އާއިލީ ހަމަޖެހުން ޤާއިމްކުރުމަށް އަޅަންވީ ފިޔަވަޅުތައް ދެނެގަންނަނީ

އާއިލީ ހަމަޖެހުން ގާއިމުކުރުމަށް އަޅަންވީ ފިޔަވަޅުތައް ދެނެގަތުމަށް މަސައްކަތްތަކެއް ކުރަމުންދާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމު ވިދާޅުވެއްޖެއެވެ.

ދިވެހިރާއްޖޭގެ އަޑުގެ ސެނަކޯ މާލަމުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވަނީ ވޭތުވެދިޔަ 6 މަސްދުވަހު އެ ވުޒާރާއިންކޮށްފައިވާ މަސައްކަތްތައް ހިއްސާކުރައްވާފައެވެ.

ޢާއިލީ ތަރައްޤީއާބެހޭ ވަޒީރު ޑރ. ޢާއިޝަތު ޝިހާމު ވިދާޅުވީ އާއިލާތަކަށް އަންނަ ލޮޅުންތައް ދެނެގަތުމަށް މޯލްޑިވްސް ނޭޝަނަލް ޔުނިވަރސިޓީ، އެމްއެންޔޫ އާއި ގުޅިގެން މަސައްކަތްތަކެއް ކުރުމަށް މަޝްވަރާކުރަމުންދާ ކަމަށެވެ.

"އެންމެ ބޮޑަށް ފާހަގަކުރެވޭ ކަމަކީ މުޖުތަމައުގައި އެންމެ ބޮޑަށް ގެއްލުމަކާއި ހިތްތަދިކަމެއް މި ލިބެނީ އާއިލާއަށް ލިބޭ ލޮޅުންތަކުގެ ސަބަބުން، މިފަދަ ކޮންމެ ލޮޅުމަކުން ގިނަ އަސަރުތަކެއް އާދޭ،" ވަޒީރު ވިދާޅުވިއެވެ.

ވަޒީރު ޑރ. އާއިޝަތު ޝިހާމު ވިދާޅުވީ މި މަސައްކަތުގެ ދަށުން މީހުންނާއި މަޝްވަރާކޮށް، މަހާސިންތާއެއް ބޭއްވުމަށްވެސް ރާވަމުންދާ ކަމަށެވެ.

"މަޝްވަރާތަކެއް އަތޮޅުތަކުގައި ރަށްތަކުގައި، ވާހަކަތަކެއް ދެކެވި، ނިމޭއިރު، މަހާސިންތާއެއް ބާއްވާ، މުޖުތަމައުގައި ސަމާލުކަން ދޭންވީ ކަންތައްތައް ދެނެގަނެވި، ދިރާސީގޮތެއްގައި އެކަންތައްތައް ފާޙަގަކުރެވި، އެކަމަށް ތައްޔާރުވުމުގެ ފުރުސަތު ލިބޭނެ،" ވަޒީރު ވިދާޅުވިއެވެ.

ވަޒީރު ޑރ. އާއިޝަތު ޝިހާމު ވިދާޅުވީ އާއިލާތަކުގެ ޑޭޓާ ބޭސްއެއް އެކުލަވާލުމުގެ މަސައްކަތްވެސްކުރަމުންދާކަމަށެވެ. އަދި މި މައުލޫމާތުތަކުގެ އެހީގައި އާއިލާއެއްގެ ތެރޭގައި މައްސަލައެއް އުޅޭނަމަ ކުރިއާލާ ދެނެގަނެވި، އެކަމަށް ހައްލު ހޯދުމަށް ފަސޭހަވެގެންދާކަމަށްވެސް ވަޒީރު ވިދާޅުވިއެވެ.