ޔަހޫދީ ފައުޖުން ޖަބާލިޔާގެ ހަސްފަތާލުތަކާއި ޢާންމުންގެ ގެދޮރަށް ރަޙުމު ކުޑަ ޙަމަލާތަކެއް ދީފި

ފަލަސްޠީނުގެ ޣައްޒާގެ މުސްލިމުން ޝަހީދުކޮށް, ނެތިކޮށްލުމަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި އެ ސަހަރުގެ އުތުރުގައި އޮތް ޖަބާލިޔާ ރެފިއުޖީ ކޭމްޕަށް ވަރުގަދަ ޙަމަލާތަކެއް ދީފިއެވެ. މި ޙަމަލާތައް އަމާޒު ކޮށްފައި ވަނީ ޖަބާލިޔާގައި ޢާންމުން ދިރިއުޅޭ ގެދޮރާއި ހަސްފަތާލުތަކަށެވެ. މީގެ އިތުރުން, ޣައްޒާގެ އެންމެ ދެކުނުން އޮތް ރަފަޙަށް ވެސް ޔަހޫދީ ފައުޖުން ދަނީ ރަޙުމު ކުޑަ ޙަމަލާތަކެއް އަމާޒު ކުރަމުންނެވެ.

މެދުކެނޑުމެއް ނެތް މި ޙަމަލާތަކާ ގުޅިގެން ޣައްޒާގެ އެންމެ އުތުރާއި ދެކުނުގައި ދިރިއުޅޭ ރައްޔިތުން ދަނީ އެހެން ހިސާބުތަކަށް ބަދަލުވާން މަސައްކަތް ކުރަމުންނެވެ. ޔަހޫދީ ފައުޖުގެ އެންމެ ފަހުގެ ޙަމަލާތަކާ ގުޅިގެން ޣައްޒާގެ އުތުރާއި ދެކުނުން 800,000އެއްހާ މީހުން އެހެން ހިސާބުތަކަށް ދަތުރު ކޮށްފައިވެއެވެ. ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރަން ވެސް ޔަހޫދީ ފައުޖުން ވަނީ ހުރަސް އަޅާފައެވެ.

މީގެ 75 އަހަރު ކުރިން ބިނާ ކޮށްފައިވާ ޖަބާލިޔާ ރެފިއުޖީ ކޭމްޕަށް ޔަހޫދީ ފައުޖުން އަރާފައި ވަނީ ބަރުހަތިޔާރާއި އަސްކަރީ ޓޭންކުފަހަރާ އެކުގައެވެ. އަސްކަރީ ޓޭންކުތަކާއި މަތިންދާބޯޓުތައް ބޭނުންކޮށް ޖަބާލިޔާގެ ޢާންމުންގެ ގެދޮރާއި ހަސްފަތާލުތަކަށް ޙަމަލާތައް އަމާޒު ކުރުމުގެ އިތުރުން ޔަހޫދީ ފައުޖުން ދަނީ ބުލްޑޯޒަރު ފަދަ އާލާތްތައް ބޭނުން ކޮށްގެން ޢާންމުންގެ ގެދޮރާއި, ފިހާރަތަކާއި މާރުކޭޓުތައް ވެސް ސުންނާފަތި ކުރަމުންނެވެ.

ޖަބާލިޔާގައި ހުންނަ ކަމާލް ޢަދްވާން ހަސްފަތާލާއި އަލް-ޢަވްދާ ހަސްފަތާލަށް ވެސް ޔަހޫދީ ފައުޖުން ވަނީ ވަރުގަދަ ޙަމަލާތަކެއް ދީފައެވެ. ކަމާލް ޢަދްވާން ހަސްފަތާލުގެ ވެރިޔާ ހުސާމް އަބޫ ޞަފިއްޔާ ވިދާޅުވީ ޔަހޫދީ ފައުޖުގެ އަސްކަރީ މަތިންދާބޯޓުތަކުން އެ ހަސްފަތާލުގެ އެމަރޖެންސީ ޑިޕާޓްމަންޓަށް ތިން ފަހަރު މިސައިލް ޙަމަލާތައް ދީފައިވާ ކަމުގައެވެ. އަދި, ހަސްފަތާލު ޢިމާރާތުގެ ބޮޑު ބައެއް ސުންނާފަތި ކޮށްލާފައިވާ ކަމުގައެވެ.

އެ ހަސްފަތާލަށް ޔަހޫދީ ފައުޖުން ޙަމަލާ ދޭން ފެށުމާ އެކު, އެ ތަނުގައި މަސައްކަތް ކުރާ ޑޮކްޓަރުންނާއި, ނަރުހުންނާއި ޞިއްޙީ ޚިދުމަތްތެރިން ވަނީ, އެ ތަނުގައި ތިބި ބަލި މީހުން ހަސްފަތާލުން ބޭރަށް ނެރެން މަސައްކަތް ކޮށްފައެވެ. ޞަފިއްޔާ ވިދާޅުވީ, ކުޑަކުދިންނާއި އުމުރުން ދުވަސްވީ މީހުންނަށް ފަރުވާދޭން ބޭނުން ކުރާ ޢިމާރާތްތައް ބޭނުން ނުކުރެވޭ ވަރަށް ހަލާކު ކޮށްލާފައިވާ ކަމުގައެވެ.

މީގެ އިތުރުން, ޔަހޫދީ ފައުޖުން ވަނީ ބަރުހަތިޔާރާއި އަސްކަރީ ޓޭންކުފަހަރާ އެކު އަލް-ޢަވްދާ ހަސްފަތާލު ވަށައިލާފައެވެ. އަދި, އެ ތަނަށް ޙަމަލާ ދޭން ފަށާފައެވެ. ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިއޭސޮސް ވަނީ މި ކަމާ މެދު ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ, ޔަހޫދީ ފައުޖުގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންނަށް ފަރުވާ ދެވޭނެ ގޮތެއް ޣައްޒާގައި މިހާރު ނެތް ކަމުގައެވެ.

"އުތުރު ޣައްޒާގައި ޞިއްޙީ ފަރުވާ ފޯރުކޮށްދެމުން ދަނީ އެންމެ ދެ ހަސްފަތާލުން. އެ ތަންތަން ބަންދު ނުކޮށް, މެދުކެނޑުމެއް ނެތި ފަރުވާގެ ޚިދުމަތްތައް ފޯރުކޮށްދިނުމަކީ މުހިންމު ކަމެއް،" އެ ހަސްފަތާލުތަކަށް ޔަހޫދީ ފައުޖުގެ ޙަމަލާތައް އަމާޒު ކުރަމުންދާ ކަން ފާހަގަ ކުރައްވައި ޓެޑްރޯސް ވިދާޅުވިއެވެ.

ޣައްޒާގެ ދެކުނުގައި އޮތް ޚާން ޔޫނިސާއި ރަފަޙަށް ވެސް ޔަހޫދީ ފައުޖުން ދަނީ ވަރުގަދަ ޙަމަލާތަކެއް އަމާޒު ކުރަމުންނެވެ. އޭގެ ތެރެއިން ޚާން ޔޫނިސްގައި ޢާންމުން ދިރިއުޅޭ ގެއަކަށް ބޮންއަޅައި ޔަހޫދީ ފައުޖުން ވަނީ ތިން ކުޑަކުދިން ޝަހީދު ކޮށްލާފައެވެ. އަދި, ރަފަޙުގެ ގެއަކަށް ޙަމަލާދީ ފަސް މީހުން ޝަހީދު ކޮށްލާފައިވާއިރު, އޭގެ ތެރޭގައި ވެސް ތިން ކުޑަކުދިން ހިމެނެއެވެ.

މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 35,647އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 79,852އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.