އީރާނުގެ ރައީސް އިބްރާހީމް ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިއްޖެއެވެ. އެ ޤައުމުގެ ދާޚިލީ ވަޒީރު އަޙްމަދު ވަޙީދީ ވިދާޅުވީ, ކުއްލި ހާލަތެއް މެދުވެރިވެ, ރައީސީ އިންނެވި ހެލިކޮޕްޓަރު ބިމަށް ތިރި ކޮށްފައި ވަނީ ވަރަށް ބާރަށް ކަމުގައެވެ. މި ހާދިސާ ހިނގާފައި ވަނީ އީރާނުގެ ހުޅަނގު އުތުރު އީސްޓް އަޒަރްބައިޖާން ޕުރޮވިންސުގެ ޖިލްފާގައެވެ.
ވަޙީދީ ވިދާޅުވީ, ރައީސީ އިންނެވި ހެލިކޮޕްޓަރު ޖެއްސި ސަރަޙައްދަށް, ކުއްލި ހާލަތްތަކުގައި ހަރަކާތްތެރިވާ ޓީމުތަކުން ދަތުރު ކޮށްފައިވާ ކަމުގައެވެ. އީރާނުގެ އައިއާރްއެންއޭ ނޫސް އޭޖެންސީން ބުނީ, މި ހާދިސާ ހިނގި ވަގުތު ރައީސީ އަރިހުގައި އެ ޤައުމުގެ ޚާރިޖީ ވަޒީރު ޙުސައިން އަމީރް ޢަބްދުއްލުހައްޔާނީ ވެސް އިންނެވި ކަމުގައެވެ. މި ހާދިސާގައި ރައީސީގެ ފުރާނަފުޅަށް ނުރައްކާވިކަން އަދި ސާފެއް ނޫނެވެ.
ކުއްލި ހާލަތްތަކުގައި ހަރަކާތްތެރިވާ ޓީމުތަކުން, ހާދިސާ ހިނގި ސަރަޙައްދަށް ދަތުރު ކޮށްފައިވީ ނަމަވެސް, އެ ސަރަޙައްދުގެ މޫސުން ތަންނުދިނުމުގެ ސަބަބުން އެ މީހުންނަށް ދަތިތަކާ ކުރިމަތިވެފައިވާ ކަމުގައި ވަޙީދީ ވިދާޅުވިއެވެ. ރައީސީ ދަތުރު ކުރެއްވި ހެލިކޮޕްޓަރު ހޯދުމަށް އީރާނުގެ އަސްކަރީ ޑްރޯންތަކުން ވެސް މިހާރު ދަނީ ހަރަކާތްތެރިވަމުންނެވެ.
އީރާނުގެ ރައީސްކަމުގެ މަޤާމަށް ރައީސީ އިންތިޚާބު ކޮށްފައި ވަނީ 2021ވަނަ އަހަރުއެވެ. ވެރިކަމާ ހަވާލުވެ ވަޑައިގެންނެވުމަށް ފަހު ރައީސީ ވަނީ އެ ޤައުމުގެ ދީނީ އަދި އަޚްލާޤީ ޤާނޫނުތަކާއި ޤަވާޢިދުތައް ހަރުކަށި ކުރެއްވުމުގެ މަސައްކަތް ފައްޓަވާފައެވެ. އެ ކަމާ ދެކޮޅު ހެދުމުގެ ގޮތުން އީރާނުގެ އެކި ކަންކޮޅުތަކުގައި ބޮޑެތި މުޒާހަރާތަކެއް ބާއްވާފައިވާ ކަން ފާހަގަ ކޮށްލަން ޖެހެއެވެ.