ވޭތުވެދިޔަ 6 މަސްދުވަހުގެ ތެރޭގައި ކަސްޓަމްސްގެ ބެލުމުގެ ދަށަށް 51 ކިލޯގެ މަސްތުވާތަކެތި
-
އެންމެ ގިނައީ ސިންތެޓިކް ކެތިނޯން
-
މި ތަކެތީގެ މަގުމަތީއަގު 100 މިލިއަން ރުފިޔާއަށް އަރާ
މި ފާއިތުވީ 6 މަސްދުވަސްތެރޭ ރާއްޖެއަށް އެތެރެކުރަން އުޅުނު 51 ކިލޯގެ މަސްތުވާތަކެތި އަތުލައިގަނެފައިވާކަމަށް މޯލްޑިވްސް ކަސްޓަމްސް ސަރވިސްއިން ހާމަކޮށްފިއެވެ.
ކަސްޓަމްސްއިން ވިދާޅުވީ މިދިޔަ ނޮވެމްބަރުމަހުގެ 17ވަނަ ދުވަހުން ފެށިގެން މިމަހުގެ 17ވަނަ ދުވަހުގެ ނިޔަލަށް 51 ކިލޯގެ މަސްތުވާތަކެތި އަތުލައިގަނެވިފައިވާއިރު، އޭގެ މަގުމަތީ އަގު 100 މިލިއަން ރުފިޔާއަށް އަރާކަމަށެވެ.
ރާއްޖެއަށް އެތެރެކުރަން އުޅެނިކޮށް ކަސްޓަމްސްއިން ހިފައްޓާފައިވާ މަސްތުވާތަކެތީގެ ބާވަތްތަކުގެތެރޭގައި އެންމެ ގިނައީ ސިންތެޓިކް ކެތިނޯންއެވެ.
އަތުލައިގަނެފައިވާ މަސްތުވާތަކެތީގެ ތަފާސްހިސާބު
ހޭޝްް އޮއިލް : 910ގ
މެތްއެމްފެޓަމިން : 4714ގ
ކެނަބިސް : 101.80ގ
ސިންތެޓިން ކެތިނޯން : 13536ގ
އެމްފެޓަމިން : 451ގ
ސިންތެޓިކް ކެނަބިނޮއިޑްސް : 25ގ
ކޮކޭން : 18855ގ
ހެރޮއިން : 7400ގ
މެފެޑްރޯން : 3870ގ
އެމްޑީއެމްއޭ : 1152ގ
ފަހަކަށް އައިސް ރާއްޖެއަށް މަސްތުވާ ތަކެތި އެތެރެކުރުމަށް މަސައްކަތް ކުރާ މިންވަރުވަނީ އިތުރުވެފައެވެ. އެގޮތުން ބޮޑެތި އަދަދުތަކުން އެތެރެކޮށްފައިވާ ނުވަތަ އެތެރެ ކުރަން މަސައްކަތް ކުރާ މަސްތުވާ ތަކެތި އަތުލައިގަނެފައިވާއިރު، ބައެއް ފަހަރު ފުރާނައަށް ނުރައްކާވާ ޒާތުގެ މަސްތުވާތަކެތިވެސް ދައުރުވާ ކަމަށް ކަމާއި ބެހޭ އިދާރާތަކުން ވިދާޅުވެއެވެ.