އީރާނުގެ ރައީސް އިބްރާހީމް ރައީސީ އަވަހާރަވީ އޭނާ ދަތުރުކުރެއްވި ހެލިކޮޕްޓަރު ވެއްޓުމުންނެވެ. އެ ޙާދިޘާގައި ރައީސީގެ އިތުރުން އެ ޤައުމުގެ ޚާރިޖީ ވަޒީރު ޙުސައިން އަމީރު ޢަބްދުއްލުހައްޔާނީ ވެސް ވަނީ އަވަހާރަވެފައެވެ. އެއާއެކު ރައީސީ ދަތުރުކުރެއްވި ހެލިކޮޕްޓަރަށް ދުނިޔޭގެ ނަޒަރު ވަނީ ހުއްޓިފައެވެ.
ރައީސީ ދަތުރުކުރައްވަނިކޮށް ވެއްޓިފައި ވަނީ ބެލް 212 މަރުކައިގެ ހެލިކޮޕްޓަރެކެވެ. ވިއެތުނާމު ހަނގުރާމައިގެ ދުވަސްވަރު އެންމެ ފުރަތަމަ އުފެއްދި ބެލް 212 މަރުކައިގެ ހެލިކޮޕްޓަރަކީ ދުނިޔޭގެ އެކި ޤައުމުތަކުގެ ސަރުކާރުތަކުގެ އިތުރުން އަމިއްލަ މީހުން ވެސް ބޭނުންކުރަމުންދާ އުޅަނދެކެވެ.
ބެލް މަރުކައިގެ ހެލިކޮޕްޓަރު އެންމެ ފުރަތަމަ އުފައްދާފައި ވަނީ 1960ގެ އަހަރުތަކުގެ ތެރޭގައި ކެނެޑާގެ އަސްކަރީ ބޭނުންތަކަށެވެ. އެ ހެލިކޮޕްޓަރުގައި ދެ އިންޖީނު ހަރުކޮށްފައި ހުރުމުން އެ އުޅަނދު ވެގެން ދިޔައީ މަޤްބޫލު އުޅަނދަކަށެވެ. އެއާއެކު 1971 ވަނަ އަހަރުން ފެށިގެން ކެނެޑާގެ އިތުރުން އެމެރިކާގެ އަސްކަރިއްޔާއިން ވެސް އެ ހެލިކޮޕްޓަރު ބޭނުން ކުރަން ފެށިއެވެ.
ބެލް މަރުކައިގެ ހެލިކޮޕްޓަރުތަކުގެ މަޤްބޫލުކަން އިތުރުވީ އެކި ބޭނުންތަކަށް އެ އުޅަނދުތައް ބޭނުން ކުރެވޭތީއެވެ. އެ ގޮތުން ހަނގުރާމައިގެ އިތުރުން ފަސިންޖަރުން އުފުލުމަށާއި މުދާ އުފުލުމަށާއި އަލިފާން ނިއްވުމަށް އެ ހެލިކޮޕްޓަރު ބޭނުން ކުރެވެއެވެ. އެއިން ކޮންމެ ކަމަކަށް ހެލިކޮޕްޓަރު ބޭނުންކުރުމަށް ފަސޭހައިން ބަދަލުކޮށްލެވެއެވެ.
ރައީސީ ދަތުރުކުރައްވަނިކޮށް ވެއްޓުނު ހެލިކޮޕްޓަރު ޢާންމުކޮށް ބޭނުންކުރަމުންދިޔައީ އީރާނުގެ ސަރުކާރުގެ ވެރިން ދަތުރުކުރެއްވުމަށެވެ. އެ ހެލިކޮޕްޓަރުގައި އެއްފަހަރާ 15 މީހުންނަށް ދަތުރުކުރުމުގެ ޙުއްދަ އޮވެއެވެ.
ވެއްޓުނު ބެލް 212 މަރުކައިގެ ހެލިކޮޕްޓަރު ބޭނުންކުރާ ރަސްމީ ވުޒާރާތަކުގެ ތެރޭގައި އެމެރިކާގެ ތަންފީޒީ ބާރުތަކާއި އަލިފާން ނިއްވާ ފަރާތްތަކާއި ޖަޕާނުގެ ކޯސްޓް ގާޑާއި ތައިލޭންޑުގެ ފުލުހުން ހިމެނެއެވެ. އީރާނުގައި އެ މަރުކައިގެ ކިތައް ހެލިކޮޕްޓަރު ބޭނުން ކުރާ ކަމެއް ކަށަވަރު ކުރެވިފައެއް ނުވެއެވެ. ނަމަވެސް ރަސްމީ ލިޔުންތަކުން ދައްކާ ގޮތުގައި އެ މަރުކައިގެ 10 ހެލިކޮޕްޓަރު އެ ޤައުމުގެ ވައިގެ ސިފައިންނާއި ކަނޑުގެ ސިފައިން ބޭނުން ކުރަމުން ދެއެވެ.
މީގެ ކުރިން ވެސް ބެލް 212 މަރުކައިގެ ހެލިކޮޕްޓަރުތައް ވެއްޓުމުގެ ޙާދިޡާތައް ހިނގާފައިވެއެވެ. އެ ގޮތުން 2018 ވަނަ އަހަރު އެ މަރުކައިގެ ހެލިކޮޕްޓަރެއް އީރާނުގައި ވެއްޓި ހަތަރު މީހުން މަރުވެފައިވެއެވެ. އެފަދަ ޙާދިޡާއެއް އެންމެ ފަހުން ހިނގާފައިވަނީ 2023 ވަނަ އަހަރުގެ ސެޕްޓެންބަރު މަހުގެ ތެރޭގައެވެ. އެ ފަހަރު އަމިއްލަ ފަރާތަކުން ދުއްވި ހެލިކޮޕްޓަރު ވެއްޓިފައި ވަނީ އެކުވެރި ޢަރަބި އިމާރާތުގައެވެ.