ޕަޕުއަ ނިއު ގިނީއަށް މިހާރު ކުރަމުންދާ ބޯ ވިއްސާރައިގެ ސަބަބުން ހިނގި ބިންގަނޑު ކެނޑުމުގެ ހާދިސާއެއްގައި އެ ޤައުމުގެ އުތުރުގައި އޮންނަ އަވަށެއްގައި ދިރިއުޅޭ 300އަށްވުރެ ގިނަ މީހުން ވަޅުލެވިއްޖެއެވެ. މި ހާދިސާ ހިނގާފައި ވަނީ އެ ޤައުމުގެ އެންގާ ޕުރޮވިންސުގެ ކެލްކޮލަމް އަވަށުގައެވެ. ބިންގަނޑު ކެނޑި, ފޭބި ކިސަޑުތަކާއި ވެލީގެ ދަށުގައި 1,100އަށްވުރެ ގިނަ ވަޅުލެވިފައިވާ ކަމުގައި އެ ޤައުމުން ބުނެއެވެ.
ކެލްކޮލަމަކީ ވެރިރަށް ޕޯޓް މޯސްބީއާ 600 ކިލޯމީޓަރު އިރުއުތުރުން އޮންނަ އަވަށެކެވެ. މި ހާދިސާގައި އެތަކެއް ސަތޭކަ ބަޔަކު މަރުވެފައިވާ ކަމަށް ބެލެވެއެވެ. މިހާތަނަށް ހަތަރު މީހެއްގެ ހަށިގަނޑު ފެނިފައިވާއިރު, މަރުވި މީހުންގެ ޢަދަދު އަދި ސާފެއް ނޫނެވެ. ބިންގަނޑު ކެނޑުމާ އެކު, އެ ސަރަޙައްދަށް ދަތުރު ކުރެވެން އޮތް މަގުތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އަދި, ގެދޮރުގެ ދަށުގައި ތާށިވެފައިވާ ކަމަށް ބެލެވޭ މީހުން ސަލާމަތް ކުރުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.
އޮސްޓްރޭލިޔާގެ އުތުރުން އޮންނަ ޕަޕުއަ ނިއު ގިނީގެ ޤާނޫނު ހަދާ މަޖިލީހުގެ މެންބަރު, އެއިމޯސް އަކޭމް ވިދާޅުވީ, ބިންގަނޑު ކެނޑުމާ އެކު 1,182 ގެ ވެއްޓިފައި, ނުވަތަ ވަޅުލެވިފައިވާ ކަމުގައެވެ. އަދި, އެ ގެތަކުގެ ދަށުގައި 300އެއްހާ މީހުން ތާށިވެފައިވާ ކަމުގައި އޭނާ ވިދާޅުވިއެވެ. ބިންގަނޑު ކެނޑުމުގެ ހާދިސާގެ އަސަރު އެންގާ ޕުރޮވިންސުގެ މުލީޓާކާ ސަރަޙައްދުގެ ހަ އަވަށަކަށް ކުރިއެވެ.
އޮސްޓްރޭލިޔާގެ ޚާރިޖީ ވުޒާރާއިން ބުނީ, ޕަޕުއަ ނިއު ގިނީގައި ހިނގި ބިންގަނޑު ކެނޑުމުގެ ހާދިސާއާ ގުޅިގެން, އެ ޤައުމަށް އެހީތެރިކަން ފޯރުކޮށްދެވޭނެ ގޮތްތައް ދެނެގަތުމުގެ މަސައްކަތް ކުރަމުންދާ ކަމުގައެވެ. އަދި, ޕޯޓް މޯސްބީގައި ހުންނަވާ އޮސްޓްރޭލިޔާގެ ސަފީރު, މި ކަމާ ގުޅޭ ގޮތުން ޕަޕުއަ ނިއު ގިނީގެ ސަރުކާރާ މަޝްވަރާ ކުރައްވަމުން ގެންދަވާ ކަމުގައެވެ.
ޕަޕުއަ ނިއު ގިނީގެ ބޮޑުވަޒީރު ޖޭމްސް މަރާޕޭ ވިދާޅުވީ, ކެލްކޮލަމް އަވަށުގެ ގެތަކުގެ ދަށުގައި ތާށިވެފައިވާ މީހުން ސަލާމަތް ކުރުމަށް އެ ޤައުމުގެ އިދާރާތަކުން މަސައްކަތް ކުރަމުންދާ ކަމުގައެވެ. މި ގޮތުން, އެ ޤައުމުގެ ދިފާޢީ ބާރާއި ޕަބްލިކް ވަރކްސް އަދި ހައިވޭއާ ބެހޭ އިދާރާއިން ބިންގަނޑު ކެނޑުނު ސަރަޙައްދުތަކުގައި ހަރަކާތްތެރިވަމުންދާ ކަމުގައި އޭނާ ވިދާޅުވިއެވެ.