައުންސިލުން ބުނީ, ބިލްބޯޑު ވެއްޓުނު ހާދިސާގައި އަނިޔާވި 74 މީހަކަށް ހަސްފަތާލުގައި ފަރުވާ ދޭން ޖެހުނު ކަމުގައެވެ. އަދި, އޭގެ ތެރެއިން 31 މީހުން ފަރުވާއަށް ފަހު ދޫކޮށްލާފައިވާ ކަމުގައެވެ.