ގުޅިފަޅަށް ގޯތި ބަދަލުކުރަން އެދުނު މީހުންގެ ގުރުއަތު ނެގުން ޖޫން 4ގައި

ގުޅިފަޅަށް ގޯތި ބަދަލުކުރަން އެދުނު ފަރާތްތަކުގެ ތެރެއިން، ކަނޑައެޅި އަދަދަށްވުރެ ގިނައިން ފޯމު ހުށައެޅި ކެޓަގަރީތަކުގެ ގުރުއަތުލުން ޖޫން މަހުގެ 4 ވަނަ ދުވަހު ބާއްވާނެކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

ފޯމު ހުށައެޅި ފަރާތްތަކުގެ ތަފްސީލް ހިމެނޭ ލިސްޓު އެ ވުޒާރާއިން މިހާރު ވަނީ ގެޒެޓުކޮށްފައެވެ.

1250 އަކަފޫޓުގެ 196 ގޯތި
1650 އަކަފޫޓުގެ 663 ގޯތި
2050 އަކަފޫޓުގެ 234 ގޯތި
2450 އަކަފޫޓުގެ 3 ގޯތި

ގިރާވަރުފަޅުން ގޯތި ލިބުނު މީހުން، ގުޅިފަޅަށް ގޯތި ބަދަލުކުރުމުގެ ފުރުޞަތު ދެފަހަރެއްގެ މަތިން ހުޅުވާލިއެވެ. އެގޮތުން ބަދަލުކުރަން ހުޅުވާލި 1096 ގޯއްޗަށް އެދި 2210 މީހުން ފޯމު ހުށައަޅާފައިވާކަމަށް ބިމާއި އުމްރާނީ ތަރައްޤީއާ ބެހޭ ވުޒާރާއިން ވިދާޅުވެއެވެ.

ގުޅިފަޅަށް ގޯތި ބަދަލުކުރަން އެދުނު ފަރާތްތަކުގެ ޢަދަދު:

1250 އަކަފޫޓުގެ ގޯއްޗަށް 1093 ފޯމް
1650 އަކަފޫޓުގެ ގޯއްޗަށް 880 ފޯމް
2050 އަކަފޫޓުގެ ގޯއްޗަށް 234 ފޯމް
2450 އަކަފޫޓުގެ ގޯއްޗަށް 3 ފޯމް

ފޯމު ހުށައެޅި ފަރާތްތަކުގެ ނަމާއި، އައިޑީ ނަންބަރާއި، ފޯމު ނަންބަރު އަދި އެމީހުންނަށް ފުރަތަމަ ގޯތި ލިބުނު ލޮޓް ނަންބަރު ވަނީ ގެޒެޓުކޮށްފައެވެ.

އިމާރާތްކުރުމާއި ބިމާއި ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވީ 1250 އާއި 1650 އަކަފޫޓުގެ ގޯތި ބަދަލުކުރުމަށް ހުށައެޅި މީހުންގެ އަދަދު، ކަނޑައެޅި އަދަދަށްވުރެ އިތުރުވާތީ، ގޯތި ބަދަލުކުރެވޭ މީހުން ކަނޑައަޅާނީ ގުރުއަތަކުންކަމަށެވެ. މިގުރުއަތު ނެގުން އޮންނާނީ ޖޫންމަހުގެ 4 ވާ އަންގާރަ ދުވަހުއެވެ. ގުރުއަތު ނަގާ ތަނާއި ގަޑި އެވުޒާރާއިން އިޢުލާނުކުރާނެއެވެ.

2050 އަދި 2450 އަކަފޫޓުގެ ކެޓަގަރީން ފޯމު ހުށައެޅީ ކަނޑައަޅާފައިވާ އަދަދަށެވެ. އެހެންކަމުން އެމީހުންގެ ނަގާނީ، ގުޅިފަޅުން ގޯތި ލިބޭ ތަން ކަނޑައަޅާ ގުރުއަތެވެ. މި ގުރުއަތު އޮންނަ ތާރީޚް ފަހުން އިޢުލާންކުރާނެކަމަށް އެ ވުޒާރާއިން ވިދާޅުވެއެވެ.

ގުޅިފަޅުން ގިރާވަރުފަޅަށް ގޯތި ބަދަލުކުރަން އެދުނު މީހުންގެ ލިސްޓާ ގުޅިގެން އެއްވެސް ޝަކުވާއެއް އޮތްނަމަ، އަންނަ ހުކުރު ދުވަހުގެ ރޭގަނޑު 11:00ގެ ކުރިން، އެވުޒާރާއަށް ލިޔުމުން ހުށައެޅުމަށް ވަނީ އެދިފައެވެ.

ކުރީ ސަރުކާރުން ގިރާވަރު ފަޅުން 5432 ގޯތި ދޫކުރުމަށް ނިންމާ އޭގެ ލިޔުން ހަވާލުކޮށްފައިވެއެވެ. ނަމަވެސް އެއަދަދަށް އެތަނުން ގޯތި ނެގެން ނެތުމުން، މި ސަރުކާރުންވަނީ ހާހަކަށްވުރެ ގިނަ ގޯތި ގުޅިފަޅަށް ބަދަލުކުރުމުގެ ފުރުޞަތު ދީފައެވެ.

ގުޅިފަޅުން ހިއްކާފައިވަނީ 160 ހެކްޓަރުގެ ބިމެވެ. އެ ފަޅުގައި ބާކީ އޮތް 85 ހެކްޓަރުގެ ބިން ހިއްކުމަށް ސަރުކާރުން މިހާރު ވަނީ އެކަމާ ގުޅޭ މަސައްކަތްތައް އެމްޓީސީސީއާ ހަވާލުކުރައްވާފައެވެ.