ކައްދޫ އެއަޕޯޓުގައި ފަތުރުވެރިކަމަށް ޚާއްސަ ސަރަޙައްދެއް ތަރައްޤީކުރަނީ

ކައްދޫ އެއަޕޯޓުގައި ފަތުރުވެރިކަމަށް ޚާއްސަ ސަރަޙައްދެއް ތަރައްޤީކުރުމުގެ މަސައްކަތް ފެށުމަށް ތައްޔާރުވެފައިވާކަމަށް ރީޖަނަލް އެއަޕޯޓްސްއިން ވިދާޅުވެއްޖެއެވެ.

މިދިޔަ މަހުގެ 11 ވަނަ ދުވަހު ކައްދޫ އެއަރޕޯޓް ރީޖަނަލް އެއަރޕޯޓްސްގެ ދަށަށް ބަދަލުކޮށް އެއަރޕޯޓް ތަރައްޤީކުރަން ޗައިނާގެ ސީއޭއެމްސީއީ ކުންފުންޏާއި ވަނީ ހަވާލުކޮށްފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ރީޖަނަލް އެއަޕޯޓްސްގެ މެނޭޖިން ޑިރެކްޓަރ އަޙުމަދު މުބީން ވިދާޅުވީ ކައްދޫ އެއަޕޯޓުގެ ކަންކަން އެ ކުންފުނީގެ ދަށަށް ބަދަލުކުރުމާއެކު ކުރިން އެއަރޕޯޓް ހިންގަމުން އައި ކޭ.އޭ.ސީ.އެލްގެ ދަރަންޏާއި އެސެޓްތައް 4 މަސްދުވަހުގެ ތެރޭގައި ދެނެގަނެވޭނެކަމަށެވެ. އަދި އެއަޕޯޓުގައި އިތުރަށް ކުރެވިދާނެ ކަންތައްތައް ދެނެގަތުމުގެ މަސައްކަތްތައް ކުރައްވަމުން ގެންދަވާކަމަށް މުބީން ވިދާޅުވިއެވެ.

މުބީން ވިދާޅުވީ އެއަޕޯޓް އޮތީ ވަރަށް ދަށް ހާލަތެއްގައިކަމަށާއި ހާލަތު ރަނގަޅު ކުރުމަށް މިހާރުވެސް ކުރެވެން ހުރި ކަންތައްތައް ކުރުމަށް ފައިނޭންސް ހޯދުމުގެ މަސައްކަތް ކުރަމުން އަންނަކަމަށެވެ. އެގޮތުން ހާލަތު ދަށްކޮށް ހުރި ތަންތަން ތަރައްޤީކުރުމަށްޓަކައި 40 މިލިޔަނެއްހާ ރުފިޔާ ޚަރަދުވާނެކަން މުބީން ފާހަގަކުރެއްވިއެވެ.

ކައްދޫ އެއަރޕޯޓް ތަރައްޤީކުރުމުގެ އިތުރަށް އެ ސަރަޙައްދު ފަތުރުވެރިކަމަށް ޚާއްސަ ސަރަޙައްދެއްގެ ގޮތުގައި ތަރައްޤީކުރުމަށްވެސް ވަނީ ހަމަޖެހިފައެވެ. އެގޮތުން މިވަގުތު ހާލަތު ދަށްކޮށް ހުރި 10 ކޮޓަރި އިތުރަށް ތަރައްޤީކޮށް އިތުރު 20 ކޮޓަރިއެއް ތަރައްޤީކުރުމުގެ މަސައްކަތް ކުރިއަށް އޮތް 2 މަސްދުވަހުގެ ތެރޭގައި ފަށާނެކަމަށް މުބީން ވިދާޅުވިއެވެ. މީގެ އިތުރުން އެއަޕޯޓުގައި މިހާރަށް ވުރެ ބޮޑަށް ޖެޓް ފިއުލް ލިބޭނެ އިންތިޒާމް ހަމަޖެއްސުމުގެ މަސައްކަތުގެ ދަށުން އެކަމުގެ ފީސިބިލިޓީތައް ހަދަމުން އަންނަކަމަށާއި ކައްދޫ ބަނދަރުން ޑީސަލް ލިބޭނެ އިންތިޒާމްވެސް މި މަޝްރޫއާއެކު ޤާއިމްކުރެވޭނެކަމަށް މުބީން ވިދާޅުވިއެވެ.

" ކުރިން އަޅުގަނޑުމެންގެ މެންޑޭޓްގައި އޮތީ އެއަޕޯޓް ބެލެހެއްޓުން. މިހާރު ކުންފުނިތައް ބާރުވެރިކުރުމުގެ ސިޔާސަތުގެ ދަށުން އާމްދަނީ ލިބޭނެ އިތުރު ގޮތްތައް މެންޑޭޓަށް ވާނީ ހިމަނާފައި. އެގޮތުން ފަތުރުވެރިކަމައި ފިއުލް ވިއްކުން ހިމަނައިގެން 15 ވަރަކަށް ކަންތައް މެންޑޭޓްގައި ވާނީ ހިމަނާފައި."ރީޖަނަލް އެއަޕޯޓްސްގެ މެނޭޖިން ޑިރެކްޓަރ އަޙުމަދު މުބީން ވިދާޅުވިއެވެ.

ކައްދޫ އަރޕޯޓު ބޮޑުކުރުމަށް ބޭނުންވާ ބިން ހިއްކުމާއި، ހިއްކާ ސަރަަހައްދު ހިމާޔަތްކުރުމުގެ މަސައްކަތް ވަނީ ފަށާފައެވެ.

ކައްދޫ އެއަރޕޯޓް އިންޓަރނޭޝަނަލް ފެންވަރަށް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދެކެވެ. ކައްދޫ އެއަރޕޯޓަކީ ރާއްޖޭގައި އެންމެ ފުރަތަމަ ތަރައްްޤީކުރި ޑޮމެސްޓިކް އެއަރޕޯޓެވެ. އެ އެއަރޕޯޓް ތަރައްޤީކޮށް ހުޅުވާފައިވަނީ 6 ޑިސެމްބަރު 1986 ވަނަ އަހަރުއެވެ. ނަމަވެސް ފާއިތުވި ދިގު މާޒީގައި އެ އެއަރޕޯޓަށް ތަރައްޤީ އައިސްފައ ނުވުމަކީ ހައްދުންމަތީގެ ރައްޔިތުންގެ ބޮޑު ކަންބޮޑުވުމެކެވެ. ރައީސް ނިންމަވާފައިވަނީ ކައްދޫ އެއަރޕޯޓް އިންޓަރނޭޝަނަލް ފެންވަރަށް ތަރައްޤީކުރުމުގެ އިތުރުން، ހައްދުންމަތީގައި އިތުރު އެއަރޕޯޓެއްވެސް ތަރައްޤީކުރުމަށެވެ.