އީރާނުގެ ރައީސް އިބްރާހީމް ރައީސީ ދަތުރުކުރައްވަމުން ގެންދެވި ހެލިކޮޕްޓަރު ވެއްޓުމާ ގުޅިގެން އޭނާގެ ފުރާނަފުޅަށް ނުރައްކާވެފައިވާ ކަމަށް ބެލެވޭ ކަމުގައި އެ ޤައުމުގެ އޮފިޝަލަކު ބުނެފިއެވެ. ނަން ހާމަކޮށްފައި ނުވާ އޮފިޝަލް ބުނީ, ހެލިކޮޕްޓަރު ވެއްޓުނު ސަރަޙައްދުން ލިބެމުން ދަނީ ކަންބޮޑުވާ ފަދަ މަޢުލޫމާތުތަކެއް ކަމަށާއި, ރައީސީގެ ހާލުކޮޅު އަދި ސާފު ނުވާ ކަމުގައެވެ.
އީރާނުން ކުރިން ބުނެފައި ވަނީ, ރައީސީ ދަތުރު ކުރައްވަމުން ގެންދެވި ހެލިކޮޕްޓަރަށް މައްސަލައެއް ދިމާވެ, ކުއްލި ގޮތަކަށް ޖައްސަން ޖެހުނު ކަމުގައެވެ. އަދި, ހެލިކޮޕްޓަރު ޖެއްސި ސަރަޙައްދަށް ކުއްލި ހާލަތްތަކުގައި ހަރަކާތްތެރިވާ ޓީމުތަކުން ދަތުރު ކުރަމުންދާ ކަމުގައެވެ.
ދާޚިލީ ވަޒީރު އަޙްމަދު ވަޙީދީ ވިދާޅުވީ, ކުއްލި ހާލަތެއް މެދުވެރިވެ, ރައީސީ އިންނެވި ހެލިކޮޕްޓަރު ބިމަށް ތިރި ކޮށްފައި ވަނީ ވަރަށް ބާރު ދުވެލީގައި ކަމުގައެވެ. މި ހާދިސާ ހިނގާފައި ވަނީ އީރާނުގެ ހުޅަނގު އުތުރު އީސްޓް އަޒަރްބައިޖާން ޕުރޮވިންސުގެ ޖިލްފާގައެވެ. އިތުރު ތަފުސީލެއް އޭނާ ވެސް ނުދެއްވައެވެ.
މި ހާދިސާ ހިނގި ވަގުތު, ރައީސީއާ އެކު ހެލިކޮޕްޓަރުގެ އެ ޤައުމުގެ ޚާރިޖީ ވަޒީރު ޙުސައިން އަމީރް ޢަބްދުއްލުހައްޔާނީ ވެސް އިންނެވިއެވެ. އީރާނުގެ ދަޢުލަތުގެ މީޑިޔާއިން ބުނީ, ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިފައި ވަނީ މޫސުން ގޯސްވުމާ ގުޅިގެން ކަމުގައެވެ. އަދި, މޫސުން ތަންނުދިނުމުގެ ސަބަބުން, ރައީސީއާ އެކު ހެލިކޮޕްޓަރު ތިއްބެވި ބޭފުޅުން ސަލާމަތް ކުރަން ކުރަމުންދާ މަސައްކަތްތަކަށް ހުރަސް އެޅިފައިވާ ކަމުގައެވެ.
ހެލިކޮޕްޓަރު ވެއްޓުނު ސަރަޙައްދަށް ބޯކޮށް ވާރޭ ވެހެމުންދާ ކަމުގައި ރިޕޯޓުތައް ބުނެއެވެ. އަދި, ބޯކޮށް ވާރޭވެހި, ކިސަޑު ހެދުމާ ގުޅިގެން, ހެލިކޮޕްޓަރުގައި ތިބި މީހުން ސަލާމަތް ކުރުމަށް ދަތިތަކެއް ކުރިމަތިވެފައިވާ ކަމުގައި އެ ޤައުމުގެ ދަޢުލަތުގެ މީޑިޔާއިން ބުނެއެވެ.
މި ހާދިސާއާ ގުޅިގެން އީރާނުގެ ދަޢުލަތުގެ ޓީވީން ވަނީ ޢާންމު ޕުރޮގުރާމުތައް ދެއްކުން މެދުކަނޑައިލާފައެވެ. އަދި, ރައީސީގެ ފުރާނަފުޅު ސަލާމަތްވޭތޯ އީރާނުގެ އެކި ކަންކޮޅުތަކުގައި ޢާންމު ރައްޔިތުން ދުޢާ ކުރާ މަންޒަރު ވަގުތުން ދުރަށް ދައްކަން ފަށާފައެވެ. އޭނާ ސަލާމަތް ކުރުމަށް ކުރަމުންދާ މަސައްކަތްތަކުގެ މަންޒަރުތައް ވެސް ދަޢުލަތުގެ މީޑިޔާއިން ދަނީ ދައްކަމުންނެވެ.
އީރާނުގެ ރައީސްކަމުގެ މަޤާމަށް 63 އަހަރުގެ ރައީސީ އިންތިޚާބު ކޮށްފައި ވަނީ 2021ވަނަ އަހަރުއެވެ. ވެރިކަމާ ހަވާލުވެ ވަޑައިގެންނެވުމަށް ފަހު ރައީސީ ވަނީ އެ ޤައުމުގެ ދީނީ އަދި އަޚްލާޤީ ޤާނޫނުތަކާއި ޤަވާޢިދުތައް ހަރުކަށި ކުރެއްވުމުގެ މަސައްކަތް ފައްޓަވާފައެވެ. އެ ކަމާ ދެކޮޅު ހެދުމުގެ ގޮތުން އީރާނުގެ އެކި ކަންކޮޅުތަކުގައި ބޮޑެތި މުޒާހަރާތަކެއް ބާއްވާފައިވާ ކަން ފާހަގަ ކޮށްލަން ޖެހެއެވެ.