އިންޑިޔާގެ އިރުއުތުރުގެ ސަރަޙައްދުތަކަށް މިހާރު ކުރަމުންދާ ބޯ ވިއްސާރައާ ގުޅިގެން އެ ސަރަޙައްދުގެ މިޒޫރަމް ސްޓޭޓްގެ ގައު ނަގާ މައިނެއްގެ ސީލިންގ ވެއްޓި 10 މީހުން މަރުވެއްޖެއެވެ. އިންޑިޔާގެ އިރުއުތުރުގެ ސަރަޙައްދުތަކަށް ބޯކޮށް ވާރޭވެހެމުން ދަނީ, އެ ސަރަޙައްދަށް އަރާފައިވާ ބާރުގަދަ ތޫފާން ރިމާލާ ގުޅިގެންނެވެ. މި ހާދިސާ ހިނގާފައިވާ މައިން އޮންނަނީ މިޒޫރަމް ސްޓޭޓްގެ ވެރިރަށް އައިޖޫލްގެ ރަށްބޭރުގައި އޮންނަ މީލްތަމްގައެވެ.
މައިންގެ ސީލިންގ ވެއްޓުމާ ގުޅިގެން އެ ތަނުގެ ތެރޭގައި ގިނަ ޢަދަދެއްގެ ބަޔަކު ތާށިވި ކަމަށް ބެލެވެއެވެ. ނަމަވެސް, މައިންގެ ތެރޭގައި ތާށިވެފައިވާ މީހުންގެ ޢަދަދު ސާފެއް ނޫނެވެ. އަދި, މޫސުން ގޯސްވުމާ ގުޅިގެން, އެ މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައި އިންޑިޔާގެ އިދާރާތަކުން ބުންޏެވެ.
އިންޑިޔާގެ މޫސުމާ ބެހޭ އިދާރާއިން ބުނީ, ތޫފާން ރިމާލްގެ ބާރު ކެނޑެމުންދާ ކަމުގައެވެ. މި ތޫފާނުގެ އަސަރު, އިންޑިޔާއާ އިންވެގެން އޮތް ބަންގްލަދޭޝްގެ ސަރަޙައްދުތަކަށް ވެސް ދަނީ ކުރަމުންނެވެ. ތޫފާނާ ގުޅިގެން އިންޑިޔާގެ އިރުމަތީ އައްސޭރިފަށުގެ ސަރަޙައްދުތަކުގައި ހިނގި އެކި ހާދިސާތަކުގައި މަރުވި މީހުންގެ ޢަދަދު ވަނީ 16އަށް އުފުލިފައެވެ. އަދި, ތޫފާނާ ގުޅިގެން ލިބުުނު ގެއްލުންތަކުގައި މިލިޔަނަކަށް ވުރެ ގިނަ މީހުންނަށް ކަރަންޓު ޚިދުމަތް ކެނޑިފައިވާ ކަމުގައި އިންޑިޔާގެ އިދާރާތަކުން ބުންޏެވެ.
ތޫފާން ރިމާލާ ގުޅިގެން އިންޑިޔާއާއި ބަންގްލަދޭޝްގެ ބައެއް ސަރަޙައްދުތަކުގައި ބިންގަނޑު ކެނޑުމުގެ ހާދިސާތައް ވެސް ހިނގިއެވެ. އިންޑިޔާގެ އިރުމަތީގައި އޮންނަ ހުޅަނގު ބަންގާލް ސްޓޭޓުން ބުނީ, ތޫފާނާ ގުޅިގެން ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކަށް ލިބިފައިވާ ގެއްލުންތައް މަރާމާތު ކުރުމަށާއި, ކަރަންޓުގެ ޚިދުމަތް ކެނޑިފައިވާ ސަރަޙައްދުތަކަށް އެ ޚިދުމަތް ގުޅައިދޭން މަސައްކަތް ކުރަމުންދާ ކަމުގައެވެ.