މެދުއިރުމަތީގެ ފަތުރުވެރިން އިތުރުކުރުމަށް ރާއްޖެއިން ރިޔާޟު ފެއަރއަށް

މެދުއިރުމަތީގެ މާކެޓުގައި ރާއްޖެ އިސްތިހާރުކުރުމަށް ސައުދީގައި ކުރިއަށްދާ ފަތުރުވެރިކަމުގެ އެންމެ ބޮޑު އެއް ހަރަކާތް، ރިޔާޟު ޓްރެވަލް ފެއަރގައި ރާއްޖެއިން ބައިވެރިވެއްޖެއެވެ.

މި މަހުގެ 27 އިން 29 އަށް ކުރިއަށްދާ މި ފެއަރގައި މޯލްޑިވްސް މަރކެޓީންގ އެންޑު ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީ އާއި އެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 9 ކުންފުންޏަކުން 17 ފަރާތަކުންވަނީ ބައިވެރިވެފައެވެ.

މި ފެއަރއަކީ ފަތުރުވެރިކަމަށް ޚާއްސަކޮށް ސައުދީއާ ދުނިޔޭގެ އެކިކަންކޮޅުތަކުގެ ފަތުރުވެރިކަމާ ބެހޭ ބޮޑެތި ކުންފުނިތަކުން ބައިވެރިވެ، އެކި ގައުމުތަކުގެ ފަތުރުވެރިކަން ޕްރޮމޯޓްކުރާ އަހަރީ ހަރަކާތެކެވެ. އެެމްއެމްޕީއާރުސީން ވިދާޅުވީ މި ފެއަރގައި ބައިވެރި ވުމުގެ މަޤުޞަދަކީ ރާއްޖޭގެ ފަތުރުވެރިކަން ސައުދީ ސައުދީގެ މާރކެޓްގައި ޕްރޮމޯޓްކޮށް، ސައުދީއިން ރާއްޖެ އަންނަ ފަތުރުވެރިން އިތުރުކުރުން ކަމަށެވެ.

މި ފެއަރގައި ދުނިޔޭގެ އެކިކަންކޮޅުތަކުން ޓުއަރ އޮޕަރޭޓަރުންނާއ،ި ޓްރެވެލް އެޖެންޓުން އަދި ފަތުރުވެރިކަމާއި ބެހޭ ޕްރޮފެޝަނަލް ފަރާތްތަކެއް ވެސް ބައިވެރިވެއެވެ. މިފެއަރގަ ރާއްޖޭގެ ސްޓޭންޑް ތައްޔާރުކޮށްފައިވަނީ ޒިޔާރަތްކުރާ ފަރާތްތަކައް ރާއްޖޭގެ ފަތުރުވެރިކަމުގެ ރީތިކަން ދައްކުވައިދޭ ގޮތަށެވެ.

އެގޮތުން ސްޓޭންޑަށް ޒިޔާރަތް ކުރާ މީހުންނަށް ޚާއްސަކޮށްގެން ސޯޝަލް މީޑިއާ ކޮންޓެސްޓަކާއި ގިވްއަވޭއެއް ވެސް ރާއްޖޭގެ ސްޓޭންޑުގައި ހުންނާނެއެވެ. އަދި ކެލިގްރެފީ ކޯރނާއަކާއި ދިވެހި ސަގާފީ ކެއުންތަކުގެ ރަހަ ތަޖުރިބާކޮށްލުމުގެ ފުރުޞަތު ވެސް ފެއަރއަށް ޒިޔާރަތްކުރާ ފަރާތްތަކަށް ލިބިގެންދެއެވެ.

މި ހަރަކާތުގެ ސަބަބުން ރާއްޖޭގެ ފަތުރުވެރިކަން ދުނިޔޭގެ މާރކެޓްގައި ޕްރޮމޯޓްކޮށް ރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި، ރިސޯޓް، ހޮޓެލް އަދި ގެސްޓް ހައުސް ވިޔަފާރިން ފަތުރުވެރިންނަށް ލިބޭ ގިނަގުނަ ހިދުމަތްތައް އިތުރަށް އިޝްތިހާރު ކުރެވިގެން ދާނެކަމަށް އެމްއެމްޕީއާރުސީން ވިދާޅުވެއެވެ.

ސައުދީ އަރަބިއާއަކީ މިވަގުތު ރާއްޖޭގެ ފަތުރުވެރިކަމުގެ ރޭންކުގައި 21 ވަނައަށް އެންމެ ގިނަ ފަތުރުވެރިން އަންނަ ގައުމެވެ. މި ފެއަރގައި އެމްއެމްޕީއާރުސީން ދަނީ މެދުއިރުމަތީގެ އެކި ގައުމުތަކަށް ރާއްޖޭގެ ފަތުރުވެރިކަމާއި ބެހޭ މަޢުލޫމާތު ފޯރުކޮށް ދެމުންނެވެ.