އީރާނުގެ ރައީސް އިބްރާހީމް ރައީސީ ފަސްދާނުލައިފިއެވެ. ރައީސީ ފަސްދާނުލާފައިވަނީ, އޭނާގެ އުފަން ރަށް, މަޝްހަދުގައެވެ. އުމުރުފުޅުން 63 އަހަރުގެ ރައީސީ ފަސްދާނުލުމަށް ގެންދިޔަ މަގުތަކަށް އެތަކެއް ހާސް ބަޔަކު ވަނީ އެއްވެ, ހިތާމަ ފާޅު ކޮށްފައެވެ. ރައީސީ އަވަހާރަވީ މޭ 19ވަނަ ދުވަހު ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހިތާމަވެރި ހާދިސާގައެވެ. ހެލިކޮޕްޓަރު ވެއްޓިފައި ވަނީ އީރާނުގެ ހުޅަނގު އުތުރު އީސްޓް އަޒަރްބައިޖާން ޕުރޮވިންސުގެ ޖިލްފާގައެވެ.
އެ ހާދިސާގައި ރައީސީގެ އިތުރުން އީރާނުގެ ޚާރިޖީ ވަޒީރު ޙުސައިން އަމީރު ޢަބްދުއްލުހައްޔާނީއާއި, އީސްޓް އަޒަރްބައިޖާން ޕުރޮވިންސުގެ ގަވަރުނަރު މާލިކު ރަޙްމަތީއާއި, ތަބްރީޛް ސިޓީގެ ހުކުރު ނަމާދާ ބެހޭ އިސްވެރިޔާ މުޙައްމަދު ޢަލީ އަލް-ހާޝިމް ވެސް އަވަހާރަވިއެވެ. އެ ބޭފުޅުން ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިފައި ވަނީ މޫސުން ގޯސްވި ވަގުތެއްގައި ހެލިކޮޕްޓަރަށް މައްސަަލައެއް ދިމާވެ, ކުއްލި ގޮތަކަށް ބިމަށް ތިިރި ކުރަން އުޅުމުގެ ތެރޭގައި ކަމަށް ބެލެވެއެވެ.
ރައީސީ އަވަހާރަވުމާ ގުޅިގެން އީރާނުގެ ރޫޙީ އެންމެ މަތީ ވެރިޔާ, އާޔަތުالله ޢަލީ އަލް-ޚާމަންއީ ވަނީ ރައީސް ކަމުގެ މަޤާމުގެ މަސްއޫލިއްޔަތުތައް, ފުރަތަމަ ނައިބު ރައީސް މުޙައްމަދު މުޚްބިރާ ހަވާލު ކުރައްވާފައެވެ. އުމުރުފުޅުން 85 އަހަރުފުޅުގެ އަލް-ޚާމަންއީ އަވަހާރަވުމުން އީރާނުގެ ރޫޙީ އެންމެ މަތީ ވެރިޔާގެ މަޤާމާ ދެން ހަވާލުވެ ވަޑައިގަންނަވާނީ ރައީސީ ކަމަށް ބެލެވިފައި އޮތެވެ.
ރައީސީ ފަސްދާނުލުމަށް ބޭއްވި ޖަނާޒާގައި އީރާނުގެ ސަރުކާރާއި އަސްކަރިއްޔާގެ އިސް އޮފިޝަލުންގެ އިތުރުން ދީނީ ޢިލްމުވެރިން ބައިވެރިވެ ވަޑައިގެންނެވިއެވެ. އޭނާ ފަސްދާނުވަޑުވާފައި ވަނީ 9ވަނަ ޤަރުނުގެ އިސް އިމާމް ޢަލީ އަލް-ރިޟާގެ ޒިޔާރަތް ހުންނަ މަޤުބަރާގައެވެ. ރައީސީ އަވަހާރަވުމާ ގުޅިގެން އީރާނުގައި ވަނީ ހިތާމަ ފާޅު ކުރުމުގެ ފަސް ދުވަސް އިޢުލާނު ކޮށްފައެވެ.
ރައީސީއާއި އޭނާއާ އެކު އަވަހާރަވި ބޭފުޅުންގެ ކަށު ނަމާދު ބާއްވާފައި ވަނީ ވެރިރަށް ޠަހްރާނުގައެވެ. އިމާމުވެ ކަށު ނަމާދު ކުރައްވާފައި ވަނީ އަލް-ޚާމަންއީއެވެ. ރައީސީގެ ޖަނާޒާގެ ކުރިން, އޭނާގެ މަރުގެ ހިތާމައިގައި ބައިވެރިވުމަށް އެއްވި އެތަކެއް ހާސް މީހުންނާ މުޚާތަބު ކުރައްވައި ވާހަކަފުޅު ދައްކަވަމުން އަލް-ޚާމަންއީ ވަނީ ރައީސީއަކީ ހެޔޮލަފާ ވެރިއެއްގެ ގޮތުގައި ސިފަ ކުރައްވާފައެވެ. އަދި, އޭނާގެ ފުރާނަފުޅަށް ހެޔޮ ރަޙުމަތް ލެއްވުން އެދި އޭނާ ވަނީ ދުޢާ ދަންނަވާފައެވެ.
63 އަހަރުގެ ރައީސީއަކީ އީރާނުގެ ސިޔާސީ, ދީނީ އަދި ޝަރުޢީ ދާއިރާގައި ނުފޫޒު ގަދަ ބޭފުޅެކެވެ. 2017ވަނަ އަހަރު ވެސް ރައީސީ ވަނީ ރިޔާސީ އިންތިޚާބުގައި ވާދަ ކުރައްވާފައެވެ. ނަމަވެސް, އެ ފަހަރު ކުރިމަތިވެ ވަޑައިގެންނެވި ނާކާމިޔާބީއަށް ފަހު, 2021ވަނަ އަހަރުގެ ރިޔާސީ އިންތިޚާބުގައި ވާދަކުރައްވައި, އޭނާ ވަނީ ކާމިޔާބީ ހޯއްދަވާފައެވެ.
ރައީސީ އަވަހާރަވީ އިރު އޭނާގެ އަނބިކަނބަލަކާއި ދެ އަންހެން ދަރިކަނބަލުން އެބަތިއްބެވިއެވެ. މަޝްހަދުގައި ހުކުރު ކުރައްވާ އިމާމު އަޙްމަދު ޢަލްމް އަލް-ހުދާގެ ދަރިކަނބަލުން, ޖަމީލާ ޢަލްމް އަލް-ހުދާއާ ރައީސީ ކައިވެނި ބައްލަވާފައި ވަނީ 1983ވަނަ އަހަރުއެވެ.