ތިން ކަނޑެއްގައި ދަތުރު ކުރަމުން ދިޔަ ހަ އާގުބޯޓަކަށް ޔަމަނުގައި ހަރަކާތްތެރިވާ ހަތިޔާރުއެޅި ޖަމާޢަތް, ޙޫޘީން ވަރުގަދަ ޙަމަލަތަކެއް ދީފިއެވެ. އޭގެ ތެރެއިން އެއް އުޅަނދަކީ މާޝަލް އައިލެންޑްސްގެ ދިދަ ޖަހައިގެން ދަތުރު ކުރާ އާގުބޯޓު, ލާކްސެވެ. ޔަމަނުގެ އައްސޭރިފަށުން ދަތުރު ކުރަމުން ދަނިކޮށް ޙޫޠީން ދިން މިސައިލް ޙަމަލާތުގައި އެ އުޅަނދަށް ވަނީ ބޮޑެތި ގެއްލުންތަކެއް ލިބިފައެވެ.
މީގެ އިތުރުން ޙޫޘީން ވަނީ ރަތް ކަނޑުގައި ދަތުރު ކުރަމުންދިޔަ ދެ އާގުބޯޓެއް ކަމުގައިވާ މޯރިޔާއާއި ސީލޭޑީގެ އިތުރުން ޢަރަބި ކަނޑުން ދަތުރު ކުރަމުން ދިޔަ އަލްބާ އަދި މާސްކް ހާޓްފޯޑަށް ވެސް ޙަމަލާދީފައެވެ. އަދި, މެޑިޓެރޭނިޔަން ކަނޑުގައި ދަތުރު ކުރަމުން ދިޔަ މިނަރވާ އެންޓޯނިޔާއަށް ވެސް ޙޫޘީންގެ ޙަމަލާތައް އަމާޒުކޮށްފައިވެއެވެ. އެ އުޅަނދުތަކަށް ޙަމަލާ ދީފައިވާނެ ކަން ޙޫޘީންގެ އަސްކަރިއްޔާގެ ތަރުޖަމާނު ޔަޙްޔާ ސަރީޢު ކަށަވަރު ކޮށްދެއްވައެވެ.
ރަތް ކަނޑުގައި ދަތުރުކުރާ އާގުބޯޓުފަހަރާއި އަސްކަރީ މަނަވަރުތަކަށް ޙޫޘީން ޙަމަލާ ދޭން ފަށާފައި ވަނީ, ފަލަސްޠީނުގެ ޣައްޒާގެ މުސްލިމުން ނެތިކޮށްލަން 2023 އޮކްޓޫބަރު 7ގައި ޔަހޫދީ ފައުޖުން ފެށި ލާއިންސާނީ ޢުދުވާނާ ގުޅިގެންނެވެ. ޙޫޘީންގެ ޙަމަލާތަކުގެ ބޭނުމަކީ, ޢުދުވާނާއި ގަތުލުއާންމުތައް ހުއްޓުވަން ޔަހޫދީންނަށް ބާރު އެޅުމެވެ.
ޙޫޘީންގެ ޙަމަލާތައް އަމާޒު ކުރަމުން ދަނީ އިސްރާއީލަށް މުދާ ގެންދާ އާގުބޯޓުފަހަރާއި, ޔަހޫދީންނާއި އެ މީހުންގެ ހިއްސާ އޮންނަ ކުންފުނިތަކުން ހިންގާ އާގުބޯޓުފަހަރަށެވެ. އަދި, ޙޫޘީންގެ އަސްކަރީ ހަރަކާތްތައް ހުއްޓުވުމުގެ ނަމުގައި އެމެރިކާއާއި އިނގިރޭސިވިލާތް ގުޅިގެން ޔަމަނަށް ބޮން އަޅަން ފެށުމާ އެކު, ޙޫޘީން ވަނީ އެ ދެ ޤައުމުގެ އަސްކަރީ މަނަވަރުތަކަށް ވެސް ޙަމަލާތައް އަމާޒު ކުރަން ފަށާފައެވެ.
ޙޫޘީންގެ ޙަމަލާތައް އަމާޒު ކޮށްފައިވާ ލާކްސަށް ފަސް މިސައިލް ޙަމަލާ އަރާފައިވާ ކަމަށް ރިޕޯޓުތައް ބުނެއެވެ. އެ އުޅަނދުގެ ސަލާމަތީ ކަންކަން ބަލަހައްޓާ ކުންފުނިން ބުނީ, ޙަމަލާތަކުގައި ބޯޓަށް ގެއްލުންތަކެއް ލިބިފައިވީ ނަމަވެސް އުޅަނދުގެ އެއްވެސް ފަޅުވެރިއެއްގެ ފުރާނައަށް ނުރައްކާވެފައި ނުވާ ކަމުގައެވެ. އަދި, ބޯޓު ފެތެމުން ނުދާ ކަމުގައި ވެސް އެ ކުންފުނިން ބުންޏެވެ. އީރާނުގެ އިމާމް ޚުމައިނީ ބަނދަރަށް ދަތުރު ކުރަމުން ދިޔަ ލާކްސަކީ ގްރީސްގެ އުޅަނދެކެވެ.
ފަލަސްޠީނުގެ މުސްލިމުންގެ ޙައްޤުތަކަށް ވަކާލާތު ކުރުމުގެ ނަމުގައި ޙޫޘީން ދެމުންދާ މި ފަދަ ޙަމަލާތައް އިންޑިޔާ ކަނޑުގެ ސަރަޙައްދަށް ވެސް އެ ޖަމާޢަތުން ވަނީ ފުޅާ ކޮށްފައެވެ. އެ ސަރަޙައްދުތަކުން ދަތުރު ކުރާ އުޅަނދުފަހަރަށް ޙަމަލާ ދޭން ޙޫޘީން ދަނީ ނުރައްކާތެރި މިސައިލްތަކާއި ޑްރޯން ފަދަ ހަތިޔާރު ވެސް ބޭނުން ކުރަމުންނެވެ.
ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ޢުދުވާން ހުއްޓުމަކަށް ގެނައުމަށް ބާރު އެޅުމަށް އަމަލީ ގޮތުން ފިޔަވަޅުތަކެއް އަޅަމުންދާ މަދު ފަރާތްތަކުގެ ތެރޭގައި ޙޫޘީން ހިމެނެއެވެ. މީގެ އިތުރުން, ލުބްނާންގައި ހަރަކާތްތެރިވާ ޙިޒްބުالله ޖަމާޢަތުން ވެސް ދަނީ ޒަޔަނިސްޓު އިސްރާއީލުގެ އުތުރުގައިވާ ރަށްތަކަށް އަމާޒުކޮށް މެދުކެނޑުމެއް ނެތި ޙަމަލާތައް އަމާޒު ކުރަމުންނެވެ. އަދި, ޢިރާޤާއި ސޫރިޔާގައި ހަރަކާތްތެރިވާ ޖަމާޢަތްތަކުން ވެސް ދަނީ ޔަހޫދީންގެ އަމާޒުތަކަށް ޙަމަލާ ދެމުންނެވެ. އެ ޖަމާޢަތްތަކަކީ އީރާނުން ވާގިވެރިވާ ޖަމާޢަތްތަކެއް ކަމަށް ބެލެއެވެ.