ޒަޔަނިސްޓު އިސްރާއީލުގެ ރަށްތަކަށް އަމާޒުކޮށް ލުބްނާނުގެ ޙިޒްބުالله ޖަމާޢަތުން ވަރުގަދަ ޑްރޯން ޙަމަލާތަކެއް ދީފިއެވެ. ޣައްޒާގެ މުސްލިމުންނަށް ވާގިވެރިވުމުގެ ގޮތުން ދީފައިވާ މި ޙަމަލާތައް އަމާޒު ކޮށްފައި ވަނީ އިސްރާއީލުގެ ތިބިރިޔާގައި އޮންނަ ޔަހޫދީ ފައުޖުގެ އަސްކަރީ މަރުކަޒަކަށެވެ.
ޙިޒްބުاللهއާއި ޔަހޫދީންނާ ދެމެދު ޙަމަލާ ބަދަލު ކުރަން ފަށާފައި ވަނީ, ފަލަސްޠީނުގެ ޣައްޒާގެ މުސްލިމުން ނެތިކޮށްލަން 2023 އޮކްޓޫބަރު 7ވަނަ ދުވަހު ޔަހޫދީ ފައުޖުން ފެށި ލާއިންސާނީ ޢުދުވާނާ ގުޅިގެންނެވެ. ޙިޒްބުاللهގެ ޙަމަލާތަކުގެ ބޭނުމަކީ, ޣައްޒާ ދިފާޢު ކުރަން ޖިހާދު ކުރަމުންދާ ޙަމާސް ޖަމާޢަތުގެ މުޖާހިދުންނަށް ހިތްވަރު ދިނުމާއި, ޣައްޒާ ޢުދުވާން ހުއްޓައިލަން ޔަހޫދީންނަށް ބާރު އެޅުމެވެ.
ޙިޒްބުاللهން ބުނީ, ތިބިރިޔާއަށް ދީފައިވާ ޑްރޯން ޙަމަލާތައް އަމާޒު ކޮށްފައި ވަނީ ޔަހޫދީ ފައުޖުގެ އަސްކަރީ މަތިންދާބޯޓުތަކުން ބޭނުން ކުރާ ޖާސޫސީ ނިޒާމަކަށް ކަމުގައެވެ. އަދި, ޙަމަލާތައް ކާމިޔާބުވި ކަމަށާއި, ޔަހޫދީ ފައުޖުގެ ޖާސޫސީ ނިޒާމު ނައްތައިލާފައިވާނެ ކަމުގައި ވެސް އެ ޖަމާޢަތުން ބުންޏެވެ. ނަމަވެސް, ޔަހޫދީ ފައުޖުން މި ކަން ކަށަވަރު ކޮށްދީފައެއް ނުވެއެވެ.
ޒަޔަނިސްޓު އިސްރާއީލުން ބުނީ, ޙިޒްބުاللهގެ ޙަމަލާތަކެއްގައި ގެއްލުންތަކެއް ލިބުނު ކަމުގައެވެ. ނަމަވެސް, އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. ޙިޒްބުاللهން ޔަހޫދީ ފައުޖުގެ އަމާޒުތަކަށް ވަރުގަދަ ޑްރޯން ޙަމަލާތަކެއް ދީފައި މި ވަނީ, އެ ޖަމާޢަތުގެ އިސް ކޮމާންޑަރެއް ކަމުގައިވާ ޙުސައިން މިކިއްޔު އަވަހާރަ ކޮށްލުމާ ގުޅިގެންނެވެ. އޭނާ ޝަހީދު ކޮށްލާފައި ވަނީ ޔަހޫދީ ފައުޖުން ލުބްނާނުގެ ދެކުނަށް ދިން ވަައިގެ ޙަމަލާތަކެއްގައެވެ.
ހުސްވި އަހަރުގެ އޮކްޓޫބަރު 8ން ފެށިގެން ޙިޒްބުاللهއާއި ޔަހޫދީ ފައުޖާ ދެމެދު ބަދަލު ކުރަމުންދާ ޙަމަލާތަކުގައި ޝަހީދު ކޮށްލާފައިވާ ޙިޒްބުاللهގެ ހަނގުރާމަވެރިންގެ ޢަދަދު ވަނީ 260އަށް އުފުލިފައެވެ. މީގެ އިތުރުން, ޔަހޫދީ ފައުޖުން ވަނީ ލުބްނާނުގެ ޢާންމުންގެ ގިނަ ޢަދަދެއްގެ ބަޔަކު ވެސް ޝަހީދު ކޮށްލާފައެވެ. އޭގެ ތެރޭގައި ގިނައީ ޞިއްޙީ ޚިދުމަތްތެރިންނެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 35,233އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 79,141އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.