ދަތުރުކުރައްވަމުން ގެންދެވި ހެލިކޮޕްޓަރު ވެއްޓުނު ހިތާމަވެރި ހާދިސާގައި އަވަހާރަވި އީރާނުގެ ރައީސް އިބްރާހީމް ރައީސީއާއި, އެ ހާދިސާގައި މަރުވި އެހެން ބޭފުޅުންގެ ޖަނާޒާ ބާއްވައިފިއެވެ. މޭ 19ވަނަ ދުވަހު ހިނގިި ހާދިސާގައި މަރުވި މީހުންގެ ކަށު ނަމާދު އިމާމުވެ ކުރައްވާފައި ވަނީ އީރާނުގެ ރޫޙާނީ އެންމެ މަތީ ވެރިޔާ އާޔަތުالله ޢަލީ އަލް-ޚާމަންއީއެވެ. ޖަނާޒާ ބާއްވާފައި ވަނީ ވެރިރަށް ޠަހްރާންގައެވެ.
ރައީސީގެ ޖަނާޒާގެ ކުރިން, އޭނާގެ މަރުގެ ހިތާމައިގައި ބައިވެރިވުމަށް އެއްވި އެތަކެއް ހާސް މީހުންނާ މުޚާތަބު ކުރައްވައި ވާހަކަފުޅު ދައްކަވަމުން އަލް-ޚާމަންއީ ވަނީ ރައީސީއަކީ ހެޔޮލަފާ ވެރިއެއްގެ ގޮތުގައި ސިފަ ކުރައްވާފައެވެ. އަދި, އޭނާގެ ފުރާނަފުޅަށް ހެޔޮ ރަޙުމަތް ލެއްވުން އެދި އޭނާ ވަނީ ދުޢާ ދަންނަވާފައެވެ. ޖަނާޒާއަށް ފަހު ރައީސީގެ ހަށިކޮޅު, އޭނާގެ އުފަން ރަށް, މަޝްހަދަށް ފަސްދާނުވަޑުވަން ގެންދެވޭނެއެވެ.
ރައީސީގެ ޖަނާޒާގައި ދުނިޔޭގެ އެކި ކަންކޮޅުތަކުން ޤައުމުތަކުގެ އިސްވެރިންނާއި, ޖަމުޢިއްޔާ އަދި ޖަމާޢަތްތަކުގެ އިސްވެރިން ބައިވެރިވެ ވަޑައިގެންނެވިއެވެ. އޭގެ ތެރޭގައި ތުރުކީވިލާތުގެ ނައިބު ރައީސާއި, އިންޑިޔާގެ ބޮޑުވަޒީރުގެ ނައިބާއި, ރަޝިޔާގެ ޤާނޫނު ހަދާ މަޖިލީހުގެ ރައީސާއި, އިރާޤުގެ ބޮޑުވަޒީރުގެ އިތުރުން ޣައްޒާގައި ވެރިކަން ކުރާ ޙަމާސް ޖަމާޢަތުގެ އިސްވެރިޔާ, އިސްމާޢީލް ހަނިއްޔާއާއި އަފްޣާނިސްތާނުގައި ވެރިކަން ކުރާ ޠާލިބާނުންގެ އިސްވެރިން ހިމެނެއެވެ.
ހެލިކޮޕްޓަރު ވެއްޓުނު ހިތާމަވެރި ހާދިސާގައި ރައީސީގެ އިތުރުން އީރާނުގެ ޚާރިޖީ ވަޒީރު ޙުސައިން އަމީރު ޢަބްދުއްލުހައްޔާނީއާއި, އީސްޓް އަޒަރްބައިޖާން ޕުރޮވިންސުގެ ގަވަރުނަރު މާލިކު ރަޙްމަތީއާއި, ތަބްރީޛް ސިޓީގެ ހުކުރު ނަމާދާ ބެހޭ އިސްވެރިޔާ މުޙައްމަދު ޢަލީ އަލް-ހާޝިމް ވެސް އަވަހާރަވިއެވެ. އެ ބޭފުޅުން ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިފައި ވަނީ މޫސުން ގޯސްވި ވަގުތެއްގައި ހެލިކޮޕްޓަރަށް މައްސަަލައެއް ދިމާވެ, ކުއްލި ގޮތަކަށް ބިމަށް ތިިރި ކުރަން އުޅުމުގެ ތެރޭގައި ކަމަށް ބެލެވެއެވެ.
ރައީސީ އަވަހާރަވުމުން އަލް-ޚާމަންއީ ވަނީ, ރައީސް ކަމުގެ މަޤާމުގެ މަސްއޫލިއްޔަތުތައް, ފުރަތަމަ ނައިބު ރައީސް މުޙައްމަދު މުޚްބިރާ ހަވާލު ކުރައްވާފައެވެ. އަދި, ހިތާމަ ފާޅު ކުރުމުގެ ގޮތުން ފަސް ދުވަސް އިޢުލާނުކުރައްވާފައެވެ. ރައީސީ އަވަހާރަވުމުން ދުނިޔޭގެ އެކި ކަންކޮޅުތަކުން ދަނީ އީރާނަށް ކުރިމަތިވެފައިވާ ހިތާމައިގެ މި ދަނޑިވަޅުގައި ބައިވެރިވާކަން ހާމަކުރަމުންނެވެ.
63 އަހަރުގެ ރައީސީއަކީ އީރާނުގެ ސިޔާސީ, ދީނީ އަދި ޝަރުޢީ ދާއިރާގައި ނުފޫޒު ގަދަ ބޭފުޅެކެވެ. އީރާނުގެ ރޫޙީ އިސްވެރިޔާ އަލް-ޚާމަންއީ އަވަހާރަވުމުން, އެ މަޤާމާ ހަވާލުވެ ވަޑައިގަންނަވާނެ ކަމަށް ބެލެވިފައި އޮތީ ރައީސީއެވެ. 2017ވަނަ އަހަރު ވެސް ރައީސީ ވަނީ ރިޔާސީ އިންތިޚާބުގައި ވާދަ ކުރައްވާފައެވެ. ނަމަވެސް, އެ ފަހަރު ކުރިމަތިވެ ވަޑައިގެންނެވި ނާކާމިޔާބީއަށް ފަހު, 2021ވަނަ އަހަރުގެ ރިޔާސީ އިންތިޚާބުގައި ވާދަކުރައްވައި, އޭނާ ވަނީ ކާމިޔާބީ ހޯއްދަވާފައެވެ.
ރައީސީ އަވަހާރަވީ އިރު އޭނާގެ އަނބިކަނބަލަކާއި ދެ އަންހެން ދަރިކަނބަލުން އެބަތިއްބެވިއެވެ. މަޝްހަދުގައި ހުކުރު ކުރައްވާ އިމާމު އަޙްމަދު ޢަލްމް އަލް-ހުދާގެ ދަރިކަނބަލުން, ޖަމީލާ ޢަލްމް އަލް-ހުދާއާ ރައީސީ ކައިވެނި ބައްލަވާފައި ވަނީ 1983ވަނަ އަހަރުއެވެ.