އީރާނުގެ ރައީސް އިބްރާހީމް ރައީސީ އަވަހާރަވެއްޖެއެވެ. ރައިސީ އަވަހާރަވީކަން އިސްލާމިކް ރިޕަބްލިކް ނިއުސް އެޖެންސީ (އިރްނާ)އިން ވަނީ ކަށަވަރުކޮށްދީފައެވެ.
ރައިސީއާއެކު ދަތުރުކުރެއްވި އެޤައުމުގެ ޚާރިޖީ ވަޒީރު ހުސައިން އަމީރު އަބްދުﷲ ހިޔާންއާ، އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކް ރަހުމަތީ އަދި ތަބްރީޒް މިސްކިތުގެ އިމާމް އާޔަތުالله އަލްހާޝިމީވެސް އަވަހާރަވެފައިވާކަމަށް އިރްނާއިން ވަނީ ރިޕޯޓުކޮށްފައެވެ. އީރާނުގެ ކަމާބެހޭ ފަރާތްތަކުން ބުނެފައިވަނީ ހެލިކޮޕްޓަރުގައި ދަތުރުކުރި މީހުންގެ ހަށިގަނޑުތައް ދެނެނުގަނެވޭ ވަރަށް އަނދާފައިވާކަމަށެވެ.
ރައީސާއި ފޮރިން މިނިސްޓަރު އަވަހާރަވުމާ ގުޅިގެން ކެބިނެޓުންވަނީ ކުއްލި ބައްދަލުވުމެއް ބާއްވާފައެވެ. ދެން އެޤައުމުގައި އަމަލު ކުރާނެ ގޮތް އެ ޤައުމުގެ ޤާނޫނު އަސާސީގެ 131ވަނަ މާއްދާގައި ބަޔާން ކޮށްފައިވެއެވެ. އެ މާއްދާގައި ބުނެފައި ވަނީ, ރައީސްކަމުގެ މަޤާމު ފުރުއްވަމުން ގެންދަވާ ބޭފުޅަކު އަވަހާރަވެއްޖެ ނަމަ, ނުވަތަ މަޤާމުގެ މަސްއޫލިއްޔަތުތައް ފުރިހަމަ ކުރައްވަން އުޒުރުވެރިވާ ހާލަތެއް މެދުވެރިވެއްޖެ ނަމަ, ފުރަތަމަ ނައިބު ރައީސްގެ މަޤާމު ފުރުއްވަމުން ގެންދަވާ ބޭފުޅަކު ރައީސް ކަމުގެ މަސްއޫލިއްޔަތުތަކާ ހަވާލުވެ ވަޑައިގަންނަވަން ޖެހޭނެ ކަމުގައެވެ. އެ ކަން ކުރެވޭނީ އީރާނުގެ ޒައީމް އަދި ރޫހާނީ ލީޑަރުގެ ރުހުމާ އެކުގައި ކަމަށް ވެސް އެ މާއްދާގައި ބަޔާން ކޮށްފައިވެއެވެ. އެއަށްފަހު, ފުރަތަމަ ނައިބު ރައީސްގެ މަޤާމު ފުރުއްވަމުން ގެންދަވާ ބޭފުޅާއާއި, ޤާނޫނު ހަދާ މަޖިލީހުގެ ރައީސާއި, ޝަރުޢީ ދާއިރާގެ އިސްވެރިޔާގެ މައްޗަށް އެކުލެވިގެންވާ ކައުންސިލެއް އެކުލަވައިލަން ޖެހޭނެއެވެ. އައު އިންތިޚާބެއް ބާއްވައި, އައު ރައީސަކު އިންތިޚާބު ކުރުމުގެ ކަންކަން ވިލަރެސް ކުރަން ޖެހޭނީ އެ ކައުންސިލުންނެވެ.
އީރާނުގެ ރައީސް އިބްރާހީމް ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހާސިދާ ހިނގާފައި ވަނީ އީރާނުގެ ހުޅަނގު އުތުރު އީސްޓް އަޒަރްބައިޖާން ޕުރޮވިންސުގެ ޖިލްފާގައެވެ.
އީރާނުގެ ރައީސްކަމުގެ މަޤާމަށް ރައީސީ އިންތިޚާބު ކޮށްފައިވަނީ 2021ވަނަ އަހަރުއެވެ.