ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެން ހައިހޫނުގައި ޖެހިފައިވާ މިލިޔަނަކަށް ވުރެ މުސްލިމުންނަށް އިތުރު ކާބޯތަކެއްޗާއި އިންސާނީ އެހީތެރިކަން ހޯދައިދިނުމަށް އިންސާނީ އެހީއާ ބެހޭ ބައްދަލުވުމެއް ބޭއްވުމަށް އުރުދުނުން ނިންމައިފިއެވެ. މި މަހާސިންތާ ބޭއްވުމަށް ހަމަޖެހިފައި ވަނީ ޖޫން 11 ވަނަ ދުވަހުއެވެ.
ޣައްޒާއަށް އިންސާނީ އެހީ ހޯދުމަށް ބާއްވާ ބައްދަލުވުން ވިލަރެސް ކުރުމުގައި މިޞްރާއި އދއިން އުރުދުނާ އެކު ބައިވެރިވެއެވެ. އެ ބައްދަލުވުމުގައި އެހީދޭ ޖަމުޢިއްޔާތަކާއި އެހީދޭ ޤައުމުތަކުގެ ވެރިން ބައިވެރިވެ ވަޑައިގަންނަވާނެ ކަމުގައި އުރުދުނުން ބުންޏެވެ. "މި ބައްދަލުވުމުގެ އަމާޒަކީ ޣައްޒާގައި ކުރިމަތިވެފައިވާ އިންސާނީ މުސީބާތް ހައްލުކުރުމަށް ބައިނަލްއަޤުވާމީ މުޖުތަމަޢަށް ކުރެވޭނެ ކަންކަން ދެނެގަނެ, އެ ކަންކަން ވިލަރެސް ކުރުން،" އުރުދުންގެ ސަރުކާރުން ނެރުނު ބަޔާނެއްގައި ބުންޏެވެ.
މީގެ އިތުރުން, އެހީދޭ ޤައުމުތަކާއި ޖަމުޢިއްޔާތަކުން ފޮނުވާ ކާބޯތަކެއްޗާއި އެހީގެ ސާމާނު ޣައްޒާގައި ހާލުގައި ޖެހިފައިވާ މީހުންނަށް ފޯރުކޮށްދިނުމަށް ހުރި ހުރަސްތައް ނައްތައިލުމާއި, އެ މީހުންނާ ހަމައަށް އެހީގެ ސާމާނު ގެންގޮސްދެވޭނެ މަގުތަކެއް ބައްދަލުވުމުގައި ހޯދާނެ ކަމުގައި ވެސް އުރުދުނުން ބުންޏެވެ.
"ޣައްޒާ ޢުދުވާނާ ގުޅިގެން އެ ސަހަރުގެ މުޅި އާބާދީއަށް ދަނީ ބޮޑެތި އަނިޔާތަކެއް ލިބެމުން. އޭގެ ތެރެއިން ބޮޑު އިންސައްތައެއް ވަނީ ހައިހޫނުގައި ޖެހިފައި. އަނިިޔާ ވަނީ ޢާންމުވެފައި. އިންސާނެއްގެ ހިތަށް ނުގެނޭ މިންވަރަކަށް [ގެރޮރާއި ޢުމްރާނީ ވަސީލަތްތައް] ވަނީ ސުންނާތި ކޮށްލާފައި. ކާބޯތަކެއްޗާއި, ފެނާއި, ބޯހިޔާވަހިކަމާއި ބޭސްފަރުވާ ހޯދޭނެ ގޮތެއް ނެތް،" އުރުދުންގެ ސަރުކާރުން ބުންޏެވެ.
ޣައްޒާގެ މުސްލިމުންނަށް މި ނިކަމެތި ހާލު ޖައްސާފައި ވަނީ ޔަހޫދީ ފައުޖުންނެވެ. އިސްރާއީލުގެ އަނިޔާވެރި ސިފައިން މިހާރު ދަނީ ޣައްޒާގެ އެންމެ ދެކުނުން އޮތް ރަފަޙުގައި ވެސް ހަރަކާތްތެރިވަމުންނެވެ. އެ ރަށުގެ ގެދޮރަށް ބޮންއަޅައި, މިލިޔަނަކަށް ވުރެ ގިނަ ރެފިއުޖީން ދިރިއުޅެމުންދާ ފޭލިގެތަކަށް ނުރައްކާތެރި ޙަމަލާތައް އަމާޒު ކުރަމުންނެވެ. އަންހެނުންނާއި ކުޑަކުދިން ޝަހީދު ކުރަމުންނެވެ.
ރަފަޙަށް އެރުމަށް ފަހު ޔަހޫދީ ފައުޖުން ވަނީ މިޞްރުން ޣައްޒާއަށް އެހީގެ ސާމާނު ވައްދަމުން ދިޔަ ރަފަޙް ހުރަސް ވެސް ބަންދު ކޮށްފައެވެ. އަދި, ރަފަޙާއި މިޞްރު ގުޅޭ ސަރަޙައްދީ ރޮނގު އެ މީހުންގެ ބާރުގެ ދަށަށް ގެންގޮސް, ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުން ހުއްޓުވާފައެވެ. ޣައްޒާގެ ހުރިހާ ސަރަޙައްދީ ހުރަހެއް މި ވަގުތު އޮތީ އަނިޔާވެރި ޔަހޫދީންގެ އިސްތިޢުމާރީ ސިފައިންގެ އަތް ދަށުގައެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,284އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,057އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.