ސޫރިޔާގެ ވެރިރަށް ދިމިޝްޤުގައި ކާރު ބޮމުގެ ޙަމަލާއެއްދީ, އެކަކު މަރައިލައިފިއެވެ. ޙަމަލާ ދީފައި ވަނީ ދިމިޝްޤުގެ އަލް-މައްޛާ އަަވަށުގައެވެ. ކާރު ބޮން ގޮއްްވައިލާފައިވާ މައްޛާއަކީ, އީރާނުގެ ކޮންސިޔުލޭޓް ހުންނަ ސަރަޙައްދެވެ. މި ހާދިސާގައި މަރުވި މީހާގެ ވަނަވަރު ސޫރިޔާއިން ހާމަކޮށްފައި ނުވާއިރު, މި ހާދިސާގައި އިތުރު އުޅަނދުތަކަކަށް ގެއްލުން ލިބިފައިވާ ކަމުގައި ސޫރިޔާގެ އޮފިޝަލުން ބުނެއެވެ.
ހުސްވި އޭޕްރިލް މަހު ޔަހޫދީ ފައުޖުން ވަނީ މައްޛާގައި ހުންނަ އީރާނުގެ ކޮންސިޔުލޭޓް ޢިމާރާތަށް މިސައިލް ޙަމަލާތަކެއްދީ, އީރާނުގެެ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ އިސް ހަތް އޮފިސަރުން ޝަހީދު ކޮށްލާފައެެވެ. އޭގެ ތެރޭގައި އައިއާރްޖީސީގެ އިސް ދެ ޖެނެރަލުން ވެސް ހިމެނެއެވެ. އެ ހާދިސާއާ ގުޅިގެން އީރާނުން ވަނީ ރައްދުގައި އިސްރާއީލުގެ ރަށްތަކަށް އަމާޒުކޮށް ވަރުގަދަ ވައިގެ ޙަމަލާތަކެއް ދީފައެވެ.
ދިމިޝްޤުގައި ދިން ކާރު ބޮމުގެ ޙަމަލާއާ ގުޅޭ ގޮތުން, ސޫރިޔާގެ އިންސާނީ ޙައްޤުތަކުގެ ހާލަތު ދިރާސާ ކުރާ އިނގިރޭސިވިލާތުގެ ޖަމުޢިއްޔާ, ސީރިޔަން އޮބްޒަރވޭޓަރީ ފޯ ހިޔުމަން ރައިޓްސް (އެސްއޯއެޗްއާރު)ން ބުނީ, އެ ޙަމަލާގައި މަރުވެފައި ވަނީ ސޫރިޔާގެ އަސްކަރިއްޔާގެ އޮފިސަރެއް ކަމުގައެވެ.
އެ ޖަމުޢިއްޔާގެ އިސް އޮފިޝަލެއް ކަމުގައިވާ ރާމީ ޢަބްދުއްރަޙްމާން ބުނީ, އެއީ މައްޛާގައި ދިރިއުޅޭ މީހެއް ކަމަށާއި, އެއީ އީރާނާގެ އައިއާރްޖީސީއާ އެކު ގާތް ގުޅުމެއް ބާއްވާ އޮފިސަރެއް ކަމުގައެވެ. އައިއާރްޖީސީއާ ގާތް ގުޅުމެއް އޮންނަ ސޫރިޔާގެ އަސްކަރިއްޔާގެ އޮފިސަރެއް މަރައިލާފައިވާއިރު, ދިމިޝްޤުގައި ދެމުންދާ ކާރު ބޮމުގެ މި ފަދަ ޙަމަލާތަކުގެ ޢަދަދު ފަހަކަށް އައިސް އިތުރުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ފާހަގަ ކުރެއެވެ.
ދިމިޝްޤުގައި ކާރު ބޮން ގޮއްވައިލިތާ ކުޑަ ވަގުތު ކޮޅެއް ފަހުން, ޔަހޫދީ ފައުޖުގެ އަސްކަރީ ޑްރޯނަކުން ވަނީ ދިމިޝްޤުގެ ހުޅަނގު އުތުރުގައި އޮންނަ ޤުޞީރަށް ވައިގެ ޙަމަލާތަކެއް ދީފައެވެ. އެ ޙަމަލާތައް އަމާޒު ކޮށްފައި ވަނީ, އެ ރަށުގައި ދަތުރު ކުރަމުން ދިޔަ ކާރަކާއި ލޮރީއަކަށެވެ. އެ ޙަމަލާގައި ޙިޒްބުالله ޖަމާޢަތަށް ނިސްބަތްވާ ހަނގުރާމަވެރިންތަކެއް ޝަހީދު ކޮށްލާފައިވާ ކަމުގައި އެސްއޯއެޗްއާރުން ބުނެއެވެ.
"ޙިޒްބުاللهގެ ކާރަކަށް އަމާޒުކޮށް [ޒަޔަނިސްޓު] އިސްރާއީލުގެ އަސްކަރީ ޑްރޯނުން ދެ ފަހަރު މިސައިލް ޙަމަލާތައް ދީފައިވޭ. ޙަމަލާ ދީފައި ވަނީ ޙުއްމުޞް ޕްރޮވިންސުގެ ރަށެއް ކަމުގައިވާ ޤުޞީރަށް. އެ އުޅަނދު ދަތުރު ކުރަމުން ގޮސްފައި ވަނީ އަލް-ޟަބަޢާ އަސްކަރީ ވައިގެ ބަނދަރާ ދިމާލަށް. ޙަމަލާގައި ޙިޒްބުاللهގެ ދެ ހަނގުރާމަވެރިން ވަނީ މަރައިލާފައި [ޝަހީދު ކޮށްލާފައި]،" އެސްއޯއެޗްއާރުން ބުންޏެވެ.
ހުސްވި އޭޕްރިލް މަހު ވެސް މައްޛާގައި ކާރު ބޮމުގެ ޙަމަލާއެއް ދީފައިވެއެވެ. ނަމަވެސް, އެ ޙަމަލާގައި އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. 2011ވަނަ އަހަރަށް ފަހު, ޔަހޫދީ އިސްރާއީލުން ދަނީ ސޫރިޔާގެ މިނިވަން ކަމާއި ސިޔާދަތަށް އަރައިގަންނަމުންނެވެ. އަދި, މެދުކެނޑުމެއް ނެތި ސޫރިޔާގެ ވައިގެ ސަރަޙައްދަށް އަސްކަރީ މަތިންދާބޯޓުތަކާއި ޑްރޯންތައް ފޮނުވައި, ސޫރިޔާގެ ރަށްތަކަށް ވައިގެ ޙަމަލާތައް އަމާޒު ކުރަމުންނެވެ.