ޕަޕުއަ ނިއު ގިނީއަށް މިހާރު ކުރަމުންދާ ބޯ ވިއްސާރައިގެ ސަބަބުން ހިނގި ބިންގަނޑު ކެނޑުމުގެ ހާދިސާގައި އެ ޤައުމުގެ އުތުރުގައި އޮންނަ އަވަށްތަކުގައި ކިސަޑުގެ ދަށުގައި ވަޅުލެވުނު މީހުންގެ ޢަދަދު 2,000އަށް އަރާނެ ކަމަށް ބެލެވޭ ކަމުގައި އެ ޤައުމުން ހާމަކޮށްފިއެވެ. މި ހާދިސާ ހިނގާފައި ވަނީ އެ ޤައުމުގެ އެންގާ ޕުރޮވިންސުގެ ކެލްކޮލަމާއި ޔަންބަލީ އަވަށުގައެވެ.
ޕަޕުއަ ނިއު ގިނީގެ ސަރުކާރުން ބުނީ, ބިންގަނޑު ކެނޑިފައިވާ ސަރަޙައްދަށް ދަތުރު ކުރެވެން އޮތް ހަލިމަގުތަކަށް ގެއްލުންވެ, ކިސަޑުތަކުގެ ވަޅުލެވިފައިވާ މީހުން ސަލާމަތް ކުރުމުގެ މަސައްކަތްތަކަށް ހުރަސް އެޅިފައިވާ ކަމުގައެވެ. އަދި, އެ ސަރަޙައްދުގައި ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދިނުމަށް ވެސް ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައެވެ. ގިނަ ޢަދަދެއްގެ ބަޔަކު ދިރިތިއްބާ ސަލާމަތް ކުރެވޭނެ ކަމުގެ އުންމީދެއް ނެތް ކަމުގައި ވެސް އެ ޤައުމުގެ ސަރުކާރުން ބުނެއެވެ.
އެ ޤައުމުގެ ކާރިސާތަކާ ބެހޭ އިދާރާއިން ބުނީ ބިންގަނޑު ކެނޑުމާ އެކު ވަޅުލެވިފައިވާ ޢިމާރާތްތަކުގެ ދަށުގައި ތާށިވެފައިވާ މީހުންގެ ޢަދަދު 2,000އަށްވުރެ މައްޗަށް އަރާނެ ކަމަށް ބެލެވޭ ކަމުގައެވެ. އެ އިދާރާއިން މި ކަން ހާމަ ކޮށްފައި ވަނީ އދއަށް ފޮނުވި ސިޓީއެއްގައެވެ. އދގެ އިދާރާއަކުން ބުނީ, މި ހާދިސާގައި މަރުވެފައިވާ ކަން ކަށަވަރު ކުރެވިފައިވާ މީހުންގެ ޢަދަދު 670އަށް އުފުލިފައިވާ ކަމުގައެވެ.
ބިންގަނޑު ކެނޑުމުގެ ހާދިސާ ހިނގާފައި ވަނީ މޭ 24ވަނަ ދުވަހުގެ ދަންވަރުގެ ވަގުތުގައި, ކެލްކޮލަމާއި ޔަންބަލީގެ ރައްޔިތުން ނިދާފައި ތިބި ވަގުތުގައެވެ. މި ހާދިސާގައި 150އަށްވުރެ ގިނަ ޢިމާރާތް ވެއްޓިފައިވާ ކަމުގައި އެ ސަރަޙައްދުގެ އޮފިޝަލުން ބުނެއެވެ. ފަސްއެޅި, ވަޅުލެވިފައިވާ ޢިމާރާތްތަކުގެ ދަށުގައި ތާށިވެފައިވާ މީހުންގެ ރުއިމުގެ އަޑު އިވެމުންދާ ކަމުގައި, އެ މީހުން ސަލާމަތް ކުރަން މަސައްކަތް ކުރާ ޓީމުތަކުން ބުނެއެވެ.
ބިންގަނޑު ކެނޑުމުގެ ހާދިސާ ހިނގިތާ 72އަށްވުރެ ގިނަ ގަޑިއިރު ފާއިތުވެފައިވާއިރު, ބިންގަނޑު ކޮންނަން ބޭނުން ކުރާ ސާމާނާއި އެކްސްކެވޭޓަރު ފަދަ އުޅަނދުފަހަރު އެ ސަރަޙައްދަށް ފޯރާފައެއް ނުވެއެވެ. ވަޅުލެވިފައިވާ މީހުން ސަލާމަތް ކުރަން, އަވަށްތަކުގެ ރައްޔިތުންނާއި, މީހުން ސަލާމަތް ކުރާ ޓީމުތަކުން ބޭނުން ކުރަމުން ދަނީ އުދަލި ފަދަ ސާމާނެވެ.
ޕަޕުއަ ނިއު ގިނީގެ ބޮޑުވަޒީރު ޖޭމްސް މަރާޕޭ ވިދާޅުވީ, އެ ޤައުމުގެ ކުއްލި ހާލަތްތަކުގެ އިދާރާއިން މި ކާރިސާއާ ގުޅޭ ގޮތުން ހަރުދަނާ ފިޔަވަޅުތަކެއް އަޅަމުންދާ ކަމުގައެވެ. ނަމަވެސް, އޭނާގެ ނަޒަރު ހުއްޓިފައި އޮތީ ސިޔާސީ މައިދާނަށެވެ. އަދި, އޭނާއާ ދެކޮޅަށް އެ ޤައުމުގެ ޤާނޫނު ހަދާ މަޖިލީހަށް ހުށަހަޅާފައިވާ އިތުބާރު ނެތް ކަމުގެ މައްސަލައަށެވެ.
ބިންގަނޑު ކެނޑި, ގެއްލުންވެފައިވާ ސަރަޙައްދުތަކުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދޭން ބޭރު ޤައުމުތަކުން ވެސް ވަނީ ހުށަހަޅާފައެވެ. މި ގޮތުން, ޕަޕުއަ ނިއު ގިނީއަށް އެހީތެރިކަން ފޯރުކޮށްދޭން މަސައްކަތް ކުރަމުންދާ ކަމުގައި އޮސްޓްރޭލިޔާއާއި ޗައިނާއިން ވަނީ ހާމަކޮށްފައެވެ.
ޕަޕުއަ ނިއު ގިނީގައި ހުންނަ އދގެ އިންޓަރނޭޝަނަލް މައިގްރޭޝަން އޭޖެންސީގެ މިޝަނުގެ ވެރިޔާ ސަރްހާން އަކްޓޯޕްރަކް ވިދާޅުވީ ބިންގަނޑު ކެނޑިފައިވާ އަވަށްތަކަށް އަދިވެސް ބޯކޮށް ވާރޭ ވެހެމުންދާ ކަމުގައެވެ. އަދި, މި ކަމާ ގުޅިގެން, ވަޅުލެވިފައިވާ މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ހުރަސް އެޅިފައިވާ ކަމުގައެވެ. މި ހާދިސާގައި 1,250އެއްހާ މީހުން ގެދޮރު ނެތިފައިވާ ކަމުގައި ވެސް އެ އިދާރާއިން ބުނެއެވެ.