ވިލާތުގެ އިއްތިހާދު (އީޔޫ)ގެ އިތުރު ތިން މެންބަރު ޤައުމު ކަމުގައިވާ އަޔަލެންޑާއި ނޯވޭގެ އިތުރުން ސްޕެއިނުން ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަނެ, މިއަދު އެ ކަން އިޢުލާނު ކުރާނެއެވެ. މިއީ, ފަަލަސްޠީނުގެ ޣައްޒާގެ މުސްލިމުން ޝަހީދުކޮށް, ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާއި ގަތުލުއާންމުތައް ހުއްޓުވުމަށް ބާރު އެޅުމުގެ ގޮތުން އެ ޤައުމުތަކުން އަޅާ ފިޔަވަޅެކެވެ.
އދގެ މެންބަރުންގެ ތެރޭގައި ހިމެނޭ 149 ޤައުމުގެ ތެރެއިން 144 ޤައުމަކުން ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތް ނަމަވެސް, އޭގެ ތެރޭގައި ޔަހޫދީންނަށް ވާގިވެރިވާ މަދަދުގާރުންގެ ތެރޭގައި ހިމެނޭ ވިލާތުގެ ޤައުމުތަކާއި އެމެރިކާ ނުހިމެނެއެވެ. ނަމަވެސް, ފަލަސްޠީނުގެ ދަޢުލަތް ބަލައިގަންނަ އެންމެ ބޮޑެތި ޤައުމުތަކުގެ ތެރޭގައި ރަޝިޔާއާއި ޗައިނާގެ އިތުރުން އިންޑިޔާ ހިމެނެއެވެ.
ފަލަސްޠީނުގެ މިނިވަން ކަން ބަލައިގަތުމަށް އަޔަލެންޑާއި, ނޯވޭއާއި ސްޕެއިނުން ނިންމާފައި ވަނީ, ޔަހޫދީ ފައުޖުގެ ލާއިންސާނީ ޢުދުވާންތައް ހުއްޓުވުމަށް ބާރުއެޅުމުގެ އިތުރުން, އިތުރު ޤައުމުތަކުން އެ ޤައުމުތަކާ ގުޅޭނެ ކަމުގެ އުންމީދުގައެވެ. މީގެ ތެރެއިން ސްޕެއިނާއި އަޔަލެންޑަކީ އީޔޫގެ އެންމެ ބޮޑެތި އަދި އެންމެ ނުފޫޒު ގަދަ ޤައުމުތަކުގައި ބެލެވޭ ޤައުމުތަކުގެ ތެރޭގައި ހިމެނޭ ދެ ޤައުމެވެ.
27 މެންބަރުންގެ މައްޗަށް އެކުލެވޭ އީޔޫގެ ހަތް ޤައުމަކުން މިހާރު ވެސް ފަލަސްޠީނަކީ މިިނިވަން ދަޢުލަތެއްގެ ގޮތުގައި ބަލައިގަނެއެވެ. އޭގެ ތެރޭގައި ސްވިޑެން, ސައިޕްރަސް, ހަންގެރީ, ޗެކް ރިޕަބްލިކް, ޕޮލެންޑް, ސްލޮވާކިޔާ, ރޮމޭނިޔާ އަދި ބަލްގޭރިޔާ ހިމެނެއެވެ. އީޔޫގެ އިތުރުން ތިން ޤައުމުން ފަލަސްޠީނުގެ މިނިވަން ކަން ބަލައިގަތުން ހަޖަމު ނުވެ, ޔަހޫދީ އިސްރާއީލުން ވަނީ އަޔަލެންޑާއި, ސްޕެއިން އަދި ނޯވޭގައި ތިބި އެ ޤައުމުގެ ސަފީރުން އަނބުރާ ޤައުމަށް ގެންގޮސްފައެވެ.
އީޔޫގެ މެންބަރު ޤައުމުތައް ކަމުގައިވާ މޯލްޓާއާއި ސްލޮވީނިޔާގެ އިތުރުން އިނގިރޭސިވިލާތާއި އޮސްޓްރޭލިޔާއިން ވެސް ވަނީ ފަލަސްޠީނުގެ މިނިވަން ކަން ބަލައިގަންނާނެ ކަމުގެ އިޝާރާތެއް ދީފައެވެ. މި ކަމާ ގުޅޭ ގޮތުން އީޔޫގެ އެންމެ ބާރުގަދަ ޤައުމުތަކުގެ ތެރޭގައި ހިމެނޭ ފަރަންސޭސިވިލާތުން ބުނީ, މިއީ ފަލަސްޠީނުގެ މިިނިވަން ކަން ބަލައިގަތުމަށް އެންމެ މުނާސަބު ވަގުތު ނޫން ކަމުގައެވެ.
ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް އޮތް އެންމެ ބޮޑު ހުރަހަކީ ޔަހޫދީންގެ މަސްލަޙަތު ހިމާޔަތް ކުރަން ފޫގަޅައިގެން އޮތް އެމެރިކާއެވެ. އަދި, އީޔޫގެ ބާރުގަދަ ޤައުމުތަކުގެ ތެރޭގައި ހިމެނޭ ޖަރުމަނުވިލާތް ވަނީ އެމެރިކާގެ އަވައިގައި ޖެހި, ފަލަސްޠީނުގެ މިނިވަން ކަން ބަލައިގަތުމަށް ދެކޮޅު ހަދާފައެވެ. އެމެރިކާއާއި ޖަރުމަނުވިލާތަކީ ޔަހޫދީންގެ އެންމެ ބޮޑު މަދަދުގާރުންގެ ގޮތުގައި ބެލެވޭ ޤައުމުތަކުގެ ލިސްޓުގައި އެންމެ ކުރީގައި އޮތް ދެ ޤައުމެވެ.
"އަޅުގަނޑުމެންގެ އުންމީދަކީ, މި ކަމުން މިސާލު ނަގައި, ހުޅަނގުގެ އިތުރުން ޤައުމުތަކުން ވެސް ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުން. މި ކަމުގައި ބައިވެރިވާ ޤައުމުތަކުގެ ޢަދަދު އިތުރުވުމަކީ, [ޔަހޫދީ ފައުޖުން] ހިންގަމުންދާ [ލާއިންސާނީ] ޢުދުވާން ހުއްޓުވަން އެޅޭ އިތުރު ބާރެއް،" ސްޕެއިންގެ ބޮޑުވަޒީރު ޕެދްރޯ ސަންޗޭޒް ވިދާޅުވިއެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,050އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 81,026އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.