ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން އެ ސަހަރުގެ އެންމެ ދެކުނުން އޮތް ރަފަޙަށް ރަޙުމު ކުޑަ ޙަމަލާތަކެއްދީ 40 މީހުން ޝަހީދު ކޮށްލައިފިއެވެ. ރަފަޙުގައި ރެފިއުޖީންގެ ފޭލިގެތަކެއް ޖަހާފައިވާ ސަރަޙައްދަށް ޔަހޫދީ ފައުޖުން ދީފައިވާ ޙަމަލާގައި ގިނަ ޢަދަދެއްގެ ބަޔަކު ޒަޚަމުވި ކަމުގައި ޣައްޒާގެ ޞިއްޙީ ވުޒާރާއިން ހާމަކުރިއެވެ.
އެ ވުޒާރާގެ ތަރުޖަމާނު އަޝްރަފް އަލް-ޤުދްރާ ވިދާޅުވީ, ޔަހޫދީ ފައުޖުގެ ރަޙުމު ކުޑަ ޙަމަލާގައި ޝަހީދު ކޮށްލާފައިވާ އަދި ޒަޚަމު ކޮށްލާފައިވާ މީހުންގެ ތެރޭގައި ގިނައީ އަންހެނުންނާއި މައުސޫމު ކުޑަކުދިން ކަމުގައެވެ. ޔަހޫދީންގެ ވައިގެ ޙަމަލާތައް އަމާޒުކޮށްފައި ވަނީ ރަފަޙުގެ ހުޅަނގުގައި އޮންނަ ތަލް އަލް-ސުލްޠާން ސަރަޙައްދަށެވެ. އެއީ, އެތަކެއް ހާސް ރެފިއުޖީން ދިރިއުޅޭ ސަރަޙައްދެކެވެ.
ތަލް އަލް-ސުލްޠާނަށް ދީފައިވާ ޙަމަލާގައި ޒަޚަމު ކޮށްލާފައިވާ ގިނަ ޢަދަދެއްގެ ބަޔަކަށް ފަރުވާ ދެމުންދާ ކަމުގައި ރެޑް ކްރޮސުން ރަފަޙުގައި ހިންގާ ވަގުތީ ހަސްފަތާލުގެ އޮފިޝަލުން ބުންޏެވެ. ޙަމާސްގެ އިސް އޮފިޝަލެއް ކަމުގައިވާ ސާމީ އަބޫ ޛަހްރީ ސިފަ ކުރެއްވި ގޮތުގައި ރަފަޙުގައި ޔަހޫދީ ފައުޖުން ހިންގާފައި ވަނީ ގަތުލުއާންމެކެވެ. މި ޙަމަލާގައި އެމެރިކާގެ ބައިވެރިން އޮތް ކަމުގައި ވެސް އޭނާ ވިދާޅުވިއެވެ.
"ވައިގެ ޙަމަލާތަކުގައި ފޭލިގެތަކުގައި ވަނީ ރޯވެފައި. ފޭލިގެތައް ވަނީ ވިރިގެން ފައިބާފައި. މީހުންގެ ހަށިތައް ވެސް ވަނީ ފިހިފައި. ބައެއް މީހުންގެ ހަށިތައް ވަނީ ވިރިފައި،" ޛަހްރީ ވިދާޅުވިއެވެ.
މިއީ, ޣައްޒާގެ މިނިވަން ކަން ދިފާޢު ކުރަން ޖިހާދު ކުރަމުންދާ ޙަމާސް ޖަމާޢަތުގެ މުޖާހިދުން ޒަޔަނިސްޓު އިސްރާއީލުގެ ތެލް އަވީވަށް އަމާޒުކޮށް ދީފައިވާ ރޮކެޓް ޙަމަލާތަަކުގެ ބަދަލު ހިފުމުގެ ގޮތުން ރަފަޙަށް ދީފައިވާ ޙަމަލާތަކެއް ކަމަށް ބެލެވެއެވެ. ތެލް އަވީވަށް ޙަމަލާ ދޭން ޙަމާސުން ވަނީ އަށް ރޮކެޓް ބޭނުން ކޮށްފައެވެ. ޔަހޫދީ ފައުޖުން އޭގެ ތެރެއިން ބައެއް ރޮކެޓުތައް ދިފާޢުކޮށްފައިވީ ނަމަވެސް, ބައެއް ރޮކެޓްތަކުގެ ސަބަބުން ތެލް އަވީވުގެ ޢާންމުން ދިރިއުޅޭ ގެތަކަށް ގެއްލުން ލިބުނެވެ.
ޔަހޫދީ ފައުޖުން ރަފަޙަށް ރަޙުމު ކުޑަ ވައިގެ ޙަމަލާތަކެއް ދީފައި މި ވަނީ, އެ ރަށުގައި ހިންގަމުންދާ ލާއިންސާނީ ޢުދުވާންތަކާއި ގަތުލުއާންމުތައް ހިންގުން ވަގުތުން ހުއްޓައިލައި, އެ ރަށުން ފޭބުމަށް އދގެ އެންމެ މަތީ ކޯޓު, އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)ން މޭ 24ވަނަ ދުވަހު ޔަހޫދީ ފައުޖުގެ މައްޗަށް އަމުރު ކޮށްފައި ވަނިކޮށެވެ.
ނަމަވެސް, ޔަހޫދީ ފައުޖުން ދަނީ ދުނިޔޭގެ ކޯޓުގެ އެ އަމުރަށް ގޮންޖަހައި, ރަފަޙުގައި ހިންގަމުންދާ ޢުދުވާންތައް އިތުރަށް ފުޅާ ކުރަމުންނެވެ. މޭ 26ވަނަ ދުވަހު ވެސް ޔަހޫދީ ފައުޖުން ވަނީ ރަފަޙަށް ވައިގެ ޙަމަލާތަކެއް ދީފައެވެ. ޢާންމުން ދިރިއުޅޭ ޢިމާރާތަކަށް އަމާޒުކޮށް ދީފައިވާ އެ ޙަމަލާގައި އެ ގޭގެ އަހުލުވެރިންގެ ތެރެއިން ފަސް މީހުން ޝަހީދު ކޮށްލިއެވެ. އަދި, އިތުރު ބަޔަކު ޒަޚަމު ކޮށްލިއެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 35,984އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 80,643އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.